Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Enda me berita kerna Mesir. Pedas me TUHAN reh ku Mesir alu ngersak embun. Berhala-berhala Mesir nggirgir i lebe-LebeNa, janah kalak Mesir bene ukurna.
2 Nina TUHAN, "Kubahan me perang sapih-sapih kalak Mesir; seninana ngelawan seninana, anak kuta ngelawan kalak si sekutan ras ia. Kota-kota erperang ras kota si deban, janah raja-raja ngelawan raja-raja guna ndatken kuasa.
3 Sura-sura kalak Mesir la surung Kubahan, janah Kubeneken ukurna. Emaka ipindona penampat man berhala-berhalana, jenari lawes ia nungkuni guru-guru si baso, ipindona pedah man begu-begu kalak si nggo mate.
4 Kuendesken Mesir ku teruh kuasa sekalak raja si merentah ia alu kejam." Enda kata i bas TUHAN si Mada Kuasa nari.
5 Lau Nil merembo, janah kedungenna kerah me.
6 Baluren lau belin e mbau tupung launa mulai lawes kukerahna. Batang rengo ras rih si lit i je melus,
7 janah kerina benih sinuan-sinuan si iamburken i gedang-gedang tepi Lau Nil kerah jenari kabang iembusken angin.
8 Kasa kalak si pendahinna nangkap nurung i Lau Nil la banci lang kelsehen janah ngandung, kawilna ras jalana lanai lit gunana.
9 Kalak si erbahan kain lenen erndele ate;
10 tukang tenun ras tukang-tukang si pentar, erceda ate janah tumpat ukurna.
11 Kerina peminpin Kota Soan bodoh kal tuhu-tuhu! Kalak si pentar kal i Mesir mereken pedah si sea-sea! Uga maka pang kal ia ngatakenca man raja, "Kami me kesusuren kalak pentar, kesusuren raja-raja si adi?"
12 Raja Mesir, i ja penasihatndu si cerdik e? Banci jadi ngasup ia nuriken kai sura-sura TUHAN si Mada Kuasa nandangi Mesir.
13 Kerina peminpin-peminpin kota Soan ras Mempis bodoh tuhu-tuhu! Arusna ia me si negu-negu bangsa e, tapi kepeken bekas pemabaina maka kalak papak.
14 TUHAN mahanca maka peminpin-peminpin e mereken nasihat si la erturi-turin. Erdandanken si e salah kerina kai si ilakoken Mesir, desken kalak mabuk, mbewat-mbewat perdalanna janah celus i bas utahna jine.
15 Lanai lit kalak ngasup nampati Mesir subuk kalak bayak tah kalak musil, kalak si mehaga tah si la itandai.
16 Seh me paksana kalak Mesir percikcik ras permela bali ras diberu. Nggirgir ia ban biarna tupung idahna TUHAN si Mada Kuasa nggo ngawatken TanNa lako ngukum.
17 Kalak Mesir mbiar ngenehen Juda tep-tep kali adi isingetken kerna putusen si nggo itentuken TUHAN si Mada Kuasa man bana.
18 Adi paksa si e nggo seh pake me pagi cakap Heber i bas lima kota Mesir. Kalak si ringan i je melasken sumpahna i bas gelar TUHAN si Mada Kuasa. Sada i bas kota e pagi igelari "Kota Matawari".
19 Adi paksa si e nggo seh, lit pagi sada batar-batar ingan persembahen man TUHAN i negeri Mesir, janah sada tugu i perbalengen Mesir si ipersembahken man TUHAN.
20 Eme pagi jadi tanda kesaksin maka TUHAN si Mada Kuasa ringan i negeri Mesir. Adi kalak si i je itindihna, jenari erlebuh ia kempak TUHAN mindo penampat, isuruh TUHAN sekalak jelma mulahi bangsa e.
21 Ipetangkas TUHAN me DiriNa man bangsa Mesir, emaka itandai ras isembah bangsa eme Ia, jenari ibahanna me persembahen gelehen ras persembahen si deban. Erpadan me ia man TUHAN alu sumpah, janah kai si ipadanken e idalanken.
22 Iukum TUHAN me kalak Mesir, tapi kenca bage IpepalemNa ka. Mulihken pagi bangsa e kempak TUHAN emaka ibegiken TUHAN pertotonna jenari IpepalemNa ka.
23 Adi paksa si e nggo seh, lit pagi pasar mbelang i Mesir nari seh ku Assur. Kalak si ringan i negeri si dua e mentas-mentas ku jah ku je arah pasar e, janah negeri si dua e ersembah ras-ras.
24 Tupung si e, Israel seri pagi ergana ras Mesir ras Assur, janah negeri si telu e mereken kesangapen man kerina doni enda.
25 Ipasu-pasu TUHAN si Mada Kuasa negeri si telu e, NiNa, "Kupasu-pasu me kam o Mesir, bangsangKu; Assur tinepangKu, ras Israel bangsa pilihenKu."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA