Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Pedah TUHAN man Israel maka ula muat kai pe i Jeriho nari si arus ihancurken la ipatuhi. Lit sekalak dilaki Akan gelarna, la ipatuhina perentah e. Emaka nembeh kal ate TUHAN man bangsa Israel. (Akan eme anak Karmi ntah pe kempu Sabdi, janah bungket ku bas terpuk Sera, sada bagin i bas suku Juda.)
2 Isuruh Josua piga-piga kalak i Jeriho nari ku Ai, kota arah Timur Betel, deher Bet-Awen, alu perentah gelah iselidikina taneh e. Kenca nggo iselidikina,
3 ilaporkenna mulihken man Josua nina, "La perlu kerina kita merangi Ai. Suruh saja kira-kira dua ntah telu ribu kalak. Ula suruh kerina tentera e ku jah erperang; labo mbelin kota e."
4 Emaka kira-kira telu ribu kalak Israel erbahan serangen ku kota e, tapi ia ipaksa mundur.
5 Iayak-ayak kalak Ai ia i pintu gerbang kota e nari seh ku Sebarim janah ibunuhina kalak Israel kira-kira telu pulu enem kalak i bas dalin ngincuah uruk e. Emaka nggo bene kal ukur bangsa Israel janah mbiar pe ia.
6 Icaingken Josua ras peminpin-peminpin Israel uisna erkite-kiteken lesek atena, idampeskenna bana ku taneh i lebe-lebe Peti Perpadanen TUHAN, janah ampar ia i je seh berngi. Icaburkenna abu ku takalna nuduhken atena ceda.
7 Jenari nina Josua, "TUHAN Dibata! Ngkai maka IbabaNdu kami ngepari Jordan? Gelah mereken kami man kalak Amori? Gelah kami kernep kerina? Ngkai maka kami la tading arah lepar Jordan ah saja?
8 Uga narilah ningku, o TUHAN, adi genduari Israel nggo mundur ibahan musuh?
9 Kalak Kanaan ras kalak si deban i daerah enda tentu megi kerna si e. Nandangi ikepungna me kami, jenari ibunuhna kami sekalak-sekalak! Janah kenca si e kai nari me IbahanNdu njaga KemulianNdu?"
10 Nina TUHAN man Josua, "Kekelah! Ngkai maka kam ampar i babo taneh bagenda?
11 Israel nggo erdosa! Nggo ilanggarna padanna ras Aku si Kusuruh gelah itepatina. Nggo ibuatna piga-piga barang si aturenna ikernepken. Itangkona barang e, erbual ia kerna si e, jenari itamakenna ras barang-barangna jine.
12 Enda me sabapna maka bangsa Israel la ngasup ngelawan musuhna. Mundur ia i bas musuhna nari sabap genduari ia jine arus ikernepken! Lanai Aku nggit tading ras kam, pala ikernepkenndu kin barang-barang si nggo Kuperentahken la banci ibuatndu!
13 Kekekenlah! Bersihken lah bangsa jenari suruh ia kerina ersikap ngadap Aku. Kataken man bana kerina maka pagi nggo ia sikap, sabap Aku, TUHAN Dibata bangsa Israel, ngerana ateKu man bana bagenda, 'O Israel, ibunikenndu ras sikerajangenndu piga-piga barang si Kusuruh gelah ikernepken! La kam ngasup ngelawan musuh-musuhndu adi la iambekkenndu barang-barang e!'
14 Emaka kataken man bana kerina maka pagi erpagi-pagi ibaba ia ngadap rikutken sukuna sada-sadai. Suku si Kutuduh arus reh ngadap rikutken terpukna sada-sadai. Terpuk si Kutuduh arus reh ngadap rikutken keluargana sada-sadai. Keluarga si Kupilih arus reh ngadap sekalak-sekalak.
15 Kalak si Kutuduh janah terdat i bas ia barang si terlarang e, la banci la itutung radu ras keluargana ras asa kai ertana, sabap perbahanna maka mela kal iakap Israel, janah nggo ilanggarna padanKu."
16 Pepagina lampas, ibaba Josua bangsa Israel ngadap, rikutken suku-sukuna, jenari ituduh me suku Juda.
17 Ibabana suku Juda ngadap, rikutken terpuk-terpukna, jenari ituduh me terpuk Sera. Kenca bage ibabana terpuk Sera ngadap, rikutken keluargana, jenari ituduh me keluarga Sabdi.
18 Emaka ibabana me keluarga Sabdi ngadap sekalak-sekalak, jenari ituduh me Akan anak Karmi kempu Sabdi.
19 Nina Josua man bana, "Anakku, katakenlah situhuna i jenda i lebe-lebe TUHAN Dibata Israel, jenari ngakulah. Katakenlah genduari man bangku kai si nggo ibahanndu. Ula cubaken kam munikenca i bas aku nari."
20 "Payo nge," nina erjabap, "Aku nggo erdosa man TUHAN, Dibata Israel, janah enda me kai si kulakoken.
21 I bas barang-barang si irampas kami kuidah sada jubah Babilon si mejile, kira-kira dua kilo pirak, ras sada batang emas beratna lebih setengah kilo. Seh kal ateku menggana ngidahsa, emaka kubuat. Genduari nggo itanem i teruh taneh i bas kemahku, pirak itamaken arah teruh. Banci inenndu."
22 Emaka isuruh Josua piga-piga kalak, minter kiam ku bas kemah e, jenari ijumpaina barang-barang si terlarang e tuhu itanemken i je, janah pirak arah teruh.
23 Ibuatna barang-barang e i bas kemah e nari, jenari ibabana man Josua ras kerina kalak Israel, janah iamparkenna i lebe-lebe TUHAN.
24 Josua, radu ras kerina bangsa Israel minter nangkap Akan, pirak, jubah, ras emas batangen ndai, bage pe ras anak-anakna si dilaki ras diberu, lembuna, kaledena, ras biri-birina, kemahna, ras kerina barang-barang si deban, jenari ibabana e kerina ku Baluren Kesusahen.
25 Jenari nina Josua, "Ngkai maka ibahanndu kesusahen e man kami? Genduari TUHAN maba kesusahen man bandu!" Emaka kenca e kerina bangsa e menteri Akan alu batu seh mate. Keluargana ras kerina erta-ertana pe ibenterina jenari icilukna.
26 Ipegun-gunna batu mbue i babona, si lit denga i je seh wari si sendah. Em sabapna maka ingan e igelari denga Baluren Kesusahen. Kenca si e TUHAN lanai merawa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA