Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kenca ikuasaina negeri e, kerina perpulungen Israel pulung i Silo, jenari ipasangna Kemah Perjumpan ras TUHAN.
2 Lit denga pitu suku i bas bangsa Israel si langa itetapken baginna i bas taneh e.
3 Emaka ikataken Josua man bangsa Israel nina, "Asa kai nari dekahna itimaindu maka kam lawes muat taneh si nggo ibereken TUHAN, Dibata nini-ninindu, man bandu?
4 Berekenlah man bangku telu kalak i bas tep-tep suku nari. Ateku nuruh ia niari negeri e kerina guna erbahan peta daerah si mesikel ia muatsa jadi sikerajangenna. Kenca bage arus ia mulih ndahi aku.
5 Taneh e ibagiken pagi jadi pitu bagin; suku Juda ringan i bas daerahna i Selatan, janah suku Jusup i bas daerahna i Utara.
6 Suratkenlah keadan taneh si pitu bagin e jenari endesken man bangku. Kenca e kubahan pagi tikam tanduk guna meteh sura-sura TUHAN Dibatanta man bandu.
7 Tapi kalak Lewi, la dat bagin i bas taneh e bagi kam kerina sabap baginna eme kap ndahiken dahin selaku imam TUHAN, sedangken suku Gat, Ruben, ras Manase Timur nggo ngaloken taneh na arah Timur Jordan, si nggo ibereken Musa, suruh-suruhen TUHAN, man bana."
8 Jenari lawes me kalak ndai erbahan peta taneh e kenca nggo ibereken Josua man bana perentah-perentah enda, "Siari kerina taneh e, bahan petana, jenari mulihken kam ndahi aku. Janah kenca si e i Silo enda kusungkuni pagi sura-sura TUHAN man bandu alu erbahan tikam tanduk."
9 Emaka lawes me kalak ndai niari kerina taneh e janah isuratkenna me uga cara magisa jadi pitu bagin, alu erbahan daftar kerina kuta-kuta. Kenca bage mulihken ia ndahi Josua i bas ingan erkemah i Silo.
10 Ibahan Josua tikam tanduk guna nungkun sura-sura TUHAN jenari man tep-tep suku Israel si tading denga, itetapkenna sada bagin si tertentu i bas taneh e.
11 Si pemena kal itetapken eme daerah si jadi sikerajangen keluarga i suku Benyamin. Cibal tanehna e kelang-kelang suku Juda ras Jusup.
12 Arah Utara, balengna imulai i Jordan nari janah kenca si e terus nangkeng arah rebe-reben si arah Utara Jeriho jenari kempak Barat arah tengah-tengah taneh deleng-deleng seh ku gurun pasir Bet-Awen.
13 I jenari terus ku rebe-reben si arah bagin Selatan Lus (igelari ka pe Betel), kenca bage ngincuah ku Atarot Adar, i das deleng si arah Selatan Bet-Horon si arah berneh.
14 Kenca si e nimpang ku ingan si deban, melok ku Selatan i bas bagin Barat deleng enda jenari terus ku Kiryat Baal (ntah pe Kiryat Jearim), si jadi sikerajangen suku Juda. Enda me balengna arah Barat.
15 Balengna arah Selatan mulai i bas tepi Kiryat Jearim nari jenari terus ku ulu lau Neptoa.
16 Kenca bage ngincuah ku ture-ture deleng si i babo Baluren Hinnom, i ujung Utara Baluren Repaim. Jenari terus ku Selatan arah tengah-tengah Baluren Hinnom, arah Selatan uruk Jebusi, kempak Enrogel.
17 Jenari melok ku Utara ku Ensemes janah kenca e terus ku Gelilot, petala-tala ras Dalan Adumim. Balengna kenca si e ngincuah ku Batu Bohan (Bohan eme anak Ruben),
18 jenari lewat arah Utara uruk si i babo Baluren Jordan. I jenari ngincuah ku baluren e,
19 mentas arah Utara uruk Bet-Hogela, jenari ngadi i bas Lawit Mate si arah Utara, ingan Lau Jordan malerken launa. Enda me balengna arah Selatan.
20 Jordan eme balengna arah Timur. Enda me baleng-baleng taneh si ialoken keluarga i bas suku Benyamin jadi sikerajangenna.
21 Kota-kota si man keluarga suku Benyamin eme: Jeriho, Bet-Hogela, Emek Kesis,
22 Bet-Araba, Semaraim, Betel,
23 Awim, Para, Opera,
24 Keparammoni, Opni, ras Geba, sepulu dua kota kerina, rikut pe ras kuta-kuta i sekelewetna.
25 Lit ka pe Gibeon, Rama, Beerot,
26 Mispa, Kepira, Mosa,
27 Rekem, Irpel, Tarala,
28 Sela, Haelep, Jebus, (ntahpe Jerusalem), Gibea, ras Kiryat Jearim; sepulu empat kota kerina, rikut pe ras kuta-kuta i sekelewetna. Enda me taneh si ialoken keluarga-keluarga i bas suku Benyamin jadi sikerajangenna.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA