Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 PANGERAN Se Mahakobasa apareng pessen reya ka sengko’,
2 "Sengko’ ce’ terrona se nolonga Yerusalim polana Sengko’ ce’ taresnana ka pandhudhu’na, ban polana kataresna’an jareya Tang ate daddi panas ka so-mosona kottha jareya.
3 Sengko’ abaliya ka Yerusalim, kottha se socce jareya, sarta ennengnga e jadhiya. Yerusalim bakal daddiya kottha se esto e matana oreng, ban Gumo’na PANGERAN Se Mahakobasa bakal esebbuda Gumo’ Se Socce.
4 E lon-alonna kottha Yerusalim bakal toju’a pole lalake’an ban babine’an se seppo, ce’ seppona sampe’ kodu atongkeddan mon ajalan.
5 Lan-jalan e kottha bakal possa’a pole ban na’-kana’ se aen-maenan.
6 Parkara jareya olle daddi katonna mohal monggu ka reng-oreng se gi’ odhi’ dhari bangsa jareya, tape ka Sengko’ tadha’ mohalla.
7 Sengko’ masalamedda Tang ommat dhari ra-nagara kennengnganna pambuwanganna reng-oreng jareya,
8 ban mabaliya reng-oreng jareya dhari temor ban dhari bara’, sampe’ kabbi padha abali enneng e Yerusalim pole. Reng-oreng jareya bakal daddiya Tang ommat, ban Sengko’ daddiya Allahna. Sengko’ marenta’a bangsa jareya kalaban esto tor adil."
9 PANGERAN adhabu ka ommadda, "Pakowat atena ba’na! Sateya ba’na ngedhing ca’-oca’ se la ekoca’agi para nabbi e bakto masang dhasar kaangguy majaga pole Tang Padalemman.
10 Sabellunna bakto jareya tadha’ se kellar majar manossa otabana keban, ban tadha’ se arassa aman dhari gangguwanna moso. Oreng se settong bi’ Sengko’ eaddu ban laenna.
11 Tape sateya reng-oreng se gi’ odhi’ dhari bangsa reya bi’ Sengko’ ta’ epakantha gi’ lamba’na.
12 Reng-oreng jareya bakal taremtemma nabur ne-bine. Ka-bungkana anggurra bakal abuwa’a, tanana bakal aberri’a hasel, ban ojan bakal bannya’a. Sakabbinna berkat jareya bi’ Sengko’ ebagiya ka reng-oreng se gi’ odhi’ dhari bangsa reya.
13 He pandhudhu’ Yehuda ban Isra’il! Gi’ jaman lamba’, mon reng-oreng manca saleng basto, reng-oreng jareya ngoca’ kantha reya, ‘Moga balai se teba ka Yehuda ban Isra’il teba’a ka ba’na keya!’ Tape bi’ Sengko’ ba’na epasalamedda, sampe’ reng-oreng manca jareya bakal padha’a ngoca’ kantha reya, ‘Moga berkat se toron ka Yehuda ban Isra’il, torona ka ba’na keya!’ Daddi, mara pakowat atena ba’na ban ja’ tako’!"
14 PANGERAN Se Mahakobasa adhabu, "E bakto bangatowana ba’na mapeggel Sengko’, Sengko’ motossagi ngokoma reng-oreng jareya epaberra’a. Potosan jareya bi’ Sengko’ ta’ eoba, tape ejalannagi.
15 Tape sateya Sengko’ aberkadana pandhudhu’ Yerusalim ban pandhudhu’ Yehuda. Daddi, ella, ja’ tako’.
16 Reya’ ta-parenta se kodu elakone ba’na: Mon acaca, kacaca barang se bendher ka sasamana. Mon motose pangadilan berri’ potosan se adil ban se madhateng kataremtemman.
17 Ja’ andhi’ sajja se jahat ka sasamana. Ja’ asompa palsu. Sengko’ baji’ ka caca lecek ban sabarang se ta’ adil sarta kakerrasan."
18 PANGERAN Se Mahakobasa apareng pessen reya ka sengko’, se epakon panapa’ ka ommadda,
19 "Powasa se elakone e bulan se kapeng empa’, kapeng lema’, kapeng petto’ ban kapeng sapolo bakal daddiya paraya’an-paraya’an se madhateng kaperagan ban kasennengngan ka pandhudhu’ Yehuda. Kaleburi barang se bendher ban kataremtemman!"
20 PANGERAN Se Mahakobasa adhabu, "Bakal napa’a baktona oreng dhari tha-kottha sabannya’na dhatengnga ka Yerusalim.
21 Pandhudhu’na kottha se settong bakal ngoca’a ka pandhudhu’na kottha laenna, ‘Mara ja’ entara nyemba PANGERAN Se Mahakobasa sarta nyo’on berkadda. Mara noro’!’
22 Pas bannya’ oreng ban bannya’ bangsa se kowat bakal dhatengnga ka Yerusalim nyemba’a Sengko’ PANGERAN Se Mahakobasa sarta menta’a Tang berkat.
23 E re-are jareya bakal badha’a oreng manca se entar ka settong oreng Yahudi sarta pas ngoca’, ‘Kaula padha terro ontonga jugan akadi sampeyan, sabab kaula padha mereng ja’ Allah aberkadi sampeyan.’" PANGERAN Se Mahakobasa la adhabu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA