Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nia’ pole paccini’ maraeng kugappa. Kamma-kamma anne nia’ kucini’ appa’ kareta pa’bundukang assulu’ battu ri alla’na ruaya moncong tambaga.
2 Anjo sikammaya kareta massing nibesoki ri ayoka jarang; makase’rea jarang eja, makaruaya jarang le’leng,
3 makatallua jarang kebo’ siagang makaappaka jarang balo.
4 Akkuta’nanga’ mae ri anjo malaekaka angkana, "Apa battuanna anne sikammaya kareta pa’bundukanga Karaeng?"
5 Appialimi angkana, "A’lampai ke’nanga mae ri appaka oloang ri wattu le’ba’na ke’nanga andallekang mae ri Batarana sikontu linoa.
6 Kareta pa’bundukang nibesoka ri jarang le’lenga a’lampa mangei Babel ri bageang wara’. Jarang keboka a’lampa kalauki siagang jarang baloa a’lampa mangei ri pa’rasangang niaka ri bageang timboro’."
7 Ri wattunna assulu’ anjo jarang baloa, tenamo nasa’bara’ ke’nanga napakamma ero’ a’lampa untu’ amparessai linoa. Nakana anjo malaekaka, "A’lampamako untu’ amparessai linoa!" Nampa a’lampamo ke’nanga.
8 Nampa akkio’ anjo malaekaka mae ri nakke angkana, "Anjo jarang a’lampaya mange ri Babel napanaummi larroNa Batara."
9 Napassareangi Batara anne pasanga mae ri nakke.
10 Nakana, "Allei passare napassareanga Heldai, Tobia siagang Yedaya, iamintu sikamma tau beru ammotereka battu ri tampa’ pammelakkanga ri Babel. Erangi linta’ anjo passarena ke’nanga mange ri balla’na Yosia ana’na Zefanya.
11 Anjo bulaeng siagang pera’ napassareanga ke’nanga, pareki se’re songko’ kalompoang siagang patabai mae ri ulunna Imang Malompo Yosua ana’na Yozadak.
12 Pauangi angkanaya iNakke Batara Kaminang Koasaya angkana, ‘Tau niarenga I Cu’la’, la’jari apa napattujuanga ri tampa’ napammantangia siagang ia lambangungi ammotere’ Balla’Na Batara.
13 Ia lambangungi BallakKu siagang lannarimai kala’birang sangkamma se’rea karaeng, siagang ia lammarenta mae ri ra’ya’na. Nia’ sitau imang lanrurungangi siagang lasamaturuki ke’nanga siagang siamaki ke’nanga lalang ri jama-jamanna.’
14 Anjo songko’ kalompoanga niboliki ri BallakKu untu’ ampakaingaki Heldai, Tobia, Yedaya, siagang Yosia.
15 Labattui tau battua ri tampa’ bellaya siagang nabantui ke’nanga ambangungi BallakKu. Punna le’ba’ anjo pambangunanga, lanaassemmi ke’nanga angkana iNakke Batara Kaminang Koasaya le’ba’ assuroko battu mae ri ke’nanga. Sikontu anjo kammaya lakajariang ngasengi punna naturuki tojeng-tojeng ke’nanga sikamma parentaKu, Karaeng Allata’alana ke’nanga."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA