Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sura ide au hangko iriko Paulu hai hangko i Sostenes, kipakatu irikamu to Sarani i kota Korintu au nakakiokau Pue Ala mewali taunaNa. Iami au mopamalelahamokau anti pohintuwumi hai Kerisitu Yesu hihimbela hai ope-ope tauna au maida iumba pea au mekakae i Yesu Kerisitu, Amputa hai Ampunda. Iko ide, naangkana Pue Ala mewali surona Yesu Kerisitu moula peundeaNa.

² (1:1)

³ Ngkaya tabea! Mekakaena i Pue Ala Umanta hai i Pue Yesu Kerisitu bona Ia mowatikau hangko i kabulana laluNa hai moweikau roa ngkatuwo.

⁴ Halalu, barana mengkangkaroo manguli ngkaya kamaroana i Pue Ala anti kaikamuna, lawi Ia moweikau pewati hangko i kabulana laluNa anti pohintuwumi hai Kerisitu Yesu.

⁵ Anti pohintuwumi hai Kerisitu, Naweimokau hinangkana pewati au mobundu i katuwomi: Napopaisaamokau paturo au tou, hai Naweimokau kapande mopahawe paturo iti.

⁶ Ope-ope iti mopakanoto kamarohona pepoinalaimi i bambari kana i Kerisitu au kipahaweakau,

⁷ duuna barapi ara kamakurana pewati au nilambi. Nilambimi paka-pakana kapande hangko i Inao Malelaha, hai mampegiakau kahawena hule Amputa Yesu Kerisitu.

⁸ Ia ina mopakaroho pepoinalaimi duuna i kahopoa dunia, bona ane ikamu nakahawei Amputa Yesu Kerisitu i kahaweNa hule, barapi ara kamasalami.

⁹ Pue Ala mokakiokau bona mohintuwukau hihimbela hai AnaNa, Yesu Kerisitu Amputa, hai Ia mopabukei liliu dandiNa irikita.

¹⁰ Halalu, hangko i kuasa au naweina Amputa Yesu Kerisitu, merapina bona mohintuwukau ope-ope. Ineekau mopaara posisala. Hangangaa mohintuwukau hai hampepekirikau.

¹¹ Halalungku, tunggaiaku manguli nodo, lawi arahe halalunta hasou-souna Kloe au mopahawe iriko kaarana posisalami.

¹² Mololitana nodo lawi arakau au mampeinao mampopontani hadua hai hadua. Arakau au manguli: "Iko meula i Paulu." Arakau au manguli: "Iko meula i Apolo." Au ntanina wori manguli: "Iko meula i Peturu." Ara mbuli au manguli: "Iko meula i Kerisitu."

¹³ Maroa pae ane ikamu au meula i Kerisitu mosisala nodo? Ba iko au mate rapaku i kau mohuru dosami? Ba rariukau bona mewalikau topegurungku? Bara!

¹⁴ Kuuli ngkaya kamaroana lawi barakau ara au kuriu, batenda pea Krispus hai Gayu,

¹⁵ bona datihe ara au manguli kuriukau mewali topegurungku.

¹⁶ (Oo, Setepanu wori hantambi, iko mpuu au moriuhe. Agayana i raoa hangko irihira, barapi kukatuinao tauna ntanina au kuriu.)

¹⁷ Kerisitu barana moangka mewali suroNa bona moriuna tauna, agayana Naangkana bona moantina Ngkora Marasa. Ane kupahawe Ngkora Marasa, barana mololita hangko i kamapandeku datihe ara tauna au mampoinalai lolitangku anti kamapandeku moleri barahe moisa kuasana Kerisitu au mate i kau mombehape.

¹⁸ Kipahawe bambari au manguli Kerisitu mohuru dosa manusia i karapapateNa i kau mombehape. Ane tauna au monontohi naraka mohadi bambari iti, rauli: "Iti lolita tontuli." Agayana ane ikita au nahoremake Pue Ala hangko i huku dosanta mohadi bambari iti, tauli: "Itimi kuasana Pue Ala!"

¹⁹ I lalu Sura Malelaha, Pue Ala manguli node: "Ina Kupaope kapande manusia, hai bara ina Kupake akalanda tauna au mapande."

²⁰ Apa bundunda tauna au mapande? Apa bundunda guru agama to Yahudi? Apa bundunda tauna au mapande mololita i lalu dunia ide? I peitana Pue Ala, ope-ope kapande manusia Naimba mbero-mbero pea.

²¹ Lawi hangko i kapande manusia, ikita bara peisa moisa Pue Ala. Anti kamapandena Pue Ala, Ia mobotusi bona hema pea au mepoinalai i Ngkora Marasa au kipahawe, tauna iti ina Nahoremahe hangko i huku dosanda. Agayana ane kipahawe Ngkora Marasa, tauna au bara mepoinalai manguli: "Iti lolita tontuli."

²² Ane to Yahudi, barahe mounde mepoinalai ane barahe kipopaitaa tanda kuasa. Hai ane to Yunani, barahe mounde mepoinalai ane barahe kipakanotoa hai kapande manusia.

²³ Agayana ikami mopahawe kapatena Kerisitu au rapaku i kau. Bambari iti rapokakoinao to Yahudi, hai i tauna au barahe to Yahudi, bambari iti raimba pea lolita tontuli.

²⁴ Agayana Pue Ala mokakio tauna hantanga mewali taunaNa. Arahe to Yahudi, ara worihe to Yunani. Ane tauna iti mohadihe Ngkora Marasa hai mepoinalai i Kerisitu, moisamohe kuasana hai kamapandena Pue Ala.

²⁵ Ane kipahawe kapatena Kerisitu au rapaku i kau, ikami raimba tontuli. Agayana katouana, meliu kamapandena Pue Ala hangko i kapande manusia. Moula lolita manusia, tunggaiana Pue Ala iti bara mobundu. Agayana meliu kuasana Pue Ala hangko i kuasa manusia.

²⁶ Halalu, nikatuinao katuwomi hangko damanikau nakakio Pue Ala mewali taunaNa. I tempo iti, barakau bosa au mapande ba au makuasa ba au mapangka lantimi i peitana manusia,

²⁷ lawi Pue Ala mopilei tauna au bara mapande i peitana manusia, bona tomapande ina rapakaea. Naoaka mopileihe au malede, bona tauna au maroho ina rapakaea.

²⁸ Naoaka mopileihe au tepaiwoi tuwonda, au rakakabosai hai au bara mobundu i peitana manusia, bona manoto kadana mobundu au napomahile manusia.

²⁹ Mewali, ido hai bara ara tauna au peisa mampemahile. Bara ara hadua au peisa manguli: "Anti kamapandeku, ido hai napileina Pue Ala."

³⁰ Pue Ala pea au mobungkahiake rara pane mohintuwuke hai Kerisitu Yesu. Anti pohintuwuta hai Kerisitu Yesu, taisami kamapandena Pue Ala: Kerisitu au mopakanotomoke i peitana Pue Ala, au mopamalelahamoke, hai au mokira wataNa mohoremake hangko i huku dosanta.

³¹ Mewali, nodo au teuki i lalu Sura Malelaha: "Hema au naunde mampemahile, hangangaa mopakahile apa au nababehi Pue."

1 Korintus

Video 1 Korintus 1

Ikuti Kami:

KONTAK | PARTISIPASI | DONASI