Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kenca berita kemenangen-kemenangen Israel seh man Raja Jabin i Hasor nari, itenahkenna Raja Jobap i Madon nari, raja-raja i Simron ras Aksap nari,
2 bage pe raja-raja si erkuasa arah deleng-deleng i Utara, i Baluren Jordan arah Selatan Dano Galilea, i uruk-uruk, ras i tepi lawit deher Dor.
3 Itenahkenna pe kalak Kanaan si ringan arah Timur ras Barat Jordan, eme kalak Amori, kalak Heti, kalak Peris, ras kalak Jebusi i deleng-deleng bage pe kalak Hewi si ringan i teruh Deleng Hermon i taneh Mispa.
4 Emaka reh raja-raja e ras kerina tenterana, teremna bagi kersik i tepi lawit. Kuda ras gereta perangna pe melala.
5 Kerina raja-raja enda mpersada gegeh jenari ras-ras ia reh, ibahanna inganna erkemah i Lau Merom, gelah mperang Israel.
6 Nina TUHAN man Josua, "Ula kam mbiar. Pagi, kira-kira bagi genduari ka, nggo kubunuh ia kerina guna Israel. Arus ipengkarkenndu kudana jenari ciluk geretana."
7 Emaka rempet iserang Josua ras tenterana kalak ndai i Lau Merom.
8 Ibereken TUHAN kemenangen man bangsa Israel; iserang kalak Israel ia, iayak-ayakna seh ndauh ku Utara ku Misrepot Maim ras Sidon, janah ku Timur seh i Baluren Mispa. Pertempuren e la ngadi seh musuh e lanai sada pe tading nggeluh.
9 Ibahan Josua man bana kai si nggo iperentahken TUHAN: ipengkarkenna kudana janah icilukna geretana.
10 Kenca si e Josua, nalukenna kerajan Hasor, mbunuh rajana. (Sanga si e Hasor me si megegehna i bas kerina kerajan e.)
11 Kerina kalak si i je ibunuhna; la lit sekalak pe itadingken nggeluh, janah kota e iciluk.
12 Kerina kota e ras rajana italuken Josua, kerina kalak ibunuhna, sue ras si nggo ipedahken Musa, suruh-suruhen TUHAN e.
13 Tapi kota-kota si ipajekken i das reruntuhen kuta si nggo jadi uruk la iciluk kalak Israel, seakatan Hasor si nggo kin iciluk Josua.
14 Ibuat bangsa Israel kerina erta-erta ras lembu i bas kota-kota e jenari isimpanna man sikerajangenna. Tapi manusia kerina ibunuhna; la lit sekalak pe itadingkenna nggeluh.
15 TUHAN nggo mereken PedahNa man Musa; Musa nehken pedah e man Josua, janah ipatuhi Josua pedah e kerina. Ilakokenna kerina si nggo ipedahken TUHAN man Musa.
16 Ikuasai Josua kerina daerah si arah deleng-deleng ras si i teruh deleng, arah Utara ras Selatan, kerina daerah Gosen ras taneh si la lit launa arah Selatan Gosen, bage pe Baluren Jordan.
17 Daerah e mulai i Deleng Halak nari i Selatan deher Edom, janah dauhna ku Utara seh ku Balgat, i Baluren Libanon arah Selatan Deleng Hermon. Ndekah Josua erperang ras raja-raja daerah enda, tapi italukkenna kerina, jenari ibunuhna.
18 (Yos 11:17)
19 Kota Gibeon ngenca erbahan perdamen ras bangsa Israel, i je ringan kalak Hewi. Si debanna kerina italuken i bas peperangen.
20 TUHAN mahanca tetap ukurna ngelawan bangsa Israel maka ia iukum seh kernep gelah kerina ibunuh alu la ndatken perkuah ate. Enda me si nggo ipedahken TUHAN man Musa.
21 Tupung e lawes Josua, ngeradasken seh keri manusia raksasa si igelari kalak Enak si ringan arah daerah deleng-deleng Hebron, Debir, Ahap, ras i bas kerina daerah deleng-deleng Juda ras Israel. Iradasken Josua ia kerina ras kota-kotana.
22 Lanai lit kalak Enak si tading i taneh Israel, tapi piga-piga lit denga tading i Gasa, Gat, ras Asdot.
23 Ikuasai Josua kerina taneh e, bagi si nggo iperentahken TUHAN man Musa. Ibereken Josua taneh e man kalak Israel jadi sikerajangenna janah ibagi-bagikenna jadi piga-piga bagin, sada bagin man tep-tep suku. Emaka bangsa e nggo banci pekesahken i bas peperangen nari.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA