Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Cilaka me musuh-musuhta! Ia ngerampuk dingen nipu, aminna gia la pernah ise pe ngerampuk ras nipu ia. Lanai lit kesempatenna ngerampuk ras nipu, tapi ia eme kena rampuk ras kena tipu.
2 O TUHAN, mekuah min AteNdu man kami. Kam kap pengarapen kami. Kawalilah kami tep-tep wari janah sampati kami tupung i bas kesusahen.
3 Adi Kam erperang guna kami, kiam me bangsa-bangsa megi sora perang si pinger.
4 Barang-barangna irampas jenari ibaba jadi barang tabanen.
5 Andiko, seh kepe belinna TUHAN e! Kerina si nasa lit Ia rajana. IdemiNa Jerusalem alu keadilen ras kebujuren,
6 janah IberekenNa ketenengen man negeri e. BangsaNa tetap IkawaliNa, janah IberekenNa man bana kepentaren ras pemeteh. Ertana si mehergana e me erkemalangen man TUHAN.
7 Kalak si mbisa erlebuh mindo penampat. Wakil-wakil raja si atena erbahan perdamen tangis kesi-kesi.
8 Pasar-pasar si mbelin dem alu kebiaren seh maka la ise pe pang erdalan arah e. Perpadanen ilanggar janah persadan arih la ipatuhi. Lanai lit ise pe ihamati.
9 Taneh la isuani janah nggo terulang. Kerangen Libanon nggo melus, Baluren Saron si mehumur desken gurun pasir, bulung-bulung batang kayu si lit i Basan ras Deleng Karmel nartaren kerina.
10 Nina TUHAN man bangsa-bangsa, "Genduari keke me Aku. Kucidahken ateKu uga gegehna Aku.
11 Ibahanndu sura-sura si la mehuli, janah kai si ibahanndu la lit gunana. KesahKu desken api ngeradasken kam.
12 Getem me bangsa-bangsa desken batu kerangen si iciluk jadi kapur, desken duri iciluk jadi abu.
13 Kerina kalak si ndauh ras ndeher, begikennalah kerna kai si nggo Kubahan, janah iakuinalah kuasangKu."
14 Kalak Sion si perdosa nggirgir perban biarna nina, "Ukumen Dibata desken api si gara seh rasa lalap. Ise kin kita maka banci nggeluh i bas api si bage?"
15 Kami banci nggeluh adi ibelaskenndu dingen ilakokenndu si bujur, adi la ipakendu kuasandu nipu kalak musil janah la kam ngaloken sogok. Ulanai kam nggit megiken kerna pembunuhen janah ulanai pernehen kempak kejahaten.
16 Adi bage terkelin me kam; tenang me ukurndu tempa-tempa kam ringan i bas sada benteng si nteguh, lit nakan man panganndu ras lau man inemenndu.
17 Idahndu me pagi sekalak raja, si merentah alu dem kemulian. Negeri si iperentahna belangna seh ku tampuk langit.
18 Adi gelgel e mbiar kam man pemungut pajak ras mata-mata bangsa si deban, tupung e pagi kebiarenndu e jadi inget-ingeten nari ngenca.
19 Lanai idahndu bangsa si deban megombang cakapna la iangkandu.
20 Nehenlah kempak Sion, kota inganta ngerayaken wari-wari raya agamanta. Nehenlah kempak Jerusalem! Andiko, seh kal tuhu pagi tenangna ringan i je. Kota e desken sada kemah si la pernah ipindahken, pantuk-pantukna la pernah meruah janah tinalina la pernah peltep.
21 Icidahken TUHAN me man banta KemulianNa. Ringan kita pagi i tepi lau belin si mbelang ras kitik, tapi kapal musuh la lit mentas arah e.
22 Kerina perkakas si lit i bas kapal e la erguna; layarna la banci ikimbangken! Sirampuk pagi kerina kebayaken tentera musuh, janah perbahan mbuena ertana, kalak si cempang-cempang pe banci dat bagin. TUHAN pagi jadi hakimta. Ia si merentah kita, Ia kap raja ras penebusta.
23 (Yes 33:22)
24 Lanai pagi lit si sakit ringan i bas negerinta, janah kerina dosa nggo ialemi.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA