Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E bakto jareya lang-tolangnga to-rato ban ja-pangrajana pamarenta’an Yehuda, bariya keya lang-tolangnga para imam, para nabbi, ban reng-oreng Yerusalim laenna bakal epakalowara dhari koburanna.
2 Lang-tolang jareya epakalowar banne polana epakompola ban ebendhemma pole, tape edina’a e tana epakantha’a bu-rombu. Lang-tolangnga reng-oreng jareya bakal car-kalacera e adha’na are, bulan ban tang-bintang se bi’ reng-oreng jareya eanggep diba, ekataresnae, eladine, esemba ban epentae petodu.
3 Daddi reng-oreng se gi’ odhi’ dhari bangsa se jahat jareya, se bi’ Sengko’ epabalessadan e man-dhimman asoka’an mate etembang odhi’. Sengko’, PANGERAN Se Mahakobasa, la ngoca’."
4 PANGERAN ngotos sengko’ ngoca’ kantha reya ka ommadda, "Mon oreng labu tanto jaga pole, mon oreng posang, tanto abali.
5 Tape arapa ba’na, Tang ommat, me’ ros-terrosan nyalethong ban ondur dhari Sengko’? Ba’na terros neggu’i brahalana ban ta’ endha’ abali ka Sengko’!
6 Sengko’ ngedhingngagi epateppa’, tape ba’na ta’ acaca sabendherra. Tadha’ settonga e antarana ba’na se atobat dhari lalakonna se jahat. Tadha’ se ngoca’, ‘Apa tang sala?’ Ba’na kabbi padha ngala’ jalanna dibi’ akantha jaran se narabas maso’ ka paperrangan.
7 Dalko’ bai tao bila baktona kodu abali ka kennengnganna; keteran, mano’ daddali ban kowace tao keya bila mosemma ngalle kennengngan. Tape ba’na, Tang ommat, ta’ tao ka kom-hokom se ebagi Sengko’ ka ba’na.
8 Ce’ bangalla ba’na se ngoca’ ja’ ba’na reya bicaksana, ban tao ka Tang kom-hokom! Kodda’ abas, baramma Tang kom-hokom jareya la eba-oba bi’ li-ahli agama se roce!
9 Reng-oreng penter e antarana ba’na bakal epamalowa; bakal elanga akkal ban tajebbaga. Reng-oreng jareya ta’ endha’ narema Tang petodu; sateya kabicaksana’an apa se gi’ badha e reng-oreng jareya?
10 Daddi bi’ Sengko’ teggalla ebagiya ka wan-towan tana laenna, ban binena ebagiya ka oreng laen. Reng-oreng jareya kabbi, raja kene’, padha nyare kaontongan kalaban cara se ta’ jujur. La’-mala’ bi-nabbi ban mam-imam padha nepo oreng.
11 Ka-lokana Tang ommat bi’ reng-oreng jareya eanggep kene’. ‘Ta’ apa-rapa,’ oca’na, ‘Kabbi nyaman ban aman.’ Mangkana enja’.
12 He Tang ommat, ba’na koduna malo lantaran atengka se juba’ kantha jareya! Tape ba’na kandel mowana ban ta’ tao malo. Daddi ba’na bakal ngalotora keya akantha reng-oreng laenna se la ngalotor; Mon Sengko’ la ngokom ba’na, ba’na tompes kabbi. Sengko’, PANGERAN, la ngoca’.
13 Sengko’ ce’ terrona makompola Tang ommat akantha oreng se makompol hasel tanana. Tape Tang ommat akantha bungkana anggur ban bungkana ara se ta’ abuwa, la’-mala’ dhaunna la elop. Daddi Sengko’ ngedine reng-oreng manca dhateng ngobasae nagarana reng-oreng jareya. Sengko’, PANGERAN, la ngoca’."
14 "Arapa sengko’ ban ba’na me’ padha neng-enneng?" ca’na ommadda Allah. "Mara abareng ngongse ka kottha se abinteng, me’ olle padha mate e dhissa’. GUSTE Allahna sengko’ ban ba’na la motossagi ja’ sengko’ ban ba’na kodu padha mate; PANGERAN apareng racon se kodu eenom sengko’ ban ba’na se la padha dusa ka Salerana.
15 Tadha’ gunana ba’na ngarep kataremtemman ban masa se epabarasa, sabab se badha pera’ kakerrasan.
16 Moso la badha e kottha Dan; sowarana jaranna la ekaedhing dha’ enna’. Sanagara padha katako’an. Moso dhateng maancora nagara reya, bariya keya tha-kotthana ban reng-orengnga kabbi."
17 "Abas!" dhabuna PANGERAN. "Sateya Sengko’ madhateng lar-olar ka nga’-tengnga’anna ba’na, olar se mandi opassa, se ta’ ekenneng duwai."
18 Tang ate ce’ sossana, ngennessa ta’ ekenneng tambai rassana.
19 Edhingngagi! E man-dhimman e nagara reya sengko’ ngedhing cerrengnga tang bangsa se nanges padha atanya, "Apa PANGERAN tadha’ e Siyon pole sateya? badha e dhimma ba’nengan ratona?" Saodda PANGERAN, ratona reng-oreng jareya, "Arapa ba’na me’ nyake’e Tang ate asojud ka ba-diba nyemba ka ca-arca se tadha’ gunana?"
20 Ommat Isra’il aera’, "Mosem nemor la lebat, mosem anye la mare tape sengko’ ban ba’na gi’ ta’ salamet keya."
21 Tang ate remmok marga tang bangsa sake’ sara; sengko’ ngalengsang ban nanges polana sossa.
22 Apa ba’nengan sababba, me’ sampe’ sateya tang bangsa gi’ ta’ gellem baras? Apa tadha’ dokter e Gileyad ban tadha’ tamba e jadhiya?
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA