Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Si tersurat arah teruh enda eme keterangen kerna uga taneh Kanaan si arah Barat Jordan ibagi-bagiken man sapih-sapih bangsa Israel. Imam Eleasar, Josua anak Nun, ras peminpin-peminpin keluarga i bas suku bangsa Israel magi-magiken taneh e man si nandangi ringan i je.
2 Sue ras si nggo iperentahken TUHAN man Musa, daerah si siwah setengah suku arah Barat Jordan itentuken alu erbahan tikam tanduk.
3 Taneh si arah Timur Jordan nggo itentuken Musa man dua setengah suku si deban. (Kesusuren Jusup ibagi jadi dua suku: Manase ras Eperaim.) Tapi man kalak Lewi labo lit daerah ibereken Musa. Man bana ibereken kota-kota man inganna tading, bage pe mbalmbal guna lembuna ras biri-birina.
4 (Yos 14:3)
5 Bangsa Israel magi-magiken taneh e sue ras si nggo ipedahken TUHAN man Musa.
6 I bas sada wari piga-piga kalak i bas suku Juda nari reh ndahi Josua i Gilgal. Sekalak i bas ia nari eme Kalep anak Jepune, kalak Kenis, ngataken man Josua nina, "Tentu itehndu kai si ikataken TUHAN i Kades Barnea man Musa suruh-suruhen Dibata e kerna kam ras aku.
7 Umurku empat puluh tahun asum Musa, suruh-suruhen TUHAN, nuruh aku i Kades Barnea nari jadi mata-mata ku taneh enda. Sanga mulih, kubereken laporen si payo man bana,
8 sedang kalak si lawes ras aku ibahanna maka mbiar bangsanta. Tapi alu patuh aku tetap ngikutken TUHAN Dibatangku.
9 Erkite-kiteken si e, ipadanken Musa man bangku maka anak-anakku ras aku la banci la ngaloken taneh si kudalani jadi sikerajangen kami.
10 Tapi genduari, nehenlah nggo empat pulu lima tahun si enda ndai ikataken TUHAN man Musa. Tupung si e Israel sangana erdalan arah gurun pasir, janah sue ras si ipadanken TUHAN, IbereNa aku nggeluh seh asa genduari. Nehenlah aku! Genduari umurku nggo waluh pulu lima tahun.
11 Tapi gegehku bali denga nge ras asum aku isuruh Musa. Aku megegeh denga erperang ntahpe i bas dahin-dahin kai pe si deban.
12 Dage genduari, berekenlah man bangku taneh deleng-deleng si nggo ipadanken TUHAN asum aku ras anak buahku ngelapor. Ikataken kami tupung e man bandu maka manusia raksasa si igelari kalak Enak, lit i je i bas kota-kota mbelin si ertembok. Mbera-mbera TUHAN ras aku, gelah kupelawes ia kerina, bagi si nggo IkatakenNa."
13 Emaka ipasu-pasu Josua me Kalep anak Jepune jenari iberekenna man bana kota Hebron jadi sikerajangenna.
14 Seh asa genduari Hebron tetap denga sikerajangen kesusuren Kalep anak Jepune, kalak Kenis, sabap Kalep tetap patuh ngikutken TUHAN Dibata Israel.
15 Ope denga si enda, Hebron igelari kota Arba. (Arba eme si mbelinna i bas kalak Enak.) Genduari nggo dame negeri e.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA