Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Josua nggo metua kal genduari. Ikataken TUHAN man bana, nina, "Kam nggo metua kal, tapi mbelang denga taneh si man buaten.
2 Kerina daerah Pilisti ras Gesur,
3 bage pe kerina daerah Apim kempak Selatan. (Taneh si i bas Lau Sihor nari, i perbalengen Mesir, seh ku Utara ku perbalengen Ekron ianggap taneh kalak Kanaan; raja-raja kalak Pilisti ringan i Gasa, Asdot, Askelon, Gat, ras Ekron.)
4 Negeri kalak Kanaan pe lit denga, ras Meara (sikerajangen kalak Sidon), seh ku Apek, i perbalengen kalak Amori;
5 taneh kalak Gebal; kerina daerah Libanon kempak Timur, i Baalgat nari, eme si arah Selatan Deleng Hermon, ku dalan Hamat.
6 Enda subuk kerina daerah kalak Sidon, si ringan i deleng-deleng kelang-kelang Deleng Libanon ras Misrepot Maim. Kupelawes ateKu bangsa-bangsa enda asum bangsa-bangsa e iserang bangsa Israel. Arus ibagi-bagikenndu taneh e sapih-sapih kalak Israel, bagi si nggo Kupedahken man bandu gelah ilakokenndu.
7 Dage genduari, bagikenlah taneh e man si siwah suku nari ras setengah suku Manase, jadi sikerajangenna."
8 Suku Ruben ras Gat ras setengah i bas suku Manase nggo ngaloken taneh si ibereken Musa, suruh-suruhen TUHAN, man bana; taneh e arah Timur Lau Jordan.
9 Daerahna seh ku Aroer (i tepi Baluren Arnon) ras kota si i tengah baluren subuk pe taneh kendit i Medeba nari seh ku Dibon.
10 Taneh e seh ku perbalengen Amon ras bengket kerina kota-kota si nai iperentah Sihon raja kalak Amori, si ringan i Hesbon.
11 I je bengket Gileat, daerah Gesur ras Maaka, kerina Deleng Hermon, ras kerina taneh Basan seh ku Saleka.
12 I je bengket kerajan Raja Og, si perpudina i bas kalak Repaim, si erkuasa i Astarot ras Edrei. Musa nggo naluken bangsa-bangsa enda jenari ipelawesna ndarat.
13 Amin bage gia, kalak Gesur ras Maaka la ipelawes bangsa Israel; ia tetap denga ringan i Israel.
14 Man suku Lewi la lit ibereken Musa taneh, sue ras si nggo ipedahken TUHAN man Musa. Kalak Lewi arus ngaloken sikerajangenna sada bagin i bas persembahen si itutung i babo batar-batar man TUHAN Dibata Israel.
15 Musa nggo mereken sada bagin taneh e man keluarga-keluarga i bas suku Ruben jadi sikerajangenna.
16 Daerahna seh ku Aroer (i tepi Baluren Arnon) ras kota si i tengah baluren e, subuk kendit-kendit i sekelewet Medeba.
17 I je bengket Hesbon ras kerina kota-kota i kendit-kendit e, eme kap: Dibon, Bamot Baal, Bet Baalmeon,
18 Jahas, Kedemot, Mepaat,
19 Kiriataim, Sipma, Seretsahar si i das uruk-uruk i bas baluren e,
20 Betpeor, reben-reben Deleng Pisga, ras Bet Jesimot.
21 I je kerina kota-kota si lit i bas kendit-kendit ras kerina kerajan Sihon raja kalak Amori, si ringan i Hesbon. Italuken Musa ia, bage pe pengulu-pengulu Midian: Ewi, Rekem, Sur, Hur, ras Reba. Kerina pengulu enda lit i teruh kuasa Raja Sihon, janah kalak e erdahin nampati raja e.
22 I bas kalak si ibunuh bangsa Israel e lit sekalak guru si beluh ngoge nasip, gelarna Bilham anak Beor.
23 Lau Jordan baleng suku Ruben arah Barat. Enda me kota-kota ras kuta-kuta si ibereken man keluarga i bas suku Ruben jadi sikerajangenna.
24 Man keluarga suku Gat pe nggo ibereken Musa sada bagin taneh e jadi sikerajangenna.
25 Daerahna bengket Jaser ras kerina kota-kota Gileat, setengah taneh Amon seh ku Aroer, si arah Timur Raba;
26 tanehna e mulai i Hesbon nari ku Ramat Mispa ras Betonim, i Mahanaim nari ku perbalengen Lodebar.
27 I bas Baluren Jordan si ku je eme Bet Haram, Betnimra, Sukot, ras Sapon, sisa kerajan Raja Sihon i Hesbon nari. Balengna arah Barat eme Lau Jordan seh ku Dano Galilea i Utara.
28 Enda me kota-kota ras kuta-kuta si ibereken man keluarga suku Gat jadi sikerajangenna.
29 Musa nggo mereken sada bagin taneh e man setengah keluarga suku Manase jadi sikerajangenna.
30 Daerahna seh ku Mahanaim janah bengket kerina daerah Basan, eme kerina kerajan Raja Og, raja Basan, bage pe enem puluhna kuta-kuta Jair i Basan.
31 I je bengket setengah taneh Gileat, bage pe Astarot ras Edrei, duana ibu kota kerajan Raja Og i Basan. Kerina si enda ibereken man setengah keluarga kesusuren Mahir anak Manase.
32 Bagenda me Musa magi-magiken taneh si arah Timur Jeriho ras Jordan asum ia i Kendit Moap.
33 Tapi man suku Lewi la lit iberekenna taneh. Ikatakenna man suku e kerina maka sikerajangenna eme sada bagin i bas persembahen man TUHAN Dibata Israel.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA