Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Surat rat ni Paulus, luk maya' pian Allah tinawar mangun ku rasul Yésus Keristus, idi Sostenis, kinanak tau—

² Kuan sidang Allah luk bang bawang Korintus, ieh ineh kuan amung-amung luk linigan bang Keristus Yésus, idi luk tinawar mangun ku lun luk meligan, dengan amung-amung lemulun luk nawar ngadan Tuhan tau Yésus Keristus bang amung-amung su luk inan, ieh ineh Tuhandeh idi Tuhan tau pana':

³ Do' katu idi awang ratnan Allah Taman tau idi Tuhan Yésus Keristus temurun kuan muyuh.

⁴ Ui megéi' maré ubur kuan Allahku ngaceku muyuh ratnan katuNeh luk biré kuan muyuh bang Keristus Yésus.

⁵ Ngaceku bang Keristus muyuh mangun ku lun do' bang luk amung-amung, ieh ineh bang anid-anid bala idi amung-amung ileh.

⁶ Bala ratnan Keristus ineh pangeh inau' lutep bang nemuyuh,

⁷ pad muyuh na mekurang ratnan aceh baré Roh pana', laba' muyuh nganét luk uen ngelio ratnan Tuhan tau Yésus Keristus.

⁸ Ieh sikal nganau' nemuyuh lutep macing kekipedneh, pad muyuh na mesala' kareb Aco Tuhan tau Yésus Keristus.

⁹ Idi Allah ineh luk pangeh nenawar nemuyuh semuet bang rurum AnakNeh Yésus Keristus Tuhan tau, lutep maya' jani'.

¹⁰ O kinanak-kinanakku, ui mutuh nemuyuh dengan ngadan Tuhan tau Yésus Keristus, pad muyuh amung-amung sebuleng niat ratnan luk belén muyuh, pad na patad. Iamo' do' muyuh mangun ku aceh rurum, dengan sebuleng terawé idi sebuleng niat.

¹¹ Ngaceku O kinanak-kinanakku, lun rat bang tetek ruma' Kloé pangeh nemada' negku ratnan muyuh pekedaluh.

¹² Ini ilung balaku: Anid-anid burur muyuh baken bala. Sebuang pebala, "Ui ini Paulus kuan," idi inan luk pebala, "Ui ini Apolos kuan," idi inan teh luk pebala, "Ui ini Pétrus kuan," idi inan teh luk pebala, "Ui ini Keristus kuan."

¹³ Miakké Keristus uen mabpat? Inanké Paulus ineh sinalib ngaceku muyuh? Idi dengan ngadan Pauluské muyuh rireb?

¹⁴ Ui ngubur Allah, ngaceku na luk idi seburur pana' rat arang muyuh luk pangeh rirebku, iamo' Krispus idi Gayus mo'.

¹⁵ Seburur pana' nateh luk miak pebala, muyuh pangeh rireb dengan ngadanku.

¹⁶ (Iamo' ui pangeh nengerereb lun bang ruma' Stepanus, idi baken ratnan ineh na ui kali' kudeng inan luk rirebku.)

¹⁷ Keristus na nengecuk negku amé' ngerereb lemulun. Ieh nengecuk negku mada' Bala luk Do', baken dengan ileh bala, pad salib Keristus ineh na mo'-mo'.

¹⁸ Ngaceku bada' ratnan salib ineh mangun ku bacé kuan lemulun luk bang dalan até; iamo' kuan tau luk bang dalan ulun meruked, bada' ineh mangun ku lalud Allah.

¹⁹ Ngaceku pangeh inayud, "Idi Ui sikal nala' ileh lemulun luk mileh ineh, idi terawé lemulun luk ngerawé ineh Ui sikal ngagka'."

²⁰ Iapehké lun mileh ineh? Iapehké guru-guru Ukum ineh? Iapehké lun luk mileh pekitun bang kareb ini? Allah nenganau' ileh tana' ini mebacé?

²¹ Ngaceku Allah, dengan ilehNeh, pangeh nengitek dalan, pad lemulun na miak ngiti Allah dengan ilehdeh sebuleng. Iamo' Allah pian ngulun lemulun luk manu ku bada' luk "mebacé" ini luk badén kai.

²² Lun Yahudi nakap tanu', idi lun Grika nakap ileh.

²³ Iamo' tau ini mada Keristus luk sinalib, ieh ineh aceh bada' luk ngesabeng nelun Yahudi, idi mangun ku bacé kuan lun pupu baken.

²⁴ Iamo' kuan lemulun luk tinawar, do' lun Yahudi idi lun pupu baken pana', Keristus ineh lalud Allah idi ileh Allah.

²⁵ Ngaceku luk titen bacé Allah ineh meluun rayeh ilehneh ratnan ileh lemulun; idi luk titen laya' Allah ineh meluun tueh ratnan tueh lemulun.

²⁶ Ngerawé muyuh, O kinanak-kinanakku, ratnan ulun muyuh kareb muyuh tinawar Allah. Pawa' muyuh luk mileh idi melalud idi mebala maya' terawé lemulun.

²⁷ Iamo' luk mebacé bang tana' ini pinili' Allah, pad Ieh miak ngigu' lemulun luk mileh ineh, idi luk melaya' bang tana' ini pinili' Allah, pad Ieh miak ngigu' lemulun luk metueh ineh.

²⁸ Idi luk mebeneh bang tana' ini idi luk pidat ineh pinili' Allah, idi anun-anun luk na tupu raga pana', pad Ieh miak nala' anun-anun luk meraga,

²⁹ pad seburur pana' na ngedita' bururneh sebuleng pa kiung Allah.

³⁰ Iamo' dengan peruan ratnan Allah, muyuh ini perurum dengan Keristus Yésus, luk pangeh mangun ku ileh kuan tau ratnan Allah. Ieh nganau' netau matu, idi ngeligan idi nguli' netau.

³¹ Ngaceku ineh maya' kudeng luk inayud, "Idé-idé luk mesido' niat, nima' neneh mesido' niat ngaceku luk inau' Tuhan."

1 Korintus

Video 1 Korintus 1

Ikuti Kami:

KONTAK | PARTISIPASI | DONASI