Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ E are Ahad gi’ petteng, Miriyam Magdalena entar ka pasareyanna Isa. Miriyam Magdalena jareya nangale’e batona koburan jareya la eerset dhari lobangnga.

² Daddi Miriyam Magdalena jareya laju berka’ nyare Simon Petrus ban mored se ekaase’e Isa, pas ngoca’ ka se kadhuwa jareya, "Badha se ngala’ Guste Isa dhari pasareyanna, ta’ oneng ja’ esaba’ e ka’imma."

³ Petrus ban mored settonganna gella’ entar ka pasareyan jareya,

⁴ padha ka’-berka’, tape mored settonganna jareya aceppeddan dhari Petrus paberka’na, daddi napa’ kaadha’ ka pasareyan.

⁵ Mored jareya nyongngo’ ka dhalem pasareyan, laju nangale’e kaen kapan badha e jadhiya, tape mored jareya ta’ maso’.

⁶ Simon Petrus nyosol dhari budhina, terros maso’ ka pasareyan jareya. Petrus nangale’e kaen kapan jareya,

⁷ tape kaen se etaleyagi ka serana Isa ta’ akompol ban kaen kapan jareya, agulung alaen.

⁸ Saellana jareya mored se napa’ kaadha’ ka pasareyan gella’, laju maso’ keya. Mored jareya nangale’e ban parcaja.

⁹ (Sampe’ bakto jareya reng-oreng jareya gi’ ta’ ngarte apa seesebbuttagi e dhalem Alketab ja’ Isa masthe odhi’ pole.)

¹⁰ Saellana jareya red-moredda laju padha mole.

¹¹ Miriyam Magdalena manjeng e adha’na pasareyanna Isa sambi nanges. Sambi nanges aba’na nyongngo’ ka dhalem pasareyanna Isa,

¹² laju nangale’e badha malaekat kadhuwa arasogan pote. Malaekat jareya padha alenggi e bekkassa kennengnganna jinazana Isa, se settong e olona, settonganna e onjurra.

¹³ Kat-malaekat jareya mareksane, "Oreng bine’, arapa ba’na me’ nanges?" Saodda Miriyam Magdalena, "Pangeran kaula ekala’ oreng, ban kaula ta’ oneng Salerana esaba’ e ka’imma."

¹⁴ Samarena ngoca’ kantha jareya, Miriyam Magdalena atole, laju nangale’e Isa ngadek e jadhiya. Tape Miriyam ta’ tao ja’ jareya Isa.

¹⁵ Isa adhabu, "Oreng bine’, arapa ba’na me’ nanges? Ba’na nyare sapa?" Miriyam nyangka jareya tokang kebbun, daddi laju nyaot, "Pa’, mon sampeyan se ngalle, tore kaula balai esaba’ e ka’imma Salerana bi’ sampeyan; bi’ kaula ekala’a."

¹⁶ Isa adhabu, "Miriyam!" Miriyam atole ka Isa, laju ngoca’ ngangguy oca’ Ibrani, "Rabuni!" (Artena "Guru".)

¹⁷ "Ja’ nyedding ka Sengko’!" dhabuna Isa, "sabab Sengko’ gi’ ta’ abali ka Rama. Tape kassa’ ba’na entar ka Tang tan-taretan, kabala ja’ sateya Sengko’ abaliya ka Tang Rama ban Ramana ba’na, Tang Allah ban Allahna ba’na."

¹⁸ Daddi Miriyam laju entar malae red-moredda Isa ja’ aba’na la nangale’e Guste Isa ban notorragi pa-apa se edhabuwagi Isa ka aba’na.

¹⁹ E are Ahad jareya keya, e bakto are la malem, red-moredda Isa akompol e settong bengko; labangnga ekunci kabbi, polana red-moredda padha tako’ ka ja-pangraja Yahudi. O-tao Isa etemmo ngadek e nga’-tengnga’anna red-moredda jareya, sarta laju adhabu, "Salam ka ba’na kabbi."

²⁰ Saellana adhabu kantha jareya Isa laju noduwagi asta ban roso’na ka red-moredda jareya. E bakto nangale’e Guste Isa, red-moredda padha ce’ peragga.

²¹ Isa laju adhabu sakaleyan aggi’, "Salam ka ba’na kabbi. Akantha Tang Rama se ngotos Sengko’, bariya keya Sengko’ ngotosa ba’na."

²² Saellana jareya Isa laju nyerroppagi nyabana ka red-moredda jareya sarta adhabu, "Tarema Errohna Allah.

²³ Mon ba’na nyapora dusana oreng, dusana oreng jareya bi’ Allah esapora keya. Mon bi’ ba’na dusana oreng ta’ esapora, bi’ Allah ta’ esapora keya."

²⁴ Sala settong dhari mored se dhubellas jareya, se anyama Tomas, (se esebbut se "Kembar"), e bakto Isa rabu teppa’na tadha’ e jadhiya.

²⁵ Daddi red-moredda Isa se laen atotoran ka Tomas, "Sengko’ la nangale’e Guste Isa!" Tape Tomas nyaot, "Mon sengko’ gi’ ta’ nangale’e lampadda pako e astana, ban gi’ ta’ nyedding loka pad-lampadda pako jareya bi’ tang garigi’ sarta gi’ ta’ mamaso’ tang tanang ka dhalem lokana roso’na, sengko’ ta’ endha’ parcaja."

²⁶ Saellana olle samenggu red-moredda Isa badha e kennengngan jareya pole, ban Tomas badha e jadhiya keya. Bang-labang ekunci kabbi. Tape o-tao Isa ngadek e nga’-tengnga’anna reng-oreng jareya, laju adhabu, "Salam ka ba’na kabbi."

²⁷ Saellana jareya Isa adhabu ka Tomas, "Mara abas Tang tanang reya, sedding ban garigi’na ba’na. Mara juluwagi tanangnga ba’na, pamaso’ ka dhalem Tang roso’. Ja’ mangmang pole, paparcaja, ra!"

²⁸ Tomas mator ka Isa, "Guste Allah Pangeran kaula!"

²⁹ Isa pas adhabu ka Tomas, "Ba’na parcaja polana nangale’e Sengko’. Pojur onggu oreng se parcaja maske ta’ nangale Sengko’!"

³⁰ Gi’ bannya’ kaajiban laenna se epabadha Isa e adha’anna red-moredda, tape ta’ etoles e ketab reya.

³¹ Tape se reya kabbi etoles sopaja ba’na parcaja ja’ Isa reya Rato Panyalamet, Pottrana Allah, ban sopaja ba’na olleya odhi’ polana parcaja ka Salerana.

Yohanes

Video Yohanes 20

Ikuti Kami:

KONTAK | PARTISIPASI | DONASI