Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tupung Sedekia jadi raja Juda umurna nggo dua pulu sada tahun. Dekahna ia merentah i Jerusalem sepulu sada tahun. Gelar nandena Hamutal, anak si Jeremia i kota Lipna nari.
2 Raja Sedekia erdosa kempak TUHAN bali ras si ilakoken Raja Joyakim.
3 Lanai tanggung-tanggung rawana TUHAN man kalak Jerusalem ras man kalak Juda, seh maka IambengkenNa kalak enda i bas adep-AdepenNa nari. Sedekia berontak ngelawan Nebukadnesar raja Babilon,
4 emaka reh Nebukadnesar ras kerina tenterana ngelawan Jerusalem i bas wari pesepuluhken bulan pesepuluhken tahun pesiwahken pemerentahen Sedekia. Ipajekkenna kemahna i darat kota. Ipantekina benteng-benteng ngkelewetisa,
5 jenari ikepungna seh tahun pesepuluh sadaken pemerentahen Sedekia.
6 I bas wari pesiwahken, bulan peempatken i bas tahun e ka, tupung e kelihen mesangat, seh maka lanai lit kai pe si man pangan jelma si nterem.
7 Tupung eme benteng-benteng kota e iruntuhken kalak. Aminna pe kota e nggo ikepung kalak Babilon, tapi tupung berngi kiam me kerina tentera e. Kiam ia arah peken kerajan, terus arah pintu gerbang si lit i kelang-kelang dua tembok, jenari lompat arah Baluren Jordan.
8 Raja Sedekia iayak tentera Babilon jenari itunduksa i taneh kendit deherken Jeriho, itangkapna. Kerina tenterana kiam nadingken ia.
9 Sedekia ibaba ku Raja Nebukadnesar si nggo nimai i kota Ripla i daerah Hamat. I jah me Nebukadnesar mereken ukumen man Sedekia.
10 I adep-adepen Sedekia i Ripla ibunuhi me kerina anakna si dilaki. Man peminpin-peminpin Juda pe ibereken ukumen mate.
11 Kenca bage ipulditkenna mata Sedekia jenari igarikenna dingen ibabana ku Babil. Sedekia tetap tading i bas penjara i Babil seh ngayak matena.
12 Tanggal sepuluh bulan lima, tahun pesepuluh siwahken pemerentahen Nebukadnesar, raja Babilon Nebusaradan eme penasehat raja ras puanglima tenterana, mengketi Jerusalem.
13 Icilukna Rumah Pertoton, istana dingen rumah kalak si mbelin Jerusalem.
14 Tenterana ngeruntuhken benteng-benteng kota.
15 Kalak si tading i bas kota e pande-pande si beluh, kerina kalak si nggo erpihak kempak Babilon kerina iangkut Nebusaradan ku Babilon.
16 Tapi i Juda itadingkenna kalak si musil-musil, si la lit kadena pe. Isuruhna ia erdahin i bas peken anggur dingen erjuma.
17 Kalak Babilon merperken tiang tembaga ras gereta-gereta si lit i bas Rumah Pertoton. Tong tembaga si mbelin e iperperkenna, jenari kerina tembaga ibabana ku Babilon.
18 Ibabana pe belanga-belanga, sendok-sendok, piso, siram-siram, calung-calung ras piala-piala subuk si ibahan i bas emas, tembaga entah pirak si ipake i bas kebaktin.
19 Kerina perkakas-perkakas si ibahan i bas emas entah pirak nari ibabana: mangkuk-mangkuk kitik, panci ingan maba rara, mangkuk ingan dareh persembahen, ingan abu, tangke lampu, mangkuk ingan kumenen, ras mangkuk si ipake guna lau anggur si man amburenken.
20 Perkakas tembaga si nggo ibahan Raja Salomo guna Rumah Pertoton e dua tiang tembaga, gereta, tong mbelin, sepulu dua lembu si natang tong e, la tertimbang beratna.
21 Tiang si dua e bali tempasna, 8 meter ganjangna; 5,3 meter kelewetna. Tiang e kosong i bas, kapalna 75 melimeter. I datas ancuk-ancuk tiang-tiang lit sada takal tembaga, 2,2 meter ganjangna, sekelewetna ihiasi alu buah delima si ibahan i bas tembaga nari ka.
22 (Yer 52:21)
23 I bas kisi-kisi tep-tep tiang lit seratus buah delima. Siwah pulu enem i bas si seratus e idah i teruh nari.
24 Tole, puanglima Nebusaradan nangkap Imam si Mbelin Seraya, Sepanya, imam tingkat dua, dingen telu kalak nari kalak si mbelin si erdahin i bas Rumah Pertoton.
25 I bas kota e nari ibabana opsir si nggo jadi puanglima pasukan, pitu kalak penasehat raja sitading denga i bas kota e, wakil puanglima, si ertanggung jawab i bas pencataten militer, janah pitu si mbelin si debanna.
26 Kerina e ibaba Nebusaradan ku raja Babilon si sangana i kota Ripla,
27 i daerah Hamat. I jah isiksana ia kerina jenari ibunuh. Bage me, kalak Juda nggo iangkut ku pembuangen.
28 Enda me kalak si iangkut Nebukadnesar jadi tabanen: pesepulu pitu tahunken ia jadi raja, iangkutna 3.023 kalak.
29 I bas tahun pesepulu-waluhken iangkutna 832 kalak i Jerusalem nari;
30 i bas pedua pulu dua tahunken, 745 iangkut Nebusaradan. Kerina lit 4.600 kalak teremna si iangkut.
31 I bas tahun kenca Ewil-Merodak jadi raja Babilon, icidahkenna kiniulinna kempak Joyakin raja Juda, alu mulahi ia i bas penjara nari. Si enda jadi i bas wari dua pulu lima bulan sepulu dua eme pe telu pulu pitu tahunken Joyakin nggo jadi tahanen.
32 Ibahan Ewil-Merodak si mehuli man bana. Iberekenna pangkat si mbelin man bana, belinen asangken raja-raja si deban si lit i bas pembuangen i Babilon.
33 Emaka Joyakin ipelepas isambarina paken penjarana jenari man ia i bas meja raja kidekah umur geluhna.
34 Tep-tep wari kidekah umur geluhna tetap ibereken raja Babilon belanjana.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA