¹ Aha yaklakam, Yesus ki zep Ho Gutuna Galilea san asa bulkum goleblan kinika. Ho gutuna in mo aha bosena Tiberias.
² Hwena zi beyana dekam zep tanakam bul le ta gwen san dep hles dyablak, sap zen mes zeno owas-owas syal gwibinni hla nul gwek– zi sang-sangna kim dawem ta gwibirkike.
³ Zao zep Yesus kwatap teknak asa golesesek gwe seka, ki zep ze asa goleteinikinꞌinka.
⁴ Dekam Yahudi zi mo yakla yala Paskanak dep man golek de gweꞌak.
⁵ Yesus kim men-san an-sankam zi beyam-byana insa kara tabirida ine guk gweꞌanka, dekam zep Pilipussu takensiblika, “Endawe esa tembanena lop lal? – dekam de zi beyam-byana ansa sul sonen hapye.”
⁶ Zen mae hap kirekam Pilipussu takensiblika– dekam de anakan akasiblin hap, “Zen banakan wehe Asa ding gulbluꞌanka?” Hwena Yesus Zena mes sap hamal hap anakan enlala gweka, “Ëe kirekam de owassa asa syal gwibir-zim.”
⁷ Pilipus dekam zep ding gulbluka, “Neno mae mo te-ala de mam tangankam lwaꞌanam, dekam de tembanesa kap tankam, dekam molya hen su kul soneꞌanam– sap betek maekam de goletembane tan hapye.”
⁸ Hwena ki zep ere mae mo wal bosena, Petrus mo osona Andreas Bak Yesussu gubluka,
⁹ “Awe ki walas tola. Zeno rotina sap ki– aha-ere taha-tap enkam, hen hogwena dan. Hwena zen tol waba hap. An zini tra tangan nakake.”
¹⁰ Ki zep Yesus asa gubiridaka, “Teinikirin hip enbiridak.” Langna in so naban. Zao zep ki teinikink. Zi enna kim naitbik, beyana san ha lima ribu enkam mes yap– we wal walassa de aitbin sremkam.
¹¹ Yesus ki zep rotina insa lop ta ineka, deban zep dawemsa Alap hap golblaka, ki zep hwena zi beyana in hap dikim kae gwebla-zimdin hip asa gubiridaka. Hogwe darena insa hen kirekam. Kim dwenblanda gweꞌak, hendep man tangan eitri gwek.
¹² Kim tingan eitri gwek, ki zep asa gubiridaka, “Dekam mosrona tagam lasik. Betek en maekam bap zen zalta dep erlwa kinin.”
¹³ Sap rotina dan en hen zini tra tanganna, hwena mosrona kime tagam lasik, yuna dua-blas enkam zep esuwek.
¹⁴ Zi beyana in kim owasna insa hla nuk, ki zep eguk, “An Zenke– Alap mo olsa de ayang gul gwen hap de zer sonen zini, mensa nen kara e gweblananye.”
¹⁵ Yesus kim tame gulku, “Zen angkam man Asa de tik-tik tan hap ealp gweꞌan– dekam de zebon mae onak teipsin hip,” dekam zep kon kwatap-tek kwatap-tek san dep ze-en ahulsuk halka.
¹⁶ Kim kam-en gweꞌak, ki zep ee zere hon de ang ta gwen wenya bul syap san tine gwek,
¹⁷ ki zebe kon hendep Kapernaum sun dep etan lwan dahak. Zao zep hendep Yesus mo hatazan sremnak asa kawesibiridak.
¹⁸ Hwena dekam zep asesena mamkam taiꞌinka. Ho gutuna in dekam zep mamkam ngep-ngep gweka.
¹⁹ Ëe mese dekam hoskam bulu insa ata ul song gweꞌak– langana san ha lima ahaksa enam kilometer enkam, hwena ki zebe Yesussu hla la guk. Ho gutu tahan san song gweꞌan zaka, hendep asa golek de tabiꞌin zaka. Ki zebe serkam eairiꞌak.
²⁰ Hwena ki zep asa gubirida kinzika, “Bahem eairin! Ëe an Ëe.”
²¹ Dekam zebe bulu in kon aha-ere enlala naban eirink. Hwena hendep dekam zep bulu in owas hap Kapernaumk hatak.
²² Kaꞌankam, zi beyana in zen ho gutu men eihyanak lowehek dekam zep dam nulsuk, “Bulu ir aha-enke, hen Yesus hom am zewe ang gwera– zere hon de ang ta gwen wenya kim bulu inkam sek gwerye. Yesussu man-am hli dal.”
²³ Hwena ahakore bulu, ena Tiberias korena, dekam zep yaing gwezak– langna men zewe ir Yesus goletembane tan nakon dawemsa Alap hap rotina in hap golblakake.
²⁴ Kim dam nulsuk, “Yesus hen zere hon de ang ta gwen wenya hom awe lowe heꞌan,” dekam zep bulu inkam Kapernaum sun dep sek gwek– zao de Yesussu teblan hap.
²⁵ Zi beyana in kim Yesussu hla danak, zao zep dakensiblik, “Guru, em bawalkame awe hatala?”
²⁶ Ki zep ding gulzimki, “Eiwa denakae emsa gubiridaꞌan: Em tembane en habe asa leblaꞌan, sap ir rotikame eitri gwek. Eno mae mo anakare enlalana hom, ‘Zere mo owas-owas syal gwibin nikone anakan dam lasiꞌin, “Zen an Zen– mensae kara e gweblananye.”’
²⁷ Bahem angkam en dep de tembane hap syal ta gwen, sap zen ebatrenkam. Diki hendep de elwa gwen hap de tembane hap emki syal ta gwen. Ëe, ngatan zi mo lang nakore Zi Tanganna, Ëe amaka kirekam de tembanena insa ebe mae hap golzimꞌin. Sap abe hap dena mes tangan dam gwesik: Alap kire hap Asa zer soneka.”
²⁸ Dekam zep dakensiblik, “Ki hwena ee banakan asa syal tal? – Alap dikim asa sam gwesibiridan hap, hen dekam de hendep de tembanena insa gul irin hipye.”
²⁹ Yesus ki zep ding gulzimki, “Syala in, a desa mo Alap ebe mae hap dwam gwibir-zimꞌira: Asa em anakan taibliblan, ‘An Zen– nesa de ngaya tabin hip de Zini, mensa Bian zer sone zakaye.’”
³⁰ Dekam zep ding nulblik, “Ki banakare owassa esa abe mae hap goltreizimdi? Desa de hlaunkum amaka emsa laibliblaꞌan. Banakarekam esa ap syal gwibir-zimdi?
³¹ Musa kim sasa langnak golegwe gweka, zen owaskam neno mae mo auyan-aza hap tembanena bosena ‘manna’sa gol gwizimki. Men kirekam Alap mo olak lwak, ‘Zen ngatan zi mo lang nakore tembanesa gol gwizimki.’”
³² Ki zep ding gulzimki, “Eiwa denakae emsa gubiridaꞌan: Musa Bak ngatan zi mo lang nakore tembane tangansa hom gol gwizimki. Diki ano Bian, Zen angkam ngatan zi mo lang nakore tembane tangansa ebe mae hap golzimꞌira.
³³ Sap Alap onakore tembane tanganna, zen diki Ëe an Zen tangan. Sap Ëe ngatan zi mo lang nakone ati gwezak– dekam de engaya gwen hap denaka okamanak de zini ebe mae hap golzimdin hip.”
³⁴ Ki zep nenblak, “Bian, tembanena in desa ap golzim tine gwe.”
³⁵ Ki zep ding gulzimki, “Ëe an Zen– engaya gwen hap de tembane naye. Zini men zen Abon yaing gwe-gweꞌanzak molya etan eusak gwe-gwek, hen men zen de Asa daibli gweblaꞌak zen molya etan eho-hole gwe-gwek.
³⁶ Hwena men kirekame emsa gubirida gwek, em sap ema Asa hla la gwenan, hwena home Asa laibliblaꞌan.
³⁷ Tingare zini mensa Bian abe hap lup gulbluꞌara, zen sa Abon yaing gwe-gwezal. Men zen Abon yaing gwe-gweꞌanzak, Ëe molye desa lup gulin srem gwe-gwek.
³⁸ Sap Ëe ere mo dwam gwibin sin de syal gwen hap home ngatan zi mo lang nakon hatazak. Hwena diki Bian mo dwam gwibin en san dikim syal gwen habe hatazak.
³⁹ Bian men Zen asa zer soneka, zeno abe hap de dwam gwibir-blinna an zen: Men desa Zena abe hap lup gulbluka, Ëe babe desa aha-en mae syauk sun dep de ora san de gwe hannak kara ta sonen. Hwena diki aumwa hap de yaklanak asa kitak tin nikon ngaya tabir.
⁴⁰ Zen zep tingan men zen de Tane zem Asa hla da gweꞌak hen daibli gweblaꞌak, zen zen– hendep de lowehen hap de wenyaye. Zen desa asa aumwa hap de yaklanak ngaya tabir. Ano Bian mo dwam gwibinni zen kirekam.”
⁴¹ Yahudi zi mo mam-mamna men zen hen zi beyana iwe ang ta zak, zen dekam zep donsuk gweblaꞌak– insa anakan gubiridakake, “Ëe an Zen– ngatan zi mo lang nakore tembane naye.”
⁴² Man egu gweꞌak, “Yesus an dwan Yusup Bak Swe mo tane sake. An-bi zemka ee kie tawa eizimk. Zen ba hap anakan gu gweꞌara? – ‘Ëe ngatan zi mo lang nakone ati gwezak.’”
⁴³ Dekam zep gubiridaka, “Asa de tonsublunna in olzausuk.
⁴⁴ Sap zini bejen Abon totoresa hatazan– ere mo Bian de zon tazan sremkamye. Aumwa hap de yaklanak Ëe asa desa en ngaya tabir.
⁴⁵ Sap Alap mo ol ayang gul gwen zini man ale nuk, ‘Alap sa tingare zini tawa tabiri.’ Zen zep tingan men zen Zebon onak esane gwe-gwenan hen dekon etawa gwe-gweꞌak, zen zen sa Abon yaing gwe-gwezal.
⁴⁶ “Hwena ano ola in bahem tim gun, ‘Zini Biansa nwekam hla tankam.’ Diki Ëe an Zen aha-en– nwekam de hla ta gwen hap de Zini, Zena men Desa zer sonekaye.
⁴⁷ Eiwa denakae emsa gubiridaꞌan: Men zen de Asa daibliblaꞌak, zen mes hendep de engaya gwen hap dena nulin.
⁴⁸ “Ëe an Zen– engaya gwen hap de tembane naye.
⁴⁹ Eno mae mo auyan-azana ki tembane bosena mannana sasa langnak dwenblanda gwek. Zen sap man desa dwenblanda gwek, hwena dekam nama juwe gwek.
⁵⁰ Hwena awe ki gweꞌara– eiwakam de ngatan zi mo lang nakore tembane tangan naye. Desae olgwenbiꞌik, dekam molye juwe gwek.
⁵¹ Ëe an Zen– engaya gwen hap de tembanena in, ngatan zi mo lang nakon de ati gwezan Zi niye. Men zen de tembanena ansa dwenblaꞌak, zen zen sa hendep denaban engaya gwer. Tembanena in, an zen: Ano timni– men desae okamanak de zisi dikim ngaya tabin hip sosok guꞌukye.”
⁵² Yesussu kim kirekam nasalblak, dekam zep zen eol tetek gweꞌak– mae hap, “Zini in banakan sa zere mo timni nep golzimdi? – nen de twinbin hipye.”
⁵³ Etan ki zep gubiridaka, “Eiwa denakae emsa gubiridaꞌan: Eme ngatan zi mo lang nakore Zi Tanganna ano kalaka otdebir srem gweꞌak, hen ano tim nika olgwenbir srem gweꞌak, ki ngaya gwen hap dena hom ebon mae onakye.
⁵⁴ Zi de ano tim nika twinbinni hen ano kalsa otdebinni, ki zebon onak ki lwaꞌan– engaya gwen hap denaye. Hen desa asa ngaya gwen hap luwen tabirzir– aumwa hap de yaklanakye.
⁵⁵ Sap ano timni zen eiwakam de tembane tangan. Hen ano kala zen eiwakam de hona zen– dekam de engaya gwen hap denaye.
⁵⁶ Men nara ano tim nika twinbinni hen ano kalaka otdebinni, zen aban zeraha-en gweꞌara, hen Ëe dekam ama deban zeraha-en gweꞌan.
⁵⁷ “Ano Bian, Zen ngaya gwen hap de ausuna Zen. Zen Asa zer soneka, hen Ëe Zebon onakone ngaya gweꞌan. Zen in zep hen kirekam, zini men zen de ano tim nika dwinbiꞌik, zen sa Abon onakon engaya gwer.
⁵⁸ Zen in zep, ngatan zi mo lang nakore tembanena, zen auyan-aza mo twenblanda gwen tembane makan hom. Desa kim sap dwenblanda gwek, zen hwena nama juwe gwek. Hwena ngatan zi mo lang nakore tembane tangansa de twenblanna, dekam hendep denaban esa lowehe gwer.”
⁵⁹ Zen Kapernaumk de but srem golak kirekam tawa tabirki.
⁶⁰ Zi beyana in zen nertro nasen gweꞌak kim kirekam de tawa tabinnik sane dak, beya nik zep eguk, “Ola an gwa-gwa tanganna. Bejen dam gulsun.”
⁶¹ Yesus hwena man kitak ano mae mo enlalana insa hla tazimki, ki zep asa kitak gubiridaka, “Em ema yap ano ola insa husus eibir.
⁶² Ki banakan esa eenlala gwer? – em de Asa gulk sun de sewe sennak anakan kara ta sonenkam, ‘Ngatan zi mo lang nakore Zi Tanganna hare man-am angkam sewe seꞌara– men zao nonol gwe gwekake, desan dep.’ Ki dekam banakan esa Asa enlala eblal?
⁶³ Alap mo Enhona, Zen Zen zi hip engaya gwen hap dena gol gwizimnira. Zi mo sosonna, zen waba hap. Ola insa emsa gubiridal, zen Alap mo Enho nakorena hen emsa dikim ngaya tabin hip dena.
⁶⁴ Hwena Ëe tawana: Em ahakon home Asa laibliblaꞌan.” Yesus kirekam gubiridaka, sap Zen nonol lonesen nakon mes ki tawa gwibiridaka, “Zini an zen sa Asa daibliblal. An zen sa Asa daiblibla srem gwer.” Hen Zen mes aha zini insa tawa gwe gubluka, “An zen sa Asa zergulu.”
⁶⁵ Yesus dekam zep etan mas gulzimki, “Zen in zebe hen emsa gubiridak, ‘Zini bejen Abon hatazan– Bian de gublun sremkamye.’”
⁶⁶ Dekam zi beyana in zen nertro nasen gweꞌak, beya nik zep hli dak. Hom etan ang neblak.
⁶⁷ Yesus dekam zep dua-blaskam de ang ta gwen wenya asa takensibiridaka, “Em san ha hen ema Asa de hli tan hap edwam gweꞌan?”
⁶⁸ Simon insa hen nen gweblak “Petrus”kum ki zep ding gulbluka, “Ëe etan nara hon dep de sek gwen hap? Sap hendep de engaya gwen hap de ola, zen Ebon en am lwaꞌan.
⁶⁹ Hen ee mese Emsa anakan laibliblak, ‘An Zen tangan– Alap mo zer sonen Zi Lalak naye.’”
⁷⁰ Yesus ki zep kitak ap ding gulzimki, “Aene sap emsa dua-blaskam dam tasibik, hwena ebon mae onakon ahana zen dowal mo bi gweblanna.”
⁷¹ Yesus mensa enlala gweblaka, zen ena Kariot walya Simon Bak mo tanena Yudassa. Zen sap dua-blaskam de zini ano mae mo ahana, hwena zen ki hendep Yesussu zerguku.