Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tena nabella ri anjo wattua, karaeng Babel, iamintu Merodakh ana’na Baladan, allangngereki kabara’ angkanaya beru ammollei Karaeng Hizkia battu ri garrinna. Jari assuromi siapa are tau a’lampa untu’ angngerang sura’ siagang hadia mae ri Karaeng Hizkia.

² Natarimami Hizkia anjo sikamma tau nisuroa siagang sannang pa’mai’ siagang napappicinikammi mae ri ke’nanga sikamma kakalumanynyanganna, iamintu bulaeng, pera’, rampa-rampa, minynya’-minynya’ mabau’, kammayatompa sikontu pakkakasa’ bundu’na siagang tantarana. Tena manna sirupa ri balla’ lompoa siagang sikontu kakaraenganna tanapappicinikang mae ri ke’nanga.

³ Nampa battumo Na’bi Yesaya andallekang siagang akkuta’nang ri Karaeng Hizkia angkana, "Battu kemae ngasengi anjo taua? Apa nakana ke’nanga?" Appialimi Hizkia angkana, "Battu ri Babel ke’nanga, pa’rasangang bella."

⁴ Akkuta’nammi pole Na’bi Yesaya angkana, "Apa nacini’ ke’nanga ri balla’ lompoa?" Appialimi Hizkia angkana, "Yangaseng-ngasenna. Tena barang-barang lalang ri pammolikanga ri balla’ lompoa takupappicinikang mae ri ke’nanga."

⁵ Nakanamo Na’bi Yesaya ri karaenga, "Nakana Batara Kaminang Makoasaya,

⁶ ‘Nia’ se’re wattu sallang na sikontu barang-barang niaka lalang ri balla’ lompoa, le’baka napasse’re sikamma boe-boenu sa’genna kamma-kamma anne, laniangka’ ngasengi nilaling mange ri Babel. Tena lammantang tassesa.

⁷ Battu ri ana’ cucunnu nia’ lanialle siagang nipa’jari pagawe balla’ lompo untu’ allayani karaeng Babel.’"

⁸ Appialimi Karaeng Hizkia angkana, "Baji’ tongi anjo pasanNa Batara nupabattua mae ri nakke." Appiali kammai anjo lanri napikkiriki angkana: "Assala’ tuli amangi siagang salewangangi kakaraengangku lalang tallasakku."

Yesaya

Video Yesaya 39

Ikuti Kami:

KONTAK | PARTISIPASI | DONASI