Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sip ma hanima manangihon Ahu, ale sagala pulou, anjaha hanima bangsa-bangsa, pabayu ma gogohnima. Roh ma sidea hun dohor, ihatahon ma, “Rap ma hita marayak paruhuman.”
2 Ise do na mamuhoisi hun hapoltakan, na jumpahan hamonangan bani ganup langkahni? Ise do na mangondoskon bangsa sipajuh begu-begu hu lobeini, anjaha ibere kuasa bani marrojati raja-raja? Doskon orbuk do sidea ibahen podangni, anjaha songon lamlam na sinaburhon sidea ibahen siorni.
3 Ipardakdak do sidea, anjaha sonang do ia montas, bani dalan na so ongga nidogei naheini.
4 Ise do na mambahen pakon na mandalankon ai? Ise do na mandilo sundut ni jolma humbani mungkahni? Ahu do, Jahowa, na parlobei anjaha na parpudi, Ahu do ai.
5 ididah pulou do ai gabe mabiar, ujung ni tanoh on gobir do; roh ma sidea hundohor anjaha martumpu-tumpu ma.
6 Ganup sidea marsiurupan, anjaha nini dompak hasomanni, “Tenger ma uhurmu!”
7 Tuhang bosi pahinsahon tuhang omas, sonai sijolom parpalu bani halak siantuk nanggar, mangkatahon bani pamodi, “Dear ma ai.” Jadi ipatoguh ma ai marhitei paku, gabe seng be miut-iut.
8 Tapi ho, ale Israel, juakjuak-Ku ho ale Jakob, na dob Hupilih in, ginompar ni si Abraham, huan-kuan-Ku ai,
9 ho na dob Hualop hun ujung ni tanoh on, anjaha Hudilo hun tampakanni, anjaha domma Huhatahon bam, “Juakjuak-Ku do ho, Ahu do mamilih ho, anjaha seng ambukkonon-Ku ho.
10 Ulang ho mabiar, ai Ahu do hasomanmu, ulang ho rusak, ai Ahu do Naibatamu. Hupargogohi pe ho, tongon Huurupi pe ho, tongon Hutatang pe ho marhitei tangan-Ku siamun na marhamonangan in.
11 Tonggor ma, maningon maila anjaha bador do sagala halak na marah dompak ho; halak na mambahen partinggilan bam, masab anjaha magou do.
12 Pindahanmu do sidea, na manlawan ho ai, tapi seng jumpah ho be sidea; gabe na lang do sidea anjaha magou, sidea na mammunsuhi ho ai.
13 Ai Ahu, Jahowa Naibatamu do, na manjolom tanganmu siamun; Ahu do na mangkatahon bam, ʻUlang mabiar, Ahu do na mangurupi ho!ʼ
14 Ulang ho mabiar, ale goya Jakob, ale Israel hulanan na etek-etek! Ahu do na mangurupi ho, nini Jahowa; Na Pansing ni Israel do Sipaluah bam.
15 Tonggor ma, bahenon-Ku do ho gabe gareta pardogei na baru, na marot anjaha na maripon; dogeionmu do dolog anjaha parropukonmu do ai, anjaha gabe lapa-lapa do bahenonmu buntu-buntu.
16 Piaranmu do sidea, anjaha luahonon ni logou do sidea, haba-haba do mangerap sidea. Tapi anggo ho marolob-olob do ibagas Jahowa, mamuji-muji ibagas Na Pansing ni Israel.
17 Halak na madoyuk na masombuh mangindahi bah, hape seng dong, horah do dilah ni sidea ibahen horahni, Ahu Jahowa, manangihon sidea, Ahu Naibata ni Israel, seng anjai tadingkonon-Ku sidea.
18 Patubuhon-Ku do bah mardalan bani buntu-buntu na leseng, anjaha bah tubuh i tongah-tongah ni habungan; bahenon-Ku do halimisan gabe tao, anjaha tanoh dorging-dorging gabe hatubuhan ni bah.
19 Nahkonon-Ku do i halimisan hayu ares, tusam, sampinur ampa hayu jetun; suanon-Ku do bani tanoh dorging-dorging sampinur, jabi-jabi rap pakon maranti,
20 ase ididah, itanda, iparuhurhon, anjaha iartihon sidea, paboa tangan ni Jahowa na mambahen ai, anjaha Na Pansing ni Israel do na manompa ai.”
21 Boan hanima ma hujon pakaranima, nini Jahowa, patugah ma tanda-tandani, nini Raja ni Jakob.
22 Roh ma sidea hun dohor anjaha ipatugah ma bennami aha na laho masa. Na masa bani mungkahni, aha do ai, patugah hanima ma, ase iparimbagaskon hanami, anjaha ibotoh hanami ujungni ai. Atap pabogeihon hanima ma bennami na sihol masa,
23 patugah hanima ma aha na masa dob on, ase ibotoh hanami atap Naibata do hanima tongon. Antong bahen hanima ma na madear atap na masambor, ase longang hanami anjaha gobir.
24 Tonggor ma, na lang do hanima, anjaha horjanima sisoya-soya do; anjaha hagigi do halak na mamilih hanima.
25 Hupuhoi do sada halak hun utara, anjaha domma roh ia; hun hapoltakan ni mata ni ari, idilo do goranku; rojatonni do parkuasa songon tanoh halampung, songon sitopa hudon mandogei tanoh hudon.
26 Ise do na patugahkon ai humbani mulani, ase ibotoh hanami, humbani na hinan, ase tarhatahon hanami: Sintong do ai? Tapi ise pe lang na patugahkon ai, ise pe lang na pabotohkon, sahalak pe lang na manangar hatanima.
27 Ahu do na parlobei na patalar ai bani Sion, anjaha Husuruh do hu Jerusalem siboan ambilan malas ni uhur.
28 Anjaha mangkawah Ahu inggot, tapi sahalak pe seng dong; sada pe lang humbani sidea sipanuturi, na boi mambere balos anggo manungkun Ahu.
29 Tongon, na lang do sidea ganup, anjaha sisoya-soya do pambahenan ni sidea; logou anjaha na lang do gana-gana ni sidea.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA