Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 LaNakamaseangi Batara Israel umma’Na, siagang Napilemi ke’nanga a’jari taunNa. LaNaboliki ammotere’ ke’nanga ri pa’rasangang kalenna. Bansa maraenga labattu nampa asse’re siagang ke’nanga.
2 Jai bansa lantulungi bansa Israel untu’ ammotere’ mange ri pa’rasangang Napassareanga Batara mae ri ke’nanga, anjoreng, anjo bansa-bansa maraenga la’jari atai mae ri tu Israel. Lanatahangi tu Israel tau le’baka antahangi ke’nanga, siagang lanaparentai tau le’baka anjallakkangi ke’nanga.
3 LaNapata’lappasaki Batara bansa Israel battu ri kapa’risanga siagang kasessanga, siagang battu ri jama-jamang battala’ nipassaya mae ri ke’nanga.
4 Punna Nagaukammo Batara anjo kammaya, lanacau-caumi ke’nanga karaeng Babel, angkana, "Tu’guru’mi karaeng pallaka! Takkulleami anjallakkang.
5 Napa’le’ba’mi Batara pamarentahanna sikamma pamarenta ja’dalaka,
6 larroa anjallakkangi bansa-bansaya siagang tulusu’ ansessayai ke’nanga.
7 Kale’bakkanna laamammi siagang sannammi sikontu linoa, na massing akkelong rannumo taua.
8 Poko’ eru siagang poko’ camara Libanon larannumi lanri tu’guru’mi anjo karaeng pallaka, ri wattunna a’lampamo tenamo tau lassuro ta’bangi ke’nanga!
9 Assua’-suara’mi lino tau matea anruppai kabattuanna anjo karaeng Babel. Ambangummi sikamma nyawa tau koasaya riolo ri lino, siagang nyawana sikamma karaenga riolo ambangung tommi battu ri empoang kala’biranna ke’nanga.
10 Akkio’ ngasemmi ke’nanga ri ia, angkana, ‘He! Kamma-kamma anne sangkamma mako ikambe, lamma siagang tena kullenu!
11 Riolo ikau nipakala’birikko siagang sa’ra kacapi, mingka kamma-kamma anne nia’ mako ri kasinoanna lino tau matea. Olo’ la’jari katinroannu siagang gallang-gallang la’jari kalimbu’nu.’
12 He karaeng Babel, riolo ikau bintoeng bari’basa’ accayaya, mingka kamma-kamma anne tu’guru’ mako battu rate ri langika! Riolo nubetai bansa-bansaya, mingka kamma-kamma anne nipasambilamako ri buttaya.
13 Appattujuangko nai’ ri langika siagang nupadongko’ empoang kala’birannu irate ri bintoeng kaminang tinggia! Nupikkiriki angkana akkulleko ammempo salaku karaeng irate ri moncong bageang wara’, tampa’na sikamma rewataya a’rappungang.
14 Nukana, angkana ikau lanaikko ri rammang tinggia nu’jari sangkamma Kaminang Tinggia.
15 Kale’bakkanna nipaloposokko antama’ ri bageang kaminang lantanga ri lino tau matea.
16 Ia ke’nanga tau niaka anjoreng lanacinikiko siagang lanajanjangko. Lakkuta’nangi ke’nanga angkana, ‘Iaka minne tau ampakamallaki buttaya siagang ampakagegereki sikamma kakaraenganga?
17 Iakami angngancuruki kota-kotaya siagang ampinrai linoa a’jari parang kassi’? Iaka minne le’baka allappassangi sikamma tunitahanna yareka allappassangi ke’nanga ammotere’?’
18 Sikontu karaeng le’baka ammarenta bansa-bansa nitarawangi siagang suara’ massing ri jera’na ke’nanga,
19 mingka ikau tena jera’nu; maya’nu nipelaki sangkamma cu’la’ nipelaka, nitambungi ri sikamma maya’na pejuang matea lalang bundu’, siagang nipasambilaya siagang ke’nanga antama’ ri kali’bong batua, rapang maya’ nionjo’-onjokanga.
20 Le’ba’mi nupanraki pa’rasangannu siagang nubuno bansa kalennu. Lanri kammana anjo tenamo nitarawangko kau sangkamma karaeng-karaeng maraenga. Tena manna sitau battu ri anjo kaluarganu ja’dalaka lanipasalama’.
21 Lanipakaramulami pammunoanga! Ana’-ana’ bura’nenu lamatei lanri dosana boe-boena ke’nanga. Tena manna sitau battu ri ke’nanga lammarenta ri lino yareka ambangung kota-kota."
22 Nakana Batara Kaminang Koasaya, "LaKubakkai Babel nampa Kupa’lanynya’. Tena manna sitau laKupasalama’, ba’lalo manna ana’-anaka tena laKulappassang attallasa’. INakke Batara anne, akkana.
23 LaKupa’jari kollangi Babel, napammantangngi kokoci’. LaKubarrasaki Babel sa’genna tangkasa’. INakke, Batara Kaminang Makoasaya anne a’bicara."
24 Assumpai Batara Kaminang Makoasaya angkana: "Ia le’baka Kurancanakang mattantu lakajariangi.
25 Tu Asyur niaka ri Israel pa’rasangangKu, laKupanraki, na ia niaka ri moncong-moncongKu laKuonjo’-onjokangi. LaKupakabebasaki bansaKu battu ri panjallakkanga siagang battu ri erangngang battala’ napassakanga bansa Asyur.
26 Kammaminne rancanaKu untu’ linoa; limangKu laKupajonjoi untu’ anghukkungi bansa-bansaya."
27 Le’ba’mi Natappuki Batara Kaminang Makoasaya untu’ laNagaukang kammaya anjo. LaNapajonjoi limanNa untu’ assare hukkungang, siagang tena manna sitau akkulle ampisangkai.
28 Iaminne pasang nipa’la’banga nipau ri taung kamateanna Karaeng Ahas.
29 He bansa Filistin, tepo’mi palu-palu eroka nipake untu’ ampalu-paluiko. Mingka teako rannui, lanri punna nia’ ulara’ mate, nia’ labattu ulara’ maraeng, la’bi sekkeka, untu’ ansambeangi, siagang bayao ulara’ bo’boka a’jari naga akka’nyi’.
30 Lanitujuko ri kacipurang lompo, na sikamma tau ammantanga tassesa lanibuno ngasengi. Kabalekanna, tau kaminang kasi-asia battu ri umma’Na Batara langgappai kanre, siagang tau tenaya kullena lattallasaki siagang amang na salewangang.
31 Appiraung mako, siagang ammarrang mako appala’ tulung, he kota-kota Filistin! Siratangko gegere’ ngaseng napakamma malla’! Rammang limbu’buka naiki battu wara’ a’jari pammatei ri kabattuanna musua; tena tau ballorang ri ke’nanga.
32 Apa lanipappialiang mae ri sikamma tunisuroa battu ri bansa Filistin? Lanikana ri ke’nanga angkana le’ba’mi Nabangung Batara kota Sion, siagang umma’Na sessaya lanijagai anjoreng.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA