Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nakana Batara ri Israel, "He ummakKu, nukapangi angkana Kubongkako rapang se’rea bura’ne ambongkai bainenna? Punna kamma, kemae sura’ talla’na? Nukapangi angkana Kubalukangko, rapang sitau mangge ambalukangi ana’na mae ri tau assingaraka pappiinrang? Tena! Nitahangko siagang nipelakko, lanri dosanu siagang kaja’dallang kalennu!
2 Angngapa namanna sitau ummakKu tania’ appiali, wattungKu battu angkioki ke’nanga? Maka a’mereki ke’nanga lanri nakapangi angkana takkulleA’ allappassangi siagang ampasalamaki ke’nanga? Sikontutojenna, lanri parentaKu na’jari kalotoro’ tamparanga, sikamma binangaya Kupa’jari parang lompo, sa’genna mate ngaseng jukuka na’rasa parru.
3 Kupa’jari le’leng pakkaki langika, KalengKu antongkoki rapang kaeng le’leng tanra kasusaang."
4 Batara Kaminang Tinggia angngajarakka’ a’bicara, sollanna akkulle kanangku ampakajarreki tau la’baya pa’mai’na. Tunggala’ bari’basa’ Napabangungi erokku untu’ ampilangngeri ajaranNa mae ri nakke.
5 Nasarea’ Batara pammahang, tena kungngewa yareka ta’giling battu ri Ia.
6 Kutannangngangi dongkokku tau eroka amba’jia’; na pilisikku mae ri tau eroka ambi’buki janggokku. Tena nakugilingi rupangku ri wattungku nihina siagang nipi’rui.
7 Saba’ Karaeng Allata’ala antulunga’ na tena kunipakasiri’. Kupakajarreki pa’maikku na kusa’bara’; kuassengi angkanaya tena kulanipakasiri’.
8 Saba’ ma’reppeseki Allata’ala, Napa’nyatai angkanaya tena nakusala. Inai ero’ angngaganga’ a’gea’? Umba kipara maju assama-sama. Inai angngewa’? Suromi a’reppese’ mae ri nakke.
9 Tojeng, Batara Kaminang Tinggia angngalleanga’, inai barani ampa’nyatai angkana sala’? Sikontu tau antudua’ lalanynya’ ngasengi rapang kaeng toa nikanrea ri kacoa’.
10 He ikau ngaseng ampakalompoai Batara, siagang ampilangngeriai kananna atanNa, nakulle sassangi agang nuoloa, siagang tena caya ansingariko; mingka tappa’ laloko mae ri Batara; tanjengko mae ri Allata’alanu.
11 He ikau ngaseng tau ancilakaiyai parannu tau, lanipanrakiko lanri ri rancana kalennu tonji. Batara ampareki anjo kajarianga kammaya, lasannaki batenu nisessa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA