¹ Zao kim hya gwesik, Yesus ki zep asa Galilea mo langnak de e-e san ziamjanbir song gweka. Zen hom Yerusalem mo langnak de e-e san dekam asa ziamjanbirki, sap Yahudi mo mam-mamna dekam man tan hap orasa deblaꞌak.
² Dekam Yahudi mo yakla yalak dep man golek de gweꞌak– men dekam kluk-kluk golak lowehe gwenanke.
³ Zep oso wal zem yasik tan ola anakan nenblak, “Em ba habe awe gweꞌara? Yerusalem mo lang san em song gwen– zao deka ere hon de ang ta gwen wenya in eno owas syal gwibinni insa kara nul gwek.
⁴ Eme anakan enaka enlala gweblaꞌanam, ‘Dikire kitak asa tawa neblak,’ ki bahem awe en aningkim syal gwe-gwen. Em in dekam de teipsin hibe syal gweꞌara, ki emki enaka tingare zi hip zertrei gwizimdin.”
⁵ Zen sap oso wal zem, hwena zen hom anakan daibliblak, “An Zen– nesa de ngaya tabin hip de Zi niye.” In zep kirekam yasik dak.
⁶ Hwena man ding gulzimki, “Angkam abe hap de yaklanak hom zauꞌun– mensa Bian abe hap dam tasiblikaye, Ëe dikim desan song gwen hapye. Hwena em totoresa sap esa sek gwe-gwer.
⁷ Auhu-kama enlala zini zen molya emsa husus neibiridak. Hwena Asa en man husus ne gweblanan, sap Ëe ama gubirida gwenan, ‘Em in kareksae ol gwenan.’
⁸ Amki e-en Yerusalem san yakla yala iwe dep zahe gwek. Ëe home zaheꞌan, sap ano kire hap de yaklanak angkam hom zauꞌun.”
⁹ Zep Zena hom ang gweka. Zen man Galileak gweka.
¹⁰ Oso wal zem in kim yakla yawala in san dep egwahak, hwena Yesus Zena lun kon zep sowekam goletroka– zi de tawa gweblan srem hap.
¹¹ Yakla yawala iwe Yahudi mo mam-mamna man ze de gweblaꞌak, hen dakensibli nasen gweꞌak, “Zini in endawe gweꞌara?”
¹² Zi beyam-byana in dekam man zenaka aningkim nulsuk halasen gweꞌak. Sap ahakon man anakan sam neisik gweblaꞌak, “Zini in dawem nakake.” Hwena ahakon man egu gweꞌak, “Dawem naka hom. Zen nesa yasik ta gwibirida.”
¹³ Hwena men zen kirekam sam neisiblik zen hom damnak kirekam egu gweꞌak, sap zen Yahudi mo mam-mam naka nairibirida gwek.
¹⁴ Yakla yawala in holona aha-ere minggu. Ngirin ngam sonnak kim zauꞌuk, Yesus ki zep Alap mo golak til zika, ki zep ze zi beyam-byana insa tawa tabiꞌinka.
¹⁵ Yahudi mo mam-mamna dekam zep anakan denggwanblaꞌak, “Zini an hom sekola gweka. Zen ba nakon kire tangankam tawa gweka?”
¹⁶ Yesus ki zep ding gulzimki, “Ola mensae tawa ta gwibirin, zen ere onakore naka hom. Zen Alap, men Zen Asa zer soneka, Zebon onakore naka.
¹⁷ Zini men zen Alap mo dwam gwibin sin de ang tan hap ehohle gwe-gwenan, zen sa anakan dam nulsuk gwer, ‘Tawa tabinni an eiwa Alap mo dwam gwibin sin,’ ahaksa, ‘Desan hom.’
¹⁸ Zini men zen zere mo enlala gwibinsi tawa da gwibirin, zen anakan edwam gwe-gwenan, ‘Ano bosesa dekakim teip nulsuk gwek.’ Hwena men zen anakan tawa da gwibirin, ‘Asa bahem boltere tan. Diki men zen asa zer sonekake, desa en em boltere tan,’ kire zini zen enlalana dam-damna hen zen bejen yasik tabin. Zep Ëe an hen kirena.
¹⁹ Eiwa, Musa Bak waba tangan hap titi tabin ola insa ebe mae hap golzimki, hwena em ema kitak ngip ul gwenan. Em ba habe Asa tan hap kalang eblaꞌan?”
²⁰ Zi beyana in dekam zep ding nulblik, “Emsa in dowal tilblila! Nara emsa tan hap kalang gweblaꞌara?”
²¹ Yesus ki zep ding gulzimki, “Ëe aha-ere owassae Hari Sabatnak syal gwibik, hen em dekam ema lenggwan gwibik.
²² Hari Sabatna, zen sap neno mae mo syal srem hap de yakla, hwena em dekam kie zi walas mo to mipna blom lasik gwibirin– men kirekam Musa Bak titi tabirkike. Hwena sap to mip blom tasibin hip dena, diki ausuna Musa hon hom. Zen diki orep de auyan-aza kirekam titi da gwibik.
²³ Em zebe Hari Sabatnak zi walas mo to mipna blom lasik gwibirin– dekam de Musa mo titi tabin ola insa ngip gun srem hap. Zen in zep bahem Asa jal gweblan, sap ee ama zi mo tingare timsi owaskam Hari Sabatkam oto gulsubluk.
²⁴ Asa de langa nakon kara tan enkam, bahem na-en Asa anakan ti yulsuk gweblan, ‘Zen man Musa mo titi tabin olsa gulmun gwenda.’ Diki enlala dam-dam enkam em abe hap dena anakan klis gul gweblan, ‘Zeno syala in dawemna,’ ahaksa, ‘Karekna.’”
²⁵ Ahakon Yerusalemk de zini dekam zep zenaka donbirida nasen gweꞌak, “Zini in zen– mensa neno mae mo mam-mamna tan hap deblaꞌanye.
²⁶ Hwena emki kara tan! Zen damnak zi beyanak tonbiridaꞌara, hen mam-mam wenya hom jalse neblaꞌan. San ha zen mes anakan dam dasil? – ‘Zen eiwa nesa de ngaya tabin hip de Zini Zen.’
²⁷ Hwena san ha diki Zen hom yap? Sap ngaya tabin hip de Zini in de ngatan zi mo lang nakon ati gwenan zanam, nen ki molye zeno ena tawa eblaꞌanam. Hwena Yesus zen Nazaret wal syake.”
²⁸ Zen in zep Yesus kim Alap mo gol teksonnak tawa tabiꞌinka ol mam-mamkam tonbiridaka, “Em ema tim ul gwenan, ‘Ëe zini insa ama tame laꞌan, hen zeno ena kie tawa eblaꞌan.’ Hwena Ëe totoresa home ere mo enlalakam hatazak. Men Zen Asa zer soneka, Zen eiwa taibliblan tanganna. Hwena em home Desa tame la gweꞌan.
²⁹ Hwena Aena kie Desa tame tak, sap Ëe Zebon onakone hatazak, hen Asa Zen zer soneka.”
³⁰ Dekam ahakon balk tan hap sap eakasik, hwena hom mae banakan mae neblak. Sap dekam kirekam de gweblan hap de yaklana mensa Bian dam tasiblika, zewe hom zauꞌuk. Zen in zep dekam balk da srem gwek.
³¹ Hwena zi beyana in kon hen beya nik daibliblak. Zen man egu gweꞌak, “Nesa de ngaya tabin hip de Zi de ahanik hataꞌanka, Zen banakan sa Yesus mo owas syal gwibinni ansa gulmunblula?”
³² Farisikam de gubirida gwen zini kim kirekam nasalbiridak, dekam zep apdekam Alap mo golak de syal tan zi mo mam-mam naban Alap mo golsa de kara gul gwen hap de jana nabare zini lup nul sonek– zen de Yesussu balk tan hap.
³³ Hwena zen hen hom dekam balk dak. Yesus dekam zep zi beyana insa gubiridaka, “Ëe molye holokam eban mae golelowehe gwek. Nabakam asa etan lwahal– Zini men Zen Asa zer sonekake, Zebon osan dep.
³⁴ Em dekam esa Asa le gweblal, hwena molye Asa hla la gwek. Sap men zaoe dekam gwe gweꞌak, em molye desan Asa ertrok.”
³⁵ Yahudi mo mam-mamna dekam zep zenaka dakensibirida gweꞌak, “Zini an endan lang san de song gwen hap ki gulu? – nen de zewe hla tan srem hapye. San ha Yunani mo lang san de song gwen hap? – men desan ahakore Yahudi zini sekwak gwenkam lowehen daꞌanke, zao de Yahudi srem zisi tawa ta gwibin hip.
³⁶ Ba hap ki gulu? – ‘Em dekam esa asa le gweblal, hwena molye asa hla lak. Sap men zaoe dekam gwe gweꞌak, em bejen zao yaing gwen.’”
³⁷ Yahudi mo aha-ere minggukam de yakla yala iwe, aumwa hap de yaklana, zen zen– mam tanganna. Yesus dekam zep Alap mo golak zauku, dekam zep ol mamkam tonbiridaka, “Zi de ho-hole gwenna, dikire Abon otden hap yaing gwe-gwezak.
³⁸ Men kirekam Alap mo olak lwak, zini men zen de Asa daibli gweblaꞌak, ‘zeno mae mo enho nakon sa ngaya gwen hap de hona ana gwese gwer.’”
³⁹ Hona insa enlala gwibirki, Zen Alap mo Enhosa. Zi de Yesussu taibliblankam, dekam de zebon ing gwe heblan. Hwena in kim gubiridaka, dekam hom ing gwe hezimꞌinka, sap dekam Yesus hom tiꞌinka– Alap dikim teipsinkim drenen hapye.
⁴⁰ Zi beyana in kim kirekam nasalblak, ahakon dekam zep eguk, “An diki Zen– Alap mo olsa de ayang gun hup de Zini, mensa Musa hamal hap gu-guk gweblakaye.”
⁴¹ Ahakon hen man eguk, “Zen an Zen– Israelsa de ngaya tabin hip de Zi niye.” Hwena ahakon man ding nulzimk, “Bejen. Hom anakan nen guk gweblak, ‘Zen Galilea wal hap sa jowe zala.’
⁴² Sap Alap mo olak man-am lwak, ‘Nesa de ngaya tabin hip de Zini, Zen Daud Bak mo ausu nakon sa saltili, hen Daudsa de jaha gweblan ena Betlehemk sa hen Desa jaha gwer.’”
⁴³ Zen kire nakon zep ehliwek.
⁴⁴ Ahakon sap dekam balk tan hap dwam neblaꞌak. Hwena zen hom mae banakan mae neblak.
⁴⁵ Alap mo golak de jana nabare zini in dekam zep etan lwanda halzak. Men zen lup nul sonek dekam zep dakensibiridak, “Em ba habe balk la halza srem gwer?”
⁴⁶ Hwena man ding nulzimk, “Kire zini san ki balk da gwenan? Zeno ola dawem tanganna. Aha zi mo ol toranna hom– kire naye.”
⁴⁷ Dekam zep jala ban ding nulzimk, “Asya! Emsa in hen mes yasik tabiri!
⁴⁸ San ee kie Yahudi mo mam-mamna hen Farisikam de gubirida gwen wenya aha-en mae laibliblaꞌan?!
⁴⁹ Hwena zi beyana an Musa mo titi tabin ola hom tame nul gwenan, zep zen kitak syauk sun dep sa sek gwer!”
⁵⁰ Hwena Farisi walya Nikodemus Bak zao hen gweꞌanka– men zen Yesussu nonol zini takake. Zen dekam zep wal bose wal zemka gubiridaka,
⁵¹ “Neno mae mo titi tabin olak Musa man nep ale gulzimki: Nen bap nen totoresa zisi gublun, ‘Zen karekna.’ Diki nonol taken-taken gweblankam. Karekna kim hlaulblunna, zen dekam de karek tan.”
⁵² Hwena man ding nulblik, “Ki san em hen Galilea wal?! Emki Alap mo olak teibin. Zao hom anakan ale nuk, ‘Alap mo olsa de ayang gun hup de zini Galilea mo lang nakon sa jowe zala.’” [
⁵³ Dekon kim ehya gwesik, ki zep gol san dep sekwak gwek.