Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tolano-tolanook fo Manetualain salanin manai Korintu sa lemin! Manetualain nalo talanoo kala soaneu da'di Ndia hataholi kamahehelen, nana Kristus Yesus nuun tolanoo kala sama-sama mo basa hataholi manai su'di bee a, fo ala sene-do'ok neu Lamatuak Yesus Kristus, fo nde sila Lamatua na ma ita Lamatua na boe. Au fo Paulus, ma ita tolanoon Sostenes, ami mamahena, ela leo bee na, ita Aman Manetualain, ma Lamatuak Yesus Kristus, fe baba'e-papalak ma so'da-molek neu emi. Au sulak susulak ia, da'dileo Kristus Yesus hataholi nadedenun, fo nanaso'uk neme Manetualain mai ma ninik hihii-nanaun boe.

² (1:1)

³ (1:1)

⁴ Au oke makasi tataas esa neu Manetualain soaneu emi, nana emi sipo basa baba'e-papalak neme Manetualain tunga Kristus Yesus so.

⁵ Nana emi da'di Kristus nuun so, boema emi so'da ma namasu'i nai basa dede'ak lala'ena dalek, ma emi malela ma nai basa hata lala'ena dalek dema na seli, ma emi manoli malelak malelak ndia.

⁶ Ndia natu'du nae, Hala Malole la'eneu Kristu sa, ana da'di esa no emi nai emi dalem dale so,

⁷ de nalosa emi ta to'a ta baba'e-papalak esa boen, nai lelek emi bei mahani ita Lamatuan Yesus Kristus mamai na, fo basa hataholi la litan.

⁸ Neukose Kristus nde nanea matan emi losa mate'e na; fo ela nai lelek Ana falima'in te, Ana ta hapu na emi masala-masingok fa.

⁹ Manetualain fo hapu nananamahelek te'e-te'e a, Ndia nde Manetualain fo nalo basa emi soaneu da'di esa mo Ana na, fo nde ita Lamatuan Yesus Kristus.

¹⁰ Tolano-tolanoo ngala lemin! No ita Lamatuan Yesus Kristus na'de na, au oke fo ela emi basa-basa mala teikesa dalekesa; fo ela nasi'da-naba'e ka, boso da'di nai emi dalek. Ela leo bee na emi da'di esa, teikesa dalekesa, ma dudu'a-aafik esa.

¹¹ Nana Kloe uma isi nala lafa'da au lae, hapu nale'a-napili ka nai emi dalek.

¹² Fo au dudu'a ka nde lae, nai emi dalek hapu nggelok lafa'da "Au tunga Paulus," ma nggelok boeo lae, "Au tunga Apolos" ma nggelok lae, "Au tunga Petrus", ma nggelok seluk bai soona lae, "Au tunga Kristus."

¹³ Hapu nai bee, Kristus nanababa'ek! Paulus ta mate nanalona-nggangek soaneu emi fa! Emi boeo ta nanasalanik soaneu da'di Paulus ana manatungan fa hetu?

¹⁴ Makasi ba'u ka, au ta salani hataholi esa boen nai emi dalek fa, ka'da Kripus ma Gayus.

¹⁵ Da'di boso nalosak hataholi esa boen nafa'da nae, au salani basa ndia soaneu da'di au ana manatungan.

¹⁶ Eh hei, memak Stefanus no uma isi nala, au nde salani sala. Tehu fe'ek neme ndia mai soona, au afandendelek, ta hapu seluk hataholi fe'ek fo au salani fa.

¹⁷ Kristus ta nadenu au soaneu salani hataholi fa, te soaneu tui-benga Hala Malole maneme Manetualai na mai; ma au muse tao dede'ak ndia no ta pake hataholi daebafa ka malela kokola na boen, fo ela Kristus mamaten nai ai nggangek lai na, koasa na boso da'di sosoa-ndandaa tak.

¹⁸ Nana ba'eneu hataholi fo ana la'ok nasale leo mamate-momopo ka neu a, halak la'eneu Kristus mamaten nai ai nggangek lai na, nalupa tutui masapepekok basa sila la. Tehu ba'eneu ita fo Manetualain soi tefa basa ka, tutui-bebengak ndia, nalupa eno-dalak soaneu Manetualain natu'du koasa na.

¹⁹ Nana nai Susula Malalaok dale Manetualain nafa'da nae, "Neukose Au tao tasibu hataholi malela kala manatee teno na, ma neukose Au tao a hataholi malelaina la malela na sapu-lalo."

²⁰ Naa, sosoak hata hataholi malelak manatee tenok sila la? Sosoak hata hataholi malelaina la? Sosoak hata, hataholi dodole maneu manai daebafak ia la? Manetualain natu'du basa nae, manatee teno daebafak ia, nde bee na manakokola bafa lou kala!

²¹ Nana leomae hataholi daebafa ka malela na leo beek boeo, ana ta hapu nalelak Manetualain ninik ndia malelan ndia fa. Te lena-lenak, hu ka nde Manetualain manatee teno na de, Ana nau soi tefa na hataholi fo lamahele neun, tunga halak fo ami tui-bengan fo daebafa ka nafa'da nae, kokola bafa louk basa sila la.

²² Hataholi Yahudi la loke lakaseti manda'di beuk, fo ana da'di buti, ma hataholi Yunani la paluu ka'da manatee teno daebafa ka.

²³ Tehu ita ia ka'da tui-benga Kristus, fo manamatek nai ai nggangek lai na. Tutuik ndia, ana tao na hataholi Yahudi la lamanasa, ma hataholi ta Yahudi la lafa'da lae, tutui bafa louk basa sila la.

²⁴ Tehu ba'eneu Manetualain nalo basa hataholi la, nau hataholi Yahudi do hataholi ta Yahudi boe, tutuik ndia nalupa Manetualain eno-dalan soaneu natu'du koasa na, ma manatee teno na.

²⁵ Nana hata fo nananitak nggoak nai Manetualai na, ndia nde bee na manatee tenok fo lenaheni hataholi daebafa ka manatee teno na, ma hata fo nananitak tapandoes nai Manetualai na, ndia nde bee na balakai na lenaheni hataholi daebafa ka balakai na.

²⁶ Tolano-tolanoo ngala lemin! So'ba mafandele su'dik emi heheo-hihilum nai lelek fo Manetualain nalo emi a. Nai emi dalek, hapu ka'da lumanak mesa kana manatee tenok, do manakoasa do matua-madema tunga hataholi a mata memete na.

²⁷ Nana memak Manetualain sue hele hata fo hataholi daebafa ka nafa'da nae nggoak, fo ela hataholi malela kala ala mae. Ma Manetualain boeo Ana hele hata fo hataholi daebafa ka nafa'da nae tapandoes, fo ela hataholi mabe'i-balakaiina la, ala mae.

²⁸ Manetualain hele hata fo lafa'da lae, nai daeanak, nananakamumulu-nakamamaek, lena-lenak daebafa ka nafa'da nae, sosoa-ndandaan ta, fo ela Manetualain tao nakalulutuk hata fo daebafa ka nafa'da nae, paluu nanseli.

²⁹ No enok ndia fo ta hapu hataholi esa boen, koao-ndaeao nai Manetualain matan.

³⁰ Hu ka nde Manetualain de nalosa emi da'di esa mo Kristus Yesus. Tunga Kristus, de Manetualain tao na ita da'di manatee tenok, ma tunga Ndia boe, de Manetualain tao na ita malole falik to Manetualain, nakadada'dik ita da'di Ndia hataholi kamahehele hehelin, ma Ana soitefa na ita.

³¹ Da'di, sama na leo nanasulak nai Susula Malalaok dale nae, "See nau namatutua ao na soona, namatutua neu hata fo Lamatua ka tao-no'i ka."

1 Korintus

Video 1 Korintus 1

Ikuti Kami:

KONTAK | PARTISIPASI | DONASI