Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Zefanya iamintu ana’na Kusyi. Pa’lo’lorang passibijanna battu rawa sa’genna nai’ iamintu: Kusyi, Gedalya, Amazia, siagang Karaeng Hizkia. Iaminne pasanNa Batara mae ri Zefanya, ri wattu Karaeng Yosia ana’na Amon ammarenta ri Yehuda.
2 Nakana Batara, "LaKuputtai sikontu-kontuna apa niaka ri tompo’na buttaya:
3 sikontu rupataua siagang olo’-oloka kammayatompa jangang-janganga siagang juku’-jukuka. Tau ja’dalaka laKupaccappuki. Sikontu rupataua laKupanraki. Manna sitau tania’ laKukellai attallasa’. INakke, Batara, anne akkana.
4 LaKuhukkungi pandudu’na Yerusalem siagang sikontu Yehuda. Sesa-sesa panynyombanga mae ri Rewata Baal laKupa’lanynyaki battu ri anjo tampa’-tampaka. Imang-imang allayania mae ri Rewata Baal lanikaluppai taba sikali ngasengi.
5 LaKubarrasaki sa’genna tangkasa’ inai-nai mamo naika ri pattongko’na ballaka untu’ anynyomba ri matanna alloa, bulanga siagang sikamma bintoenga. LaKupa’lanynya’ tongi ke’nanga anynyombaya mae ri Nakke siagang assumpaya lamajarre’ mae ri Nakke, mingka assumpa tongi lanri arenna Rewata Milkom.
6 LaKupanraki ke’nanga tau tenaya nabattu mae ri Nakke yareka tenaya naero’ Kururungang kammayatompa ma’bokoa mae ri Nakke siagang tenayamo naero’ amminawang mae ri Nakke."
7 A’reppese’mi allonNa Batara; anjo alloa langngallemi tindakang Allata’ala. Lanri kammana anjo a’mereki mako ri dallekanNa. Sadia-sadiami Batara untu’ ambunoi umma’Na rapang koro’bang lanipassareang siagang le’ba’mi Nakio’ battu musu-musunna Yehuda. Nakana Batara,
8 "Ri anjo allo pammunoanga, laKuhukkungi sikamma tumalompoa, sikamma ana’ bura’nena karaenga, siagang sikontu tau anturukiai cara-cara katallassanna bansa maraenga.
9 LaKuhukkungi sikontu tau anggaukangai ibadaya sangkamma tau tenaya natappa’ mae ri Nakke, siagang tau a’lukkaka kammayatompa tau ammunoa untu’ ampirassi balla’na pinggawana ke’nanga siagang barang-barang nirampasa’."
10 Nakana Batara, "Ri anjo alloa lania’ kalangngerang sa’ra karru’ ri Pakke’bu’ Lompo Juku’. Sa’ra piraung lakalangngerang battu ri kampong berua, siagang sa’ra runtung heba’ lammarrung battu ri bulu’-buluka.
11 Appiraungko siagang angngarru’ mako ri wattu nulangngere’na anjo sa’ra kammaya, he pandudu’ kota bageang irawaya, nasaba’ sikontu padangganga siagang tau appappinranga doe’ le’ba’ kabusu’mi nibuno!
12 Anjo wattua langngalleA’ sulo, na Kuparessa kota Yerusalem. LaKuhukkungi pandudu’na tamanjampangia siagang nakanaya ganna’mi ri kalenna, siagang appikkirika angkanaya iNakke anne, Batara, tale’baKa’ angngalle tindakang kamma anne yareka kamma anjo.
13 Lanirampasaki barang-baranna ke’nanga siagang laniancuruki sikamma balla’na. Lambangungi ke’nanga balla’, mingka takkulleai napammantangngi. Lappareki ke’nanga koko anggoro’ mingka takkulleai nainung je’ne’ anggoro’na."
14 A’reppese’mi allo pangadelanNa Batara; iyo, sanna’mi a’reppese’na, ba’lalo labattumi silalonna. Anjo alloa sangnging kapacceang, sa’genna manna tantara kaminang barania lammarrang-marrang todong lanri tappu’ panrannuanna!
15 Anjo alloa iamintu allo pangngalarroi, kasukkarang siagang kasusaang, allo karuntungang siagang pangngancurang, allo sassang siagang anremeng, allo makkapu’ siagang rassi saliu’.
16 Tuntunna anjo alloa assa’rai tarompeka siagang pakkio’ bunduka battu ri pejuang-pejuang ambundukiai kota-kota niaka pattahanganna siagang menara-menara tinggina.
17 Nakana Batara, "LappabattuA’ jai bala mae ri umma’ rupataua, sa’genna langngosala’ mami ke’nanga rapang tau buta. Dorakami ke’nanga mae ri Nakke, siagang kamma-kamma anne tatumpami cera’na ke’nanga rapang je’ne’, siagang maya’-maya’na ke’nanga a’jari botto’mi ri tompo’na buttaya."
18 Ri anjo wattu allo hebaka, laNapa’nyatai larroNa Batara, na sikontu bulaenna siagang pera’na ke’nanga takkulleai ampasalamaki kalenna ke’nanga. Sikontu buttaya laancuruki assolong, nitunu ri pepe’ kalarroanNa. Ti’ring laNabi’buki sikontu nyawa niaka ri tompo’na anne buttaya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA