¹ Ki zep Yesus bulkum lwahal zaka– zere mo gwe gwen ena Kapernaum sun dep. Zao zep etan zi beyam-byana tagam neblazak.
² Dekam zep hen zi sang-sangna taha-tana teisya ine gwen srem naka beryak de ziredan naka nerhatazak. Yesus kim anakan tame tabirki, “Eiwa, zen man tangan Asa daibliblaꞌan,” dekam zep zi sang-sangna insa gubluka, “Tane tol, bahem ngalap gwen. Eno karek-karekna mese ep tap gulsublunan.”
³ Musa mo titi tabin olsa de tawa ta gwibin zini kim ze Yesussu kirekam sane daꞌak, dekam zep enlala ennak donsubluꞌak, “Zi bose zik mo karekna insa tap gulsublun hap gunda, zen man kil giꞌira, ‘Ëe an Alap han apdenak.’ Kirekam insa gunda, zen Alapsa lamang tanda.”
⁴ Yesus hwena mes zeno mae mo enlalana tame tazimki, ki zep gubiridaka, “Em in kirekame enlala ennak Asa lonsubluꞌan, zen ere mae mo enhosae kim karek laꞌan!
⁵ Em ema ano ola husus eibir– anakan insa gublulye, ‘Eno karek-karekna mese ep tap gulsublunan.’ Hwena anakan de gublunkam, ‘Em luwen, hendep song gwe,’ san esa hen etan husus eibir? Sap ol-gun darena in apdenak– Alap mo sosonkam de gublun ol.
⁶ Hwena angkam Ëe ama ebe mae hap goltreizimꞌin– em dikim Asa anakan tame tan hap, ‘Alap mes ki ngatan zi mo lang nakore Zi Tanganna abe hap sosonna golblaka– okamanak awe dikim zi mo karek-kareksa tap gulsuk gwizimdin hip denaye.’” Ki zep hwena etan zi sang-sangna insa gubluka, “Em luwen. Ere mo berya insa teisya, ki gol san song gwe.”
⁷ Zi lekna in dekam zep hendep luweka, ki zep hendep zere mo gol san dep song gweka.
⁸ Zi beyam-byana in kim owasna insa hla nuk, dekam zep airin niban Alap mo bosena teip nulsuk gweblaꞌak, sap Zen dekam zere mo soson yawalsa Yesus osan okamanak de zi hip golzimꞌinka.
⁹ Yesus kim dekon song gweꞌanka, dekam zep Roma mo irik ginnik dep de pajak te-ala alal ta gwizimdin zini asa hla taꞌanka. Ano bosena Matius. Ëe ere mo syal gwe-gwen teksonnake nikinꞌik. Zao zep asa gublu zaka, “Haen. Asa em ang gweblan.” Ëe ki zebe luwek, ki zebe hendep ang gweblak.
¹⁰ Yesus kim ano golak goletembane taꞌanka, dekam zep hen ahakore pajak te-ala alal tanda gwen wenya beya enkam yaing gwezak. Hen ahakore karek-karek gulin halasen gwen wenya man ze hen beyakam yaing gwezak. Ki zep hendep apdekam Yesus mae han tembane taꞌak– hen zere hon de ang ta gwen wenya ban.
¹¹ Farisikam de gubirida gwen zini kim ze hla nulidazak, dekam zep Yesus hon de ang ta gwen wenya insa nenbiridazak, “Eno mae mo guruna in ba hap tangan pajak te-ala alal tanda gwen zi niban apdekam goletembane taꞌara? – hen ahakore karek-kareksa de gulin halasen gwen wenya banye! Zen in kwae nabanke!”
¹² Yesus kim kirekam salbiridaka, ki zep ding gulzimki, “Zini, sang-sang srem wenya, zen hom doktersa dwam ne gweblanan. Zen diki zi sang-sang en dwam ne gweblanan.
¹³ Ano syalsa de dam gulsun hup, diki dawemna Alap mo ola ansa emaka klis uꞌin, Zen kim anakan Israelsa gubiridakake, ‘Ëe a kirekam de lowehe gwen habe mo emsa dwam gwibiridaꞌanye: Bol-zaun tanganna, aha zi mo karek-kareksa kwasang naban em eititi gwe-gwibin. Ere mae mo karek-karek hap de kire-kiresa abe hap tru tasik gweblansa, zen abe hap bol-zaun tangan naka hom.’ Zep Ëe ansa okamanak hatazak, Ëe karek-karek gulin halasen gwen wenyaka de kwang guludan habe hatazak. Men zen zenaka tim di gwibirin, ‘Ëe an dawem-dawemna,’ Ëe desa de kwang guludan hap home hatazak.”
¹⁴ Zao kim lwa seꞌak, ki zep baptis ta gwibin zini Yohanis hon de ang ta gwen wenya Yesus hon yaing gwezak, ki zep ze dakensiblik, “Ëe ama Alapsa dikim enlala zon tasiblin naban abe ta gwen hap etan-etankam tembanena elwa gwenan. Farisikam de zini hen kirekam egwe gwenan. Hwena ebon de ang ta gwen wenya ba hap kirekam syal neibir srem gwe-gwenan?”
¹⁵ Yesus ki zep ding gulzimki, “Abon de ang ta gwen wenya kip man dakastilzimꞌin– an kirekam tembanesa de elwan sremkam lowehe gweꞌanye. Sap zen angkam teipsin zisi de zergwen makan Asa nergwe gweꞌan. Hwena jal zini kim de Asa jek-jak daꞌak, Abon de ang ta gwen wenya dekam molya tembane tak. Embwan hap sa baes tal.”
¹⁶ Etan ki zep kire hap gulk sun de ol blaonzimdinni dan mas sozimki, “Zi mo baju kwang de hul nenkam, zen bejen deyol sop esekam makan tazimdin. Kirekam bejen dakastin. Sap ngan sosunkum deyol esena in de yok gweꞌak, dekam sa baju epba hula in mam enkam etan kalk ner.
¹⁷ Hen kirekam, anggur ho esesa bejen kambing sopkam de botol epbanak yuren. Kirekam hom dakastiꞌin. Sap anggur ho esesa de kambing sop botol epbanak yurenkam, anggur hona in kim de nopna tail giꞌik, kambing sopkam de botola in dekam sa kalk ner, hen anggur hona in dekam sa zalta dep hleweher. Anggur ho esena zen diki kambing sop botol esenak de yurenkam dakastiꞌin– apdenak dikim dawemkam nolan hapye. Zep hen kirekam, Abon de ang ta gwen wenyik de etan epba lowehen san abarenak ang tan hap hom dakastiꞌin.”
¹⁸ Yesus kim nama baptis ta gwibin zini Yohanis hon de ang ta gwen wenya ban ola goletonꞌanka, ki zep ze Yahudi mo but srem golak de aha mamna hata zaka. Zao zep Yesus mo nwenak boklena kom so zaka, dekon zep gu seblaka, “Ano wenam tola ner hom tangan tilin. Hwena nen ki song en. Em de tahasa tehabir anenkam, zen sa etan ngaya gwer.”
¹⁹ Yesus ki zep hendep luweka, dekam zep zere hon de ang ta gwen wenya aban mae zini insa ziang gweblaka.
²⁰ In kime sek gweꞌak, wenya ki zep Yesussu tahan nakon golek de tazak. Wenya in man aura gwe-gwek. Tahunna mes dua-blas enkam altilsibik– sang-sangna in han de gollwa gwennakye. Zen man enlala gweꞌak, “Baju mae ennake towanblaꞌak, ee dekam asa dawem gwer.” Ki zep hendep baju sihi top nakon olk ta sonek.
²¹ (9:20)
²² Yesus ki zep hendep tahan san lero gweka, dekam zep wenya insa hlaulku, zao zep gubirki, “Anyan, bahem ngalap gwen. Em ema Asa taibliblala, zebe dawem gwenda.” Wenya in hendep dekam zep ki aurana in tewesibik.
²³ But srem golak de mam zini in mo golak kim asa goleyaing gweꞌanka, anakan zebe hla kulidaꞌak, “Zini beya nik ol mamkam gosa dabiꞌin, hen ahakon sulingkim sei go terya daꞌan.”
²⁴ Yesus ki zep ze gubirida kinzika, “Em kitak wet so gwen. Wenam tola an hom til. Zen nisi am taꞌan.” Zen hwena man swre da gweꞌak.
²⁵ Ëe kime kitak olealsa sonek, Zen ki zep hwena teksonna in zao wenam tol tokna lwaꞌak desan dep tilki. Taha nakon kim gul ineka, dekam zep hendep wenam tol tokna in etan ngaya gwek, hendep zauk.
²⁶ In desa ze owasna kirekam syal gwibirki, dekam zep ki hendep tingare langna iwe de e-e san nol haladak.
²⁷ Yesus kim dekon etan asa golesek gweka, ora nakon zep zi nwe dimin darena ertro kinzika. Ki zep kon laken soneblaka, “Daud Bak mo Auyan-tane, asa Em kwasang gwizimdin.”
²⁸ Ëna iwe de golak kim asa golebiti gwe zaka, zi nwe dimin darena in ki zep ze hen lil zika. Yesus ki zep ze takensizimki, “Em san ema Asa anakan laibliblaꞌara? – ‘Zebon sosonna ki– asa dikim dawem son hap denaye.’” Ki zep ding ulblika, “In kirekam, Bian.”
²⁹ Ki zep nwenak anakare ola ban towanzimki, “In kirekam ena Asa laibliblala, in zep sa kirekam ebe nikip lwazim.”
³⁰ Dekam zep ki hendep nwena kara eka. Zao zep guzimki, “Owasna an zen ki ebon nebon lwanan, bahem aha maesa lonbiridan.”
³¹ Hwena zen kim kon song eka, dekam zep ki hendep tingare langna in san ol haladaka– Yesus insa owasna kirekam syal gwibir-zimkiye.
³² Yesus kim asa etan dekon golesek gweka, dekam zep hen dowal mo bi gweblan zi ol sremna Yesus onak dep nerhatazak.
³³ Yesus kim dowala insa zebon onakon zeralsa soneka, dekam zep hendep ola tonka. Zi beyam-byana in man tangan denggwanblak, hen man egu gweꞌak, “Nen home mae Israelk awe kirekam de owasna aha-en mae hla kuk.”
³⁴ Hwena Farisikam de gubirida gwen wenya man eguk, “Zen dowal mo kigi sosonna golblaka– dekam de aha dowal-dowalsa golealsa sone gwen hap denaye.”
³⁵ Yesus ki zep langna iwe de tingare e-e san zere hon de ang ta gwen wenya aban mae ziamjanbir song gweka, hen desan de but srem gol-gol san tawa tabir song gweka. Zen Alap Zen de irik gin hip de ol dawemkam tawa tabir song gweka, hen men zen kirekam-kirekam sang-sang karek naban nollwa gwek, desa man kitak dawem tabir song gweka.
³⁶ Yesus kim zi trana insa hlauluda song gweka, Zen man tangan kwasang gwibirida gweka. Sap zen hom eiwa de orana tame daꞌak, hen mes tangan esin-sin gwek– men kiye, bi srem zahona.
³⁷ Dekam zep abe mae en hap ola gulk sun blaonzimki, “Nga yala awe de obwagana mes mamkam bil gwera, hwena men zen de taran hap dena dan en tangan.
³⁸ Zen in zep Nga Bi naka em abe ta gwen– Zen deka zisi nga yala awe de syal ta gwen hap lup gul sone gweka.”