Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ TUHAN nggo milih Kores jadi raja. IangkatNa ia naluken bangsa-bangsa; IsuruhNa nangtangi kuasa raja-raja, janah kerabangen kota-kota italangi TUHAN man bana. Nina TUHAN kempak Kores,

² "Aku jine nikapken dalan man bandu, Kupekendit deleng ras uruk-uruk arah lebendu. Gerbang-gerbang tembaga Kupecahken, eruk-eruk besi Kupenggelken.

³ Man bandu Kubereken erta-erta si meherga, si terbuni i bas ingan si seh gelapna; gelah arah e ietehndu maka Aku kap TUHAN, Dibata nu Israel, si ndilo kam alu gelarndu jine.

⁴ Kuangkat kam nampati Israel suruh-suruhenKu, bangsa si jadi pilihenKu. Nggo Kudilo kam, janah Kubereken kemulian man bandu, aminna pe la itandaindu Aku.

⁵ Aku kap TUHAN; la lit si debanna, seakatan Aku la lit Dibata. Kubereken gegeh man bandu, aminna la gia itandaindu Aku.

⁶ Kulakoken me si enda gelah kerina kalak si belang-belang doni metehsa, maka Aku kap TUHAN janah la kap lit dibata si deban.

⁷ Terang ras gelap, Aku nepasa, Aku mereken pasu-pasu bage pe cilaka. Aku, TUHAN, ngelakoken si enda kerina.

⁸ Kupesusur kemenangen i langit nari desken udan, janah doni sikap ngalo-ngalosa. Jenari turah ia radu ras kebebasen dingen keadilen; Aku, TUHAN, si mahanca jadi si enda kerina."

⁹ Banci kin kudin taneh, ersoal jabap ras si nepasa? Banci kin taneh dah nungkun man tukang kudin; nina, "Kuga perbahanenndu e?" Tah pe nina, "La lit kebeluhenndu!"

¹⁰ Pang kin kalak ngatakenca man orang tuana, "Uga maka ibahanndu rupangku bagenda?"

¹¹ Bagenda me nina TUHAN, Dibata si Badia nu Israel, si ngaturken kerinana si nandangi jadi, "Lit kin hakndu nungkuni Aku kerna anak-anakKu? La lit hakndu nuruhsa kai arus Kubahan!"

¹² Aku kap si nepa doni enda, janah Kujadiken manusia lako ngianisa. Alu kuasangKu, langit Kukimbangken; matawari, bulan, ras bintang-bintang, kerinana Kuaturken.

¹³ Maka keke ukur Raja Kores, Aku nge nuruhsa, gelah sura-surangKu ras kebenaren isehkenna. Kupekendit dalan si man bentasenna. KotangKu Jerusalem ipantekina ka! Janah bangsangKu si tertaban ipulahina. Labo ise pe si ngupahi ia, labo ise pe si nogoksa. Enda me kata TUHAN, Dibata si Mada kuasa.

¹⁴ Bagenda nina TUHAN, "O Israel, kam me pagi empuna kebayaken Mesir ras Sudan. Kalak Seba si gedang mbelin jadi budakndu pagi, janahna teriket alu rante, iarak-arakna kam arah pudi. Nembah mungkuk ia man bandu, janah nina, 'Ras kam kepe Dibata; la lit Dibata si deban seakatan Ia.

¹⁵ Dibata nu Israel, si ngkelini BangsaNa, eme Dibata si la teridah.

¹⁶ Kalak si mahan gana-gana mela pagi akapna, la banci lang ipemela-melaken ia kerina.

¹⁷ Tapi Israel ikelini TUHAN, rasa lalap la masap kemenangenna. Bangsa e la ipemela-melaken, seh asa si ndekah-ndekahna.'"

¹⁸ TUHAN kap si nepa langit, seakatan Ia, Dibata la lit. ItepaNa ras IpetembeNa doni enda, paguh dingen tahan i bas inganna. Taneh enda ItepaNa la burbar, la mesuni, tapi mehuli, gelah banci iiani. Ia me singatakenca nina, "Aku kap TUHAN, si deban la lit Dibata.

¹⁹ Aku ngerana la erbuni-buni, sura-surangKu pe la Kubahan terbuni. Labo Kusuruh bangsangKu Israel maka Aku idaram-darami i bas ingan si burbar ras si mesuni. Aku kap TUHAN, si ngataken ketuhu-tuhun, janah kai si benar, Kupebetehken."

²⁰ Nina TUHAN, "Marilah pulung kerina, o kam kalak si tading denga i bas bangsa-bangsa. O, kam kalak motu, si erbaris siarak-araken maba gana-gana kayu; kam kalak si ertoto man gana-ganandu, si la ngasup ngkelini geluhndu.

²¹ Mari turiken pengadunndu; arih-arihlah kam sapih-sapih temanndu. Ise nai si nggo nurikenca kerna kai si nggo jadi enda? Ma kin Aku, TUHAN, Dibata si adil ras si Engkelini? Seakatan Aku, la lit Dibata.

²² Mari, dahilah Aku maka kam Kukelini, o kam kerina manusia i doni. Sabap Aku ngenca Dibata, la lit si debanna.

²³ Padan si Kubahan, tuhu, janah la mobah-obah; i bas gelarKu jine Aku ersumpah. Kerina manusia, i lebengKu pagi erjimpuh, janah ersumpah, maka rasa lalap tutus atena nembah.

²⁴ Kerna Aku ikatakenna, 'Arah TUHAN ngenca maka lit kemenangen ras kuasa. Tapi kerina kalak si ernembeh ate man bangKu, mela pagi akapna tedis i adep-adepenKu.

²⁵ Tapi kesusuren Jakup la banci lang dat kemenangen, janah ermulia ia erkite-kiteken Aku, TUHAN.'

Yesaya

Video Yesaya 45

Ikuti Kami:

KONTAK | PARTISIPASI | DONASI