¹ Alap mo Enhona ki zep Yesussu zi srem lang san dep zersong gweka– zewe dikim dowal mo kigi akasiblin hap.
² Yaklana empat-pulu enkam Yesus tembane gwen sremkam zewe gwe gweka. Dekam usakna mes tangan sabak gweka.
³ Hwena dowal mo kigina dekam zep ze gublu zaka, “Em san Alap mo Tanesa hom? – zebe usak naban gweꞌaraye. Kasona ansa emki gublundan– roti hap de ejowen hap.”
⁴ Yesus ki zep hwena ding gulbluka, “Alap mo olak man lwak, ‘Zini tembane en nakon hom lowehe gwenan. Hwena tingare Alap mo ola mensa esane gwe-gwenan, zen dekon hen ki lowehe gwenan.’”
⁵ Dekam zep hwena dowal mo kigina in Yesussu owaskam Yerusalem san dep zersong gweka– ena mensa Alap orep Israelk de zi hip dam tasizimki, zere hap de gol yawalsa de ze taun hup. Zao zep dowal mo kigina in Alap mo gol bolak drene seka.
⁶ Dekon zep etan gubluka, “Em san Alap mo Tanesa hom? – ki emki heya gwe inen. Sap Alap mo olak ebe hap dena anakan lwak, ‘Alap zere mo dam taha nakore zisi sa emsa de dawem enkam kara ta gwen hap gubiridala. Zeno mae mo taha tere san esa tenda gwera, zep em molye ba karek maena goltoweka.’ Zep em san ema Alap mo ola insa taiblibiꞌira? Ki emki heya gwe inen.”
⁷ Yesus ki zep hwena ding gulbluka, “Alap mo olak man hen lwak, ‘Bian Alapsa totoresa bahem anakare hap akasiblin, “Wehe asa mas gweblaꞌanka?”’”
⁸ Hwena etan dekon ki zep Yesussu owaskam kwatap yawal san dep zersong gweka. Dekon zep tingare auhu-kamanak de irik ginni ansa goltreblaka– hendep zewe de kire-kire dawem naban.
⁹ Zao zep etan gubluka, “Insa ki hlauluda, ee asa ebe hap kitak tapbla gulblul– em de hwena bi gwibin hip. Hwena nonol bokle kom soblan naban em asa boltere tan.”
¹⁰ Yesus ki zep jala ban ding gulbluka, “Zi Golliwe Bak, em song gwen! Sap Alap mo olak man lwak, ‘Bian Alap ensa em boklena kom so gweblan, hen Desa en em blikip gwesik gweblan.’”
¹¹ Hendep ki zep dowal mo kigina in Yesussu hli ta guk halka. Hwena Alap mo dam taha nakore zini dekam zep tembanekam mas neblazak.
¹² Yesus kim salka, “Yohanissi mes bwinak se dyaink,” dekam zep Galilea san ahulsuk halka.
¹³ Dekam Zen hom zere mo ena Nazaret gweka. Zen hwena Kapernaumk gwe gweka– Ho Gutuna Galilea mo alpnak, Zebulon ne Naftali nik mo zi ausu mo langnak.
¹⁴ Yesus insa zao gweka, zen Alap mo dwam gwibin sin ki lwak– dekam de Yesaya Bak mo hamal hap de ol ayang gunnuk zaun hup, mensa anakan ayang gulkuke,
¹⁵ “Em in zene Zebulon ne Naftali nik mo ausu nakore zini lowe heꞌan, hen Ho Gutuna Galilea mo ora alp san de wenya, sap weyana Yordan mo men eihyanak de wenya, hendep Yahudi srem zi ausu nakore zini men zen langna Galileak hen lowehe gwenan:
¹⁶ Em in zene angkam kawesinnik lowehe gweꞌan, hwena em esa serkam de ngatan yawalsa hla kul. Em in zene juwen zi mo lang kawesinnik lowehe gwenan, hwena ebon mae onak sa ngatanna yakla nwe de hata sezan makan emsa zilsibirida zala.”
¹⁷ Zep Yesus in kim Kapernaumk gwe gweka, dekam zep ze hendep tawa tabinkim kon gwesibir hanaꞌanka. Man ze gubirida gweka, “Ere mae mo karek-karek nakon em ehalen, sap Alap Zena angkam man kon gwesik hanaꞌara– teipsinkim de nesa irik ginkimye.”
¹⁸ Yesus kim Ho Gutuna Galilea mo alp san gwe haꞌanka, dekam zep ze hogwe tahyo gwen zi darena akeꞌanka. Ahana Simon– men desa hen “Petrus”kum nen gweblanan, oso zem Andreas han. Ho gutunak iwe hogwesa jalakam zertahyoꞌanka.
¹⁹ Yesus ki zep ze guzim zika, “Asa em ang eblan. Ëe asa emsa zisi de hwena lahyo gwen hap tawa sol.”
²⁰ Dekam zep hendep jalana insa hli koso guk halka– Yesussu dikim hwena ang eblan hap.
²¹ Dekon kim deban zisong gweka, dekam zep etan aha zi darena akeꞌanka. Zen hen oso zeban zergweꞌanka. Zen Yakobus ne Yohanis ne– Zebedeus Bak mo walas dare. Zen bi zik zere mo bul tahannak zinikinꞌinka, jalasa ze zioto tasibiꞌinka. Zao zep hen desa kirekam guzim zika.
²² Zen hen zao zep hendep bulu insa hli kulki, hen bi zemka zewe hli laka. Zena dekam zep hen Yesussu ang eblaka.
²³ Yesus dekam zep tingare Galilea mo langnak de e-ena zere hon de ang ta gwen wenya in han ziamjanbir song gweka, hen zewe Yahudi mo but srem gol-gol san tawa tabir song gweka. Zen Alap Zen de irik gin hip de ol dawemkam tawa tabir song gweka, hen kirekam-kirekam zi sang-sangsa dawem tabir song gweka.
²⁴ Galilea kon kim Yesus hup de ola insa tingare Siria mo lang san nol haladak, dekam zep zi beyam-byana kirekam-kirekam sang-sang karek nabare wenya noleyaing gwe-gwezak. Sap dowal mo tilbiridanna, hen etilsin-tilsin wenya, hen taha-tana teisya inen srem wenya, desa kitak noleyaing gwe-gwezak. Hen Yesus dekam zep kitak dawem ta gwibirki.
²⁵ Dekam zini beya tangan nik zep Yesussu ang ne gweblak. Ahakon Galilea korena, ahakon lang bosena Ëna Dare Taha-tap korena, hen ahakon tingare Yerusalem mo lang nakorena, hendep ahakon weyana Yordan mo men eihya nakorena.