Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ale hanima, sagala na horahan, roh ma bani bah on! Anjaha hanima na so marduit, roh ma, boli anjaha pangan ma! Roh ma hanima, boli ma anggur ampa dadih, lang pala marduit atap marpamboli!
2 Mase ma mambere duit hanima bani na so sipanganon, atap gogoh bani na so boi pabosurhon, tangihon, tangihon hanima ma Ahu, jadi panganonnima ma na mantin, anjaha bosur ma hanima bani na mataboh!
3 Pateleng pinggolnima, anjaha roh ma hanima hu Bangku! Tangihon ma, ase manggoluh tonduynima! Bahenon-Ku do bannima padan sisadokah ni dokahni, ai ma idop ni uhur na bani si Daud, na manongtong in.
4 Tonggor ma, Hubahen do ia gabe hasaksian bani bangsa-bangsa, gabe raja pakon panggomgom bani bangsa-bangsa.
5 Tonggor ma, bangsa na so tinandamu maningon do homa diloonmu, anjaha bangsa parbegu, na so manandai ho, roh do marayak ho, halani Jahowa Naibatamu pakon halani Na Pansing ni Israel, ai Ia do na pasangap ho.
6 Pindahi hanima ma Jahowa, sanggah boi ope Ia jumpah! Dilo hanima ma Ia sanggah donok ope Ia.
7 Itadingkon parjahat ma dalanni, ampa halak pargeduk sura-surani! Sai mulak ma ia bani Jahowa, ase marpangulaki uhur-Ni mangidahsi, sai mulak ma ia hubani Naibatanta, ai unjah do Ia manaloseihon.
8 Sedo pingkiran-Ku pingkirannima, anjaha sedo dalan-Ku dalannima, nini Jahowa.
9 Ai songon gijang ni langit humbani tanoh on, sonai do gijangan dalan-Ku humbani dalannima, anjaha pingkiran-Ku humbani pingkirannima.
10 Ai songon udan pakon salju na madabuh hun langit anjaha mulak hujai, tapi iarbahi do tanoh ai, ibahen do ai napu anjaha martumbor, laho mambere bonih bani parjuma ampa sipanganon bani jolma,
11 sonai do hatang-Ku na luar humbani pamangan-Ku: Seng lumei sonin mulak hu Bangku, tapi bahenonni do domu hubani na Huharosuhkon, anjaha manjadi huja pe ai Husuruh.
12 Ai ibagas malas ni uhur do hanima luar anjaha ibagas hadameion itogu-togu. Dolog-dolog ampa buntu-buntu marolob-olob i lobeinima, anjaha sagala hayu na i talun martopap-topap.
13 Gantih ni duri-duri tubuh ma hayu ares anjaha gantih ni latong tubuh bunga na morum; masa do ai gabe barita bani goran ni Jahowa, anjaha gabe tanda sisadokah ni dokahni na so boi masab.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA