¹ Yaklana dekam aha-en lwa kiniꞌanka– yakla yawala Paskanak dikim hatan hap. Yesus dekam mes anakan tame guꞌunka, “Angkam mes hatal– Ëe dikim okamana ansa hli yun hup, hen Bian osan dep dikim lwahan hap denakye.” Tingan men zene ang e gweblak, asa man tangan kwasang gwibirida gweka. Hendep kim Bian osan dep etan lwa haꞌanka, kire enkam ki hendep asa kwasang gwibirida gweꞌanka.
² Yaklana inkam, kim Yesus asa goletembane taꞌanka, hwena dekam dowal mo kigina mes Yudas hap Yesussu de zergun hup de enlalana ing ta soneblaka. Yudas in Kariot walya Simon mo tane.
³ Yesus dekam mes anakan tame gulku, “Bian mes tingare sosonna abe hap golblaka. Ëe sap zere onakone hatazak, hen angkam zere osan debe etan lwa haꞌan.”
⁴ Sap kirekam mes tame gulku, zep tembane tan nakon luweka, ki zep tahan bajuna alsiki, hen dekam zep handuknu obun tihinak da taka.
⁵ Hen ki zep hona blomenak sul soneka, dekam zep ano mae mo tanana ngan tasibir-zimꞌinka. Handuknu inkam zep sasa ta gwibir-zimꞌinka.
⁶ Kim Simon aha bosena Petrus hon hataꞌan zaka, ki zep ze takensiblika, “Bian, Em ba hap de ano tanana ap ngan sosublun hap?”
⁷ Ki zep ding gulbluka, “An desae angkam syal gwibiꞌin, em molye angkam tame gulku. Hwena lamkam esa tame gulu.”
⁸ Petrus ki zep gubluka, “Bejen! Em toton bejen Em ano tanana ap ngan sosublun!” Dekam zep ding gulbluka, “Ëe de eno tanasa ngan sosun sremkam, ki em ema Abon onakon wet soꞌara.”
⁹ Ki zep ding gulbluka, “Bian, kirekam de lwankam, ki tana enna bahem ap ngan sosublun. Ki hendep taha naban nola ban ap ngan sosublu!”
¹⁰ Yesus ki zep gubluka, “Ho awan zini hom edwam gwe-gwenan– etan de tim niban awan hapye. Diki tanana, zen te naserankam de son nenkam. Desa man ngan sosun hup dwam nei gwizimnin. Dekam kitak de timni mes ngan gwe henan. Em kitak mese engan gwehek. Hwena ebon mae onakon aha-en, zen hom ngan gwe heꞌara.”
¹¹ Yesus mes anakan tame gulku, “An zen sa Asa dikim ze balk tan hap zertreizimdi,” zen in zep anakan asa gubiridaka, “Ebon mae onakon aha-en, zen hom ngan gwe heꞌara.”
¹² Ano mae mo tanana kim ngan tasibinkim so ta sonebirki, ki zep tahan baju zem etan ala soka, dekam zep zere mo nikin gwennak dep lwa halka. Dekon zep nonol asa takensibiridaka, “Mensae ebe mae hap syal gwibir-zimnin, em wehe tame uꞌin?
¹³ Em Asa ‘guru’kam hen ‘bian’kame en gweblanan. Zen airis, sap Ëe an eiwa eno mae mo kire.
¹⁴ Ëe sap eiwa eno mae mo bian hen guru, hwena Ëe mese eno mae mo tanana ngan tasibir-zim. Zep em hen diki kirekam de enaka gweibirida gwen– ere mae mo tanasa de hwe-hwekam babu gwen zi mo kim ngan tasik gwibir-zimdinkimye.
¹⁵ Ëe mese Ënaka erak makan dre nenan– em dikim hen kirekam enaka gweibirida gwen hap.
¹⁶ Eiwa denakae emsa gubiridaꞌan: Zi mo tana iltikinnik de babu gwen zini bejen zere mo zi bina insa kwe tan. Hen zini men zen aha zi mo olsa golsong gwe-gwenna, zen betekna. Men zen zer sone gwenna, zen mamna.
¹⁷ Angkam em ema anakan tame uꞌin, ‘Ëe an betekna,’ zep em de kirekam enaka enlala betekkam mas gwibirida gwenkam, ki esa heꞌho gwibinni hla kul gwer.
¹⁸ “Ola in desa emsa gubiridanan, zen man ebe mae hap dakastilzimꞌin, diki ahaꞌen. Ëe mese kitak emsa tame tabik, hendep zebe emsa dam tasibik. Hwena sap kirekam, mensa orep abe hap dena Alap mo olak hamal hap ale nukke, zen kirekam sa ki hendep lwal– anakan men zen lwak, ‘Zini men debane zertembane gwe-gwek, zen hwena ano jal zi hip sa jowera.’
¹⁹ An zebe desa hamal hap emsa gubiridanan: Sap in kim joweꞌak, zen dekam esa Asa anakan laibliblal, ‘An Zen Tangan– Alap mo zer sonen Zi niye.’
²⁰ Hen Ëe eiwa denakae emsa gubiridaꞌan: Zi de ano zer sonen zisi zer irinni, zen ki hen Ënaka zer inꞌira. Hen zini men zen Ënaka zer irinni, zen hen Bian, men Zen Asa zer sone zaka, Desa hen zer innira.”
²¹ Yesus kim kirekam gubiridaka, dekam zep tangan enlalana dowebla hanaka, ki zep damnak asa gubiridaka, “Eiwa denakae emsa gubiridaꞌan: Ebon mae onakon ahanik sa Asa dikim ze balk tan hap zertreizimdi.”
²² Ëe dua-blaskam de dam tasibin wenya dekam zebe enaka ngalap naban karatda labiꞌik– mae hap: “An narasa ki gublunda?”
²³ Abon mae onakon, ahana men desa Yesus kwasang gwe-gweblaka, zen dekam zere mo dam taha nakon nikinꞌinka.
²⁴ Petrus dekam zep zebe hap tahana wap gulsubluka, ki zep gubluka, “Emki takensiblin: Zen narasa ki kirekam gublunda?”
²⁵ Zini in ki zep golek de ta zaka, zao zep takensiblika, “Bian, narasae ki enlala gweblala?”
²⁶ Ki zep ding gulbluka, “Ëe kime rotina ansa kolho honak os gul aneꞌak, men zebe habe golblaꞌak, zen zen.” Ki zep roti apna insa os gul ineka, desa zep Yudas Bak hap golblaka.
²⁷ Yudas kim roti apna insa twinbirki, dowal mo kigina dekam zep hwena ing gwe heblaka. Yesus ki zep gubluka, “Mensa ena kalang gweꞌara, nabakam syal gwibir.”
²⁸ Hwena Yesus insa kirekam gubluka, ee in zene ze teinikinꞌik ee home dam ulsuk.
²⁹ Yudas zen zen Yesus mae han ano mae mo te-alana zirensik gweka, zep ano wal bose walya ahakon man tim nuk, “Yesus man yap gublula– tembane maesa de yakla yala awe dep lop tan hap.” Hwena ahakon man tim nuk, “Zen te-alasa de tahalha zi hip kae gwebla-zimdin hip mes yap gulblula.”
³⁰ Yudas in kim roti apna insa twinbirki, ki zep hendep gola in kon te soka. Dekam mes kawesik.
³¹ Yudas kim song gweka, Yesus ki zep asa gubiridaka, “Angkam mes zaul– ngatan zi mo lang nakore Zi Tanganna ano bosesa dikim Alap mam gun hup denakye. Hen Abon onakon sa kitak Alap mo bosena teip nulsublunda gwer.
³² Abon onakon kim de zini Alap mo bosena teip nulsubluꞌak, Zen dekam sa hwena Alap ano bosena etan dawemkam mam gulsublula– zere onak kime hataꞌakye. An nabakam sa ki lwal.
³³ Em ano dang tininak de walas, Ëe molye holokam eban mae golelowehe gwek. Em esa Asa le gweblal. Hwena men kirekame Yahudi zisi gubirida gwek, angkam Ëe hwena emsa hen kirekame gubiridaꞌan: Men zao debe song gweꞌan, em molye desan Asa ertrok.
³⁴ “Zep angkam Ëe titi tabin ol esena ansa ebe mae hap hli yulzimꞌin: Em enaka kwasang gwibirida gwen. Ëe men kirekame emsa kwasang gwibirida gwekke, em hen kire enkam enaka kwasang eibirida gwek.
³⁵ Kirekame kwasang naban lowehe gweꞌak, dekam sa tingare zini anakan emsa tame da gwibir, ‘Zen eiwa Bian zere hon de ang ta gwen wenya.’”
³⁶ Simon mensa hen nen gweblak “Petrus”kum, zen dekam zep takensiblika, “Bian, Em endan san esa song gwera?” Ki zep ding gulbluka, “Men zao debe song gweꞌan, em molye angkam Asa desan zertroka. Hwena lamkam esa ki Asa zertrola.”
³⁷ Ki zep hwena etan takensiblika, “Bian, hwena ee ba hap de angkam Emsa ang gwebla srem gwen hap? Ëe mese tangan hohle gwenan– Emsa de zerzaunnuk de hwena tin hipye.”
³⁸ Ki zep hwena ding gulbluka, “Em san eiwa tangane kirekam hohle gweꞌara? – Asa de zerzaunnuk de hwena tin hipye. Eiwa denakae emsa gubluꞌan: Ayang de gun sremnak, em dan-ahan sonkam esa anakan Asa zabeblala, ‘Zini in ee home tame taꞌan.’”