Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mon la mosem semme, nyo’on ojan ka PANGERAN. PANGERAN tanto pas makompol ondhem, ban matoron ojan derres sampe’ gal-teggal daddi ngabiru ban cengngar kaangguy sakabbinna oreng.

² Reng-oreng menta petodu ka la-brahala ban ka kang-tokang ramal, tape jawaban se ekaolle lecek kabbi. Badha se nerrangngagi mempe, tape katerranganna pera’ maposang ba’na, ban panglepor se esadhiya’agi tadha’ artena. Daddi ra’yat asalebbudan akantha dumba, padha repot polana ta’ andhi’ pamimpin.

³ PANGERAN adhabu, "Sengko’ ce’ peggella ka pangobasa se marenta Tang ommat, bi’ Sengko’ reng-oreng jareya eokoma. Tape pandhudhu’ Yehuda reya Tang andhi’, ban Sengko’, PANGERAN Se Mahakobasa meyara’a reng-oreng jareya. Reng-oreng jareya bi’ Sengko’ ekagabaya Tang jaran paperrangan se parjuga.

⁴ Dhari antarana reng-oreng jareya Sengko’ meleya pangobasa, pamimpin ban panglima se marenta’a Tang ommat.

⁵ Pandhudhu’ Yehuda bakal mennanga akantha rit-parjurit se nyek-ngenyek moso epakantha cellot e lorong. Reng-oreng jareya bakal aperranga polana Sengko’, PANGERAN, abanto reng-oreng jareya, ban pasukanna moso se nompa’ jaran bakal epakala’a keya bi’ reng-oreng jareya."

⁶ "Pandhudhu’ Yehuda bi’ Sengko’ epakowada, ommat Isra’il epasalamedda. Bi’ Sengko’ egiba’a abali ka nagarana, polana Sengko’ neser ka reng-oreng jareya. Bi’ Sengko’ reng-oreng jareya epakantha’a bangsa se bi’ Sengko’ ta’ tao etolak. Sengko’ reya PANGERAN, Allahna bangsa jareya, Sengko’ nyaodana sakabbinna du’ana.

⁷ Ommat Isra’il bakal akantha pahlawan se kowat, akantha oreng se ngenom anggur, gumbira atena. Toronanna dhari jaman ka jaman bakal terrosa enga’ ka kamennangan se eberri’i Sengko’ reya. Reng-oreng jareya bakal peraga atena, lantaran se la elakone Sengko’ kaangguy aba’na.

⁸ Tang ommat bi’ Sengko’ eologa, epadaddiya settong epakompola. Bi’ Sengko’ padha epabebasa, epabannya’a akantha lamba’.

⁹ Maske bi’ Sengko’ epabalessadan e antarana sa-bangsa, reng-oreng jareya bakal pagguna enga’ ka Sengko’ e dhimma’a bai kennengnganna. Reng-oreng jareya bakal salamedda, bariya keya na’-ana’na, ban padha moleya areng-bareng ka nagarana.

¹⁰ Dhari Messer ban Asyur reng-oreng jareya bi’ Sengko’ epamoleya. Epangennengngana e nagarana dibi’. Bi’ Sengko’ egiba’a ka Libanon ban Gileyad, sampe’ saantero nagara possa’ ban reng-oreng jareya.

¹¹ Mon reng-oreng jareya la entas dhari tase’ raja kamalaradan, Sengko’, PANGERAN, mokola ba’-omba’, sampe’ dhasarra Songay Nil kerreng asat aengnga. Bangsa Asyur se sombong bi’ Sengko’ eparendha’a ban Messer se parjuga epaelanga kakobasa’anna.

¹² Tang ommat bi’ Sengko’ epakowada, reng-oreng jareya bakal ta’ada ban abakte ka Sengko’. Sengko’, PANGERAN, la ngoca’."

Zakharia

Video Zakharia 10

Ikuti Kami:

KONTAK | PARTISIPASI | DONASI