Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 He bansa tenaya nangngasseng siri’, angngu’rangiko,
2 lalang tenanapa nukalumeng siagang kalotoro’ rapang bunga! Sadara’ mako lalang tenanapa nabattu allo pangngalarroiNa Batara, siagang tenanapa natujuko anjo pangngalarroi a’rinra-rinraNa.
3 Ammotere’ mako mae ri Batara, he sikontu tau tuna pa’maika ri anne pa’rasanganga, siagang sikontu tau anturukiai parenta-parentaNa. Appanggaukang mako situru’ ero’Na Batara, siagang pakatunai kalennu ri dallekanNa. Inai angngassengi gassingka lata’lappasa’ jako battu ri hukkunganga ri allo Napa’nyatana kalarroanNa Batara.
4 Ri kota Gaza tena manna sitau lanipasalama’. Askelon lasinoi tena bonena. Pandudu’na Asdod lanibongkai lalang pa’bundukang ti’ring battua ri tangngana alloa, siagang pandudu’ Ekron lanisuroi a’lampa battu ri kotana ke’nanga.
5 Nitunrai ngasengko, he tu Filistin, bansa ammantanga ri biring tamparanga. Le’ba’mi Napattantu Batara hukkunganga mae ri kau. LaNapanraki ngasengko, tena manna sitau battu ri kau lakkulle ta’lappasa’.
6 Daeranu ri ampi’na tamparanga la’jari parang rukuki; balla’-balla’ pakalawakia siagang bara-bara gimbalaka lanibangungi anjoreng.
7 Pandudu’na Yehuda akkullea ta’lappasa’ lanaempoi anjo daeranu. Lakkalawaki olo’-olo’ ke’nanga anjoreng ri tampaka, siagang punna bangngi latinroi ke’nanga ri balla’na tu Askelon. Nasaba’ Batara, iamintu Allata’alana ke’nanga, lanjagai pole ke’nanga siagang laNapa’jari ke’nanga akkalumanynyang poleang.
8 Nakana Batara Kaminang Koasaya, "Kulangngere’mi bansa Moab siagang Amon anghinai siagang ancau-caui ummakKu. A’bicara tampoi ke’nanga angkanaya lanarampasaki buttana ummakKu.
9 Lanri iNakke mattallasaka, Allata’alana bansa Israel, laKubarrasaki sa’genna tangkasa’ bansa Moab siagang Amon, sangkamma Sodom siagang Gomora. Anjo pa’rasangang-pa’rasanganga larassi siagang bungung-bungung ce’la kammayatompa loro-loro napattimboia rompo’ sa’genna satunggu-tungguna. Sesanna ummakKu ta’lappasaka lanaellaki pandudu’na, siagang lanaallei buttana ke’nanga."
10 Kammami anjo pandudu’na Moab siagang Amon lanihukkungi lanri katampoanna siagang kaborroanna ke’nanga, kammayatompa lanri le’ba’na nahina umma’Na Batara Kaminang Koasaya.
11 LaNapa’jari Batara malla’ ke’nanga. LaNaancuruki rewata-rewata niaka ri tompo’na buttaya. Nampa sikontu bansaya lanynyombai mae ri Batara, massing ri pa’rasanganna ke’nanga.
12 Kammayatompa pandudu’na Sudan lanihukkung mate tongi ri Batara.
13 Le’baki anjo laNapakemi Batara kakoasanNa untu’ angngancuruki Asyur. Kota Niniwe lanipa’jari sino sikali siagang nipa’jari butta kalotoro’.
14 Anjorengi sikontu rupanna olo’-oloka lattinro siagang ammari-mari. La’ru’mungi kokocika ri anjo bangunang panraka siagang lakkio’-kioki battu ri jandela-jandelaya. Jangang-jangang kalaaka lakkao’-kaoki ri dallekang ballaka. Sikamma kayu camaraya ri bangunang-bangunanna anjo kotaya lala’busuki nialle.
15 Iaminjo lakajarianga mae ri anjo kota ma’reja-rejaya siagang nakanaya kalenna amang siagang sannang. Pandudu’na nakapangi angkanaya anjo kotana ke’nanga kaminang lompo ri linoa. Teai sipato’ sinona anjo daeraya, tena sikali bonena pantaranganna olo’-olo’ ri romang a’ru’munga anjoreng! Sikamma tau niaka allalo anjoreng ri kotaya la’jari ta’bangka kabusuki siagang la’jari mallaki nakasia’.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA