Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E bakto meyarsa kabar parkara kamennangan-kamennanganna Isra’il, Rato Yabin dhari Hazor laju ngotos oreng ka Rato Yobab dhari kottha Madon, ka to-rato Simron ban Akhsaf,
2 ka to-rato e pagunongan e bagiyan dhaja, e Cora Yordan e lao’na Galilea, e dhaera e babana pagunongan, ban e paseser e seddi’na Dor.
3 Rato jareya ngerem otosan ka oreng Kana’an e bara’na ban e temorra Yordan, ka oreng Amori, Het, Feris, ban oreng Yebus e dhaera pagunongan, sarta oreng Hewi e babana Gunong Hermon e dhaera Mizpa.
4 To-rato jareya padha rabu abakta tantarana se talebat bannya’na, sampe’ akantha bannya’na beddhi e penggir sereng. Jaran ban kareta perrangnga talebat bannya’ keya.
5 To-rato jareya kabbi padha agabung sarta akompol abadhi markas e seddi’anna Songay Merom nyerrangnga Isra’il.
6 Dhabuna PANGERAN ka Yusak, "Ba’na ja’ tako’ ka reng-oreng jareya. Lagguna baja teya, reng-oreng jareya bi’ Sengko’ la epateyana kabbi polana Sengko’ nolonga Isra’il. Ba’na kodu maempon ran-jaranna, ban ta-kareta perrangnga kodu obbar."
7 Daddi Yusak ban sakabbinna tantarana laju nyerrang moso jareya dadagan e seddi’na Songay Merom.
8 Bi’ PANGERAN oreng Isra’il epamennang ka so-mosona jareya. Oreng Isra’il nyerrang ban nyerser so-mosona jareya sampe’ gan Misrefot-Maim ban Sidon e bagiyan dhaja, ban sampe’ gan Cora Mizpa e bagiyan temor. Perrang jareya terros tadha’ ambuna sampe’ mosona Isra’il tadha’ karena, padha mate kabbi.
9 Yusak maempon ran-jaranna to-rato jareya, ngobbar ta-kareta perrangnga, menorot se edhabuwagi PANGERAN.
10 Saellana jareya Yusak abali, pas arebbu’ Hazor se e bakto jareya tamaso’ karaja’an se paleng kowat e antarana sakabbinna karaja’an e jadhiya. Kottha jareya eobbar, ratona ban pandhudhu’na epatadha’ karena, epate’e kabbi.
11 (11:10)
12 Tha-kottha jareya kabbi erebbu’ bi’ Yusak, ban to-ratona etangkep sarta epate’e menorot dhabuna Mosa, abdina PANGERAN rowa.
13 Tape tha-kottha se epaddek e mo’-gumo’ jur-gujuran, tadha’ settonga se eobbar bi’ oreng Isra’il, kajabana Hazor se eobbar bi’ Yusak dibi’.
14 Reng-oreng e tha-kottha jareya epate’e; tadha’ settonga se gi’ odhi’. Tape rang-barangnga se aji ban ebinna ekala’ bi’ reng-oreng Isra’il.
15 Sabarang se epakonnagi PANGERAN ka Mosa, abdina, bi’ Mosa la epanapa’ ka Yusak, bi’ Yusak la elampa’agi kabbi; tadha’ settonga se elebadi.
16 Nagara jareya erebbu’ kabbi bi’ Yusak — dhaera pagunongan, dhaera e babana gunong, se badha e bagiyan dhaja ban se badha e bagiyan lao’; bariya keya sakabbinna baba kakobasa’anna Gosyen ban dhaera tana kajal e lao’na Gosyen, sarta Cora Yordan.
17 Lebarra dhaera jareya molae dhari Pagunongan Gundhul e bagiyan lao’, e seddi’na Edom, sampe’ ka Ba’al-Gad e bagiyan dhaja e Cora Libanon e lao’na Gunong Hermon. Ce’ abidda Yusak se aperrang bi’ to-rato e dhaera jareya, tape dhi-budhina to-rato jareya etangkep ban epate’e kabbi.
18 (11:17)
19 Dhari sakabbinna kottha e saanterona dhaera jareya tadha’ settonga se mabadha parjanjiyan parsahabadan ban Isra’il, kajabana Gibeyon, kotthana bangsa Hewi. Tha-kottha laenna epakala kabbi e dhalem paperrangan.
20 Bi’ PANGERAN reng-oreng jareya epamantep karebba se aperranga ban bangsa Isra’il, sopaja kabbi padha’a epatompes ban epate’e kabbi ta’ kalaban badha se ekaneserre, menorot se epakonnagi PANGERAN ka Mosa.
21 E bakto jareya keya Yusak matompes bangsa Enak, iya areya bangsa buta se badha e dhaera pagunongan — e Hebron, Debir, Anab, ban e saanterona dhaera pagunongan Yehuda ban Isra’il. Reng-oreng jareya bi’ Yusak epate’e kabbi, ban tha-kotthana epamosna.
22 Bangsa Enak jareya tadha’ karena settonga balakka’ e dhaera Isra’il; pera’ e Gaza, Gat ban Asdod se gi’ badha.
23 Nagara jareya kabbi erebbu’ bi’ Yusak menorot dhabuna PANGERAN ka Mosa, pas eparengngagi ka bangsa Isra’il. Nagara jareya egi-bagi, ban saneyap suku narema settong bagiyan. Saellana jareya bangsa Isra’il laju ambu se aperrang, ban nagarana aman taremtem.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA