Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 O bangsa si la meteh mela, rukurlah kam
2 ope denga kam ikabangken bagi segal, ope denga pernembeh ate TUHAN si gara reh ku kam, ope denga seh warina Ia ncidahkenna RawaNa.
3 Mulihlah kempak TUHAN o kam kerina si meteruk rukur i bas negeri enda, si ngikutken PerentahNa. Lakokenlah kai si benar, janah peteruk bandu i adep-adepen TUHAN. Mbera-mbera pulah kam i bas ukumen nari tupung warina TUHAN ncidahken pernembeh AteNa.
4 La lit sekalak pe pagi tading i Gasa. Askelon jadi melungen. Kalak si ringan i Asdot ipelawes ope ciger wari, janah kalak Ekron ipelawes i kotana nari.
5 Cilaka me kam, o kalak Pilisti, o kam kalak si ringan segedang-gedang tepi lawit. TUHAN nggo ndabuhken ukumen man bandu. IkernepkenNa me kam, janah la lit sekalak pe kam si tading.
6 Tanehndu si i tepi lawit salih pagi jadi mbalmbal man ingan sapo-sapo permakan ras karang biri-biri.
7 Kalak Juda si tading engkuasai tanehndu. Ipermakanina pagi rarasenna i je janah medem i bas rumah Askelon. Sabap TUHAN Dibatana kap ras ia dingen IbahanNa maka senang ka akapna mulihi.
8 Nina TUHAN si Mada Kuasa, "Nggo Kubegi kalak Moap ras Amon megombang ras naling-naling bangsangKu. Alu cakap meganjang ikatakenna maka irampasna me tanehna.
9 Asa tuhu Aku Dibata si nggeluh nu Israel, ersumpah Aku maka Moap ras Amon nandangi ikernepken bali ras Sodom ras Gomora. Nandangi salih me ingan si dua e jadi embang sira ras kerontasen dingen rambahen ibahan dukut. BangsangKu si tading ngerampasi dingen muat tanehna."
10 Bage me bangsa Moap ras Amon iukum, erkite-kiteken kiniganjangen ukurna dingen megombang ia man bangsa TUHAN si Mada Kuasa,
11 Gentar me ia ibahan TUHAN. IkerikenNa me kerina dibata-dibata si i doni enda, janah kenca bage tep-tep bangsa nembah me man BaNa, sada-sadai i bas negerina jine.
12 Bangsa Sudan pe ibunuh TUHAN.
13 Ikernepken TUHAN me Ashur alu KuasaNa. Kota Niniwe IbahanNa jadi runtuhen si terulang, gurun si la erlau.
14 I je pagi gempang rarasen asuh-asuhen ras kerina erbage rubia-rubia si deban. Kalingkupa ringan i bas runtuhenna dingen ersora-sora i bas jendelana nari, bage pe kak erkak-koang i bas tanggana. Kayu ingul si ipake jadi perkayun rumahna kerina ibongkar.
15 Eme si nandangi jadi man kota si megah kal akapna kerna gegehna dingen la lit kai pe iakapna si man kebiarenna. Kalak si ringan i je erpengakap maka kotana kota si megahna i belang-belang doni enda. Andiko, uga lungenna pagi ingan e jadina, i ja rubia-rubia si meliar ringan. Kasa kalak si mentas arah e ndegeri mbuluna jenari itadingkenna perban biarna.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA