Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ale Jahowa, Ham do Naibatangku; sihol patimbulonku do Ham, sihol pujionku do goran-Mu; ai Ham do sibahen halongangan, sipasaud sura-sura na dob niranggihon humbani sapari ibagas hasintongan ampa habujuron.
2 Gabe timbunan batu do ibahen Ham huta in, huta na toguh in gabe reong-reong, anjaha istana ni partoloh seng dong be; seng sipaulion be ai lalab.
3 Halani ai pasangapon ni bangsa na gogoh ma Ham, anjaha huta ni bangsa na bisang mangkabiari Ham.
4 Ai Ham do haporusan bani halak na madoyuk, haporusan bani halak na masombuh ibagas hasosakanni, panisioan sanggah haba-haba, parlinggoman sanggah milas ni ari; ai ondam-ondam ni halak sipangodoh-odoh doskon haba-haba do sanggah musim borgoh,
5 doskon milas ni ari bani ianan na horah. Ipaminop Ham do halutuon ni partoloh, songon na milas nirungkub ni hombun; olob-olob ni sipangodoh-odoh ipasip Ham do.
6 Jadi bahenon ni Jahowa Zebaot ma bani sagala bangsa i atas dolog on sada pesta na gok sipanganon na mataboh, sada pesta na gok anggur madokah, na gok sipanganon na mataboh ampa utok-utok, na gok anggur na madokah anjaha na pitah.
7 Anjaha pasision-Ni ma i atas dolog on parrungkub na nirungkubkon bani sagala bangsa ampa panutup na tinutupkon bani ganup bangsa parbegu.
8 Boiskonon-Ni do hamatean ronsi sadokah ni dokahni, anjaha apusan ni Tuhan Jahowa do iluh humbani sagala bohi, anjaha padaohon-Ni do habadoron ni bangsa-Ni hun sab tanoh on; tongon Jahowa do mangkatahon in.
9 Jadi hatahonon ni halak ma bani ari ai, “Tonggor ma, on do Naibatanta, na niarapkonta laho mangurupi hita. On do Jahowa, na niarapkonta! Marolob-olob anjaha marmalas ni uhur ma hita halani pangurupion-Ni.
10 Tongon, tampei do tangan ni Jahowa i atas dolog on, tapi sidogeian do anggo Moab bani iananni songon anggala sidogeian ibagas godung parhubangan.
11 Age pe ipaherbang tanganni ibagas ai songon parlanguy na paherbang tanganni marlanguy, tapi patoruhon ni Jahowa do hagijangonni rap pakon hapandeian ni tanganni.
12 Anjaha batar-batar ni tembokni na gijang ai patoruhon-Ni do ai, ondunon-Ni, sampakkonon-Ni hu tanoh, hubagas orbuk.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA