Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 I bas paksa si e, ipedarat kalak me i bas kuburenna nari kerina tulan raja-raja Juda, tulan pegawaina, tulan imam-imamna, tulan nabi-nabi, ras kerina tulan kalak si ringan i Jerusalem.
2 Kerina tulan-tulan e lanai ipepulung, dingen la ikuburken, kencah ia i lebe-lebe matawari, bulan ras i lebe-lebe bintang-bintang, si nai ikelengi, ilayani ras isembah bangsa enda, tapi jadi sampah-sampah i babo taneh.
3 Janah kerina kalak si tading, bangsa si jahat enda madin iakapna mate asangken enggeluh i bas ingan i ja ia Kukerapken. Aku, TUHAN si Mada Kuasa nggo ngerana."
4 Isuruh TUHAN aku melasken ranan enda kempak BangsaNa, "Adi guling sekalak jelma lanai kin ia keke mulihi? Adi sekalak jelma papak lanai kin ia mulihken?
5 Dage ngkai maka bangsangKu kenca ia erkusur nadingken Aku, lanai mulihken? Leket ukurndu kempak gana-ganandu, emaka la atendu mulihken man bangKu.
6 Megermet Kubegiken, tapi la kam ngerana kerna si bujur. Sekalak pe kam la lit erkadiola kerna kejahatenndu; ise pe kam la lit nungkun, 'Kesalahen kai kin si nggo kubahan?' Sekalak-sekalak ndalani dalanna desken kuda kiam ku peperangen.
7 Perik ondan pe ietehna katawari paksana mulih; nderapati ras kalimpines tehsa katawari paksana miser, tapi kam o bangsangKu la itehndu undang-undang TUHAN.
8 Uga banci maka nindu kam pentar, dingen itehndu undang-undangKu? Nehenlah, undang-undang nggo iganti kalak si beluh nuratken undang-undang.
9 Kalak pentar si lit i bas kam nggo juru, sengget dingen kena siding. Nggo itulakna katangKu. Kepentaren si kuga kin kepentarenna e genduari?
10 Dage Kubereken me ndeharana man kalak si mbaru reh, erkiteken kerina kalak subuk i bas si kitikna nari terus ku si mbelinna, kerina encari arah dalan si la bujur. Sabap subuk imam-imam bage pe nabi-nabi kerina nipu bangsa e.
11 Ibahanna tempa-tempa penakit bangsangKu la mekelek. 'Dame' nina ia situhuna la bo dame.
12 Erkiteken ilakokenna perbahanen si macik e kin maka mela akapndu? Lang! La sitik pe ietehndu mela, ayondu pe la sambar. Emaka guling kam bagi kalak si deban. Tupung Kuukum kam, eme pengkeri-kerin geluhndu. Aku TUHAN kap si ngerana.
13 Kupepulung ateKu bangsangKu desken sekalak pepulung ulih peranin; tapi bangsangKu bali ras batang anggur si la erbuah, desken batang ara si la erbuah, bulungna pe nggo melus. Emaka Kupelepas bangsa si deban engkuasai negeri e."
14 Nina bangsa Dibata, "Ngkai maka kita kundul saja? Ota kiam kita ku kota-kota si erbenteng janah i jah me kita mate. Sabap TUHAN Dibatanta nggo mereken ukumen man banta. Nggo IberekenNa racun man inementa, erkiteken dosa-dosanta man BaNa.
15 Siarapken lit dame ras paksa juah-juahen tapi kebiaren kap si jadi.
16 Imbang-imbangta nggo seh i kota Dan. Sora kudana ngengkus nggo terbegi. Kerina negeri-negeri nggirgir tupung kudana erngih-ngih. Imbang-imbangta nggo reh ngkernepken negerinta dingen kerina si lit i je, subuk kota-kotana bage pe kalak si ringan i je."
17 "Jagalah!" nina TUHAN, "Kusuruh nipe ku tengah-tengahndu, nipe si erbisa si la terpelemuk, janah itagutina kam."
18 Ceda ateku la tertambari, mesui kal pusuhku. Dengkehkenlah! I negeri si ndauh nari, kubegi sora bangsangku tangis.
19 "Lanai kin TUHAN i Sion? Lanai kin i jah raja Sion?" Ngaloi TUHAN, Rajana nina, "Ngkai kin maka ilegindu rawangKu alu nembah man dibata-dibatandu, dingen erjimpuh man dibata si deban si sia-sia?"
20 Serko bangsa e nina, "Paksa perudan nggo lepas, paksa rani nggo seh, tapi kami lalap la isampati."
21 Getem kal pusuhku erkiteken bangsangku nggo getem. Ceda ateku; sengget kal aku.
22 La kin lit tambar i Gileat? La kin lit i jah dokter? Dage ngkai maka bangsangku la itambari?
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA