Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 PANGERAN la apareng larangan ka ommat Isra’il ja’ dhari sabarang se kodu epamosna e kottha Yerikho ta’ olle badha se ekala’. Tape papakon jareya ta’ etoro’. Badha oreng lalake’ nyamana Akhan, se ta’ ngestowagi papakon jareya, daddi PANGERAN talebat dukana ka ommat Isra’il. (Eppa’na Akhan anyama Karmi ban agungnga anyama Zabdi dhari kaom Zerah e dhalem suku Yehuda.)
2 E bakto jareya Yusak ngotos reng-oreng dhari Yerikho ka Ai, iya areya settong kottha e temoranna Betel, e seddi’anna Bet-Awen. Reng-oreng jareya epakon entar nalektegi dhaera jareya. Saellana mare ajalannagi tugas jareya,
3 reng-oreng jareya abali, laju nyareta’agi ka Yusak hasella se nalektegi, atorra, "Ampon, ta’ parlo entar nyerrang kottha Ai. Kerem saos ra-kera dhu ebu otaba tello ebu oreng. Ja’ mamangkat sadajana tantara kaangguy aperrang ka ka’dhissa’, sabab kottha ka’dhissa’ namong ne’-kene’."
4 Daddi se entar nyerrang kottha jareya pera’ tello ebu oreng, tape oreng se tello ebu jareya ta’ kellar daddi padha nyorot.
5 Bi’ reng-oreng Ai eserser dhari labangnga pagarra kottha Ai sampe’ ka dhaera partambangan, e erengnga gumo’ reng-oreng Isra’il jareya epate’e, bannya’na ra-kera tello polo ennem oreng. Reng-oreng Isra’il pas padha tako’.
6 Yusak ban para pamimpinna ommat Isra’il talebat sossana, laju padha nyebbit rasoganna, pas asojud saare benteng sampe’ malem e adha’anna Petthe Parjanjiyan, serana padha eburburi abu menangka tandhana kasossa’anna.
7 Serrona Yusak ka PANGERAN, "Adhu, Guste ALLAH Pangeran kaula! Aponapa’a Junandalem me’ abakta bangsa abdina ka bara’na Songay Yordan? Ponapa parlo marengngagiya abdidalem sadaja ka reng-oreng Amori? Ma’ olle padha mate sadaja? Langkong sae abdidalem sadaja paggun neng e temorra Songay Yordan saos!
8 Adhu, Guste, bangsa abdidalem epakala sareng moso kantos padha nyorot. Samangken matora ponapa pole abdidalem ka’dhinto?
9 Oreng Kana’an sareng sadajana oreng laen e dhaera ka’dhinto tanto padha mereng parkara ka’dhinto. Tanto abdidalem sadaja pas ekeppong sareng padha epate’e sadaja! Manabi sapaneka ponapa se elampa’agiya Junandalem kaangguy ajaga kahormadannepon Junandalem?"
10 Dhabuna PANGERAN, "Mara jaga! Tadha’ gunana ba’na asojud kantha jareya e tana!
11 Oreng Isra’il la agabay dusa. Sengko’ la marenta’agi sopaja reng-oreng Isra’il padha’a ngestowagi parjanjiyanna ban Sengko’, tape reng-oreng jareya ta’ neptebbi parjanjiyan jareya! Rang-barang se kodu epamosna ekala’. Rang-barang jareya badha se ekeco’, eerrep epapolong ban rang-barangnga dibi’ sopaja ta’ etemmowa oreng.
12 Jareya sababba arapa bangsa Isra’il jareya me’ ta’ kowat ngadhebbi moso. Epakala bi’ moso sampe’ padha nyorot sabab reng-oreng jareya dibi’ la ekenneng okoman epatompessa. Sengko’ ta’ abarengngana bangsa reya pole, mon rang-barang se ta’ olle ekala’ jareya gi’ ta’ epamosna.
13 Sateya mara jaga, Yusak! Socce’e saneyap oreng Isra’il, pas soro asadhiya se ngadhebba Sengko’. Parenta’agi sopaja lagguna padha asadhiya, sabab Sengko’, GUSTE Allahna Isra’il bakal ngoca’agiya parkara reya ka bangsa jareya, ‘He, reng-oreng Isra’il! Rang-barang se bi’ Sengko’ esoro pamosna ka ba’na rowa, sabagiyan ekala’ ba’na. Sabellunna ba’na mowang rang-barang jareya, ba’na ta’ kera kowat ngadhebbi moso!’
14 Daddi, Yusak, kabala ka reng-oreng jareya ja’ lagguna gu-laggu reng-oreng jareya padha epareksa’a kabbi egilir sabban suku. Mon Sengko’ noddu’ settong suku, saneyap kaom e dhalem suku jareya kodu maju gan sakaom. Ban mon Sengko’ noddu’ settong kaom, saneyap kalowarga e dhalem kaom jareya kodu maju gan sakalowarga. Saellana jareya, mon Sengko’ noddu’ settong kalowarga, saneyap oreng e dhalem kalowarga jareya kodu maju gan settong.
15 Oreng se etemmo ngerrep rang-barang se elarang kodu eobbar epatadha’ ban la-balana sarta dhi’-andhi’na kabbi, sabab oreng jareya se ta’ neptebbi parjanjiyan ban ngalakone kajahadan raja e nga’-tengnga’anna bangsa Isra’il."
16 Kalagguwanna gi’ petteng, Yusak makon ommat Isra’il maju ka adha’, gan sasuku, se ekenneng suku Yehuda.
17 Saellana jareya Yusak makon suku Yehuda maju gan sakaom, se ekenneng kaom Zerah. Kaom Zerah pas esoro maju gan sakalowarga, se ekenneng kalowargana Zabdi.
18 Saellana jareya Yusak makon kalowargana Zabdi maju gan kasorang; se ekenneng Akhan, ana’na Karmi, kompoyya Zabdi.
19 Dhabuna Yusak ka Akhan, "Na’, mara ngako e ajunanna PANGERAN, Allahna Isra’il, apa se la elakone ba’na. Mara kabala ka sengko’, ja’ leng-ngaleng."
20 "Lerres," ca’na Akhan, "abdina dusa ka PANGERAN, Allahna Isra’il. Dusa abdina sapaneka:
21 E antarana rang-barang se erebbu’ bangsa Isra’il, abdina nengale badha juba settong se ce’ bagussa, badhiyan Babilonia, jugan salaka ra-kera dhu kilo, sareng emmas lantagan se berra’na langkong dhari satengnga kilo. Abdina ce’ terrona se ngaandhi’a rang-barang gapaneka, daddi sareng abdina ekala’, laju eerrep e dhalem tana e kemah abdina; salakana esaba’ e ba-baba."
22 Yusak laju duliyan ngotos oreng ka kemahna Akhan. Bendher onggu rang-barang larangan jareya badha e jadhiya kabbi, ban salakana badha e ba-baba kadibi’.
23 Rang-barang jareya bi’ otosan gella’ ekala’ laju egiba ka Yusak ban ka sakabbinna reng-oreng Isra’il. Rang-barang jareya laju esaba’ e ajunanna PANGERAN.
24 Saellana jareya Yusak ban sakabbinna ommat Isra’il laju nangkep Akhan, egiba ka Cora Kasossa’an epabareng ban sakabbinna ana’na, sapena, hemarra, dumbana, kemahna, ban sakabbinna dhi’-andhi’na, sarta salaka, juba ban emmas keco’anna.
25 Dhabuna Yusak ka Akhan, "Arapa ba’na me’ madhateng kasossa’an ka bangsana? Sateya PANGERAN bakal madhatengnga kasossa’an ka ba’na!" Daddi bi’ reng-oreng Isra’il Akhan sabala laju egarujuk ban bato sampe’ mate. Dhi’-andhi’na ban rang-barang keco’anna eobbar epatadha’.
26 Saellana jareya kennengngan buru etombugi bato ce’ bannya’na, se sampe’ are teya gi’ badha e jadhiya. Jareya sababba kennengngan jareya gi’ enyamae Cora Kasossa’an. Saellana jareya PANGERAN pas ta’ duka pole.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA