Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai roh ma hun dohor haganup kopala ni tentara ai ampa si Johanan anak ni si Kareah, ampa si Asaria anak ni si Hosaya, ampa haganup bangsa ai na etek ampa na banggal,
2 ihatahon sidea ma hubani Nabi Jeremia, “Jalo ham ma pangindoannami anjaha tonggohon ham ma hanami hu bani Jahowa Naibatamu ampa haganup na tading on, ai otik mando hanami tading humbani na buei hinan, songon na nididahmu bennami,
3 ase andohar ipatuduhkon Jahowa Naibatamu bennami dalan sidalanannami ampa na boi sibahenonnami.
4 Nini Nabi Jeremia ma dompak sidea, ʻDomma hubogei ai. Tonggor ma, martonggo pe ahu bani Jahowa Naibata nasiam, songon na pinindo nasiam ai, anjaha atap aha balos ni Jahowa bani nasiam, hupatugah pe bani nasiam; seng pe huporsou atap aha hu bani nasiam.ʼ
5 Jadi nini sidea ma dompak si Jeremia, ʻJahowa do saksi na bonar anjaha na sintong mangimbang hanami, anggo lang idalankon hanami holi haganup hata na tinonahkon ni Jahowa Naibatamu marhitei ham hu bennami.ʼ
6 Atap dear atap sambor, maningon balosannami do sora ni Jahowa Naibatanami, na sinuruhnami parayakonmu, andohar boi sonang hanami, anggo ibalosi hanami sora ni Jahowa Naibatanami.”
7 Dob salpu sapuluh ari, roh ma hata ni Jahowa hubani si Jeremia:
8 Jadi idilo ma si Johanan, anak ni si Kareah ampa ganup kopala ni tentara hasomanni ai, ampa haganup na mabuei in na etek ampa na magodang,
9 nini ma bani sidea, “Sonon do hata ni Jahowa, Naibata ni Israel, na dob huparayak isuruh nasiam, laho padaskon pangindoan nasiam hu lobei-Ni,
10 ʻAnggo ra hanima marianan i nagori on, pajongjongon-Ku ma hanima, seng parsedaon-Ku; suanon-Ku ma hanima, lang orbaton-Ku, ai manosal do uhur-Hu pasal hamagouan na dob Hubahen bannima.ʼ
11 Ulang hanima hitir-hitir bani raja ni Babel, na hinabiarannima ai; ulang gobir hanima, nini Jahowa, ai Ahu do hasomannima, laho marramotkon hanima ampa paluahkon hanima humbagas tanganni.
12 Jumpahan idop ni uhur pe hanima Hubahen, ase maidop uhurni mangidah hanima, gabe ipalopas hanima marianan i tanohnima sandiri.
13 Tapi anggo ihatahon hanima, ʻSeng ra hanami marianan i nagori on! Marhitei na so ra hanima manangihon sora ni Jahowa, Naibatanima,
14 anjaha ihatahon hanima: Lang, maningon laho do hanami hu tanoh Masir, ase ulang ididah hanami porang, atap ibogei hanami sora ni tarompit, atap hurangan ruti hanami; anjaha ijai do hanami marianan,
15 anggo sonai do, tangihon nasiam ma hata ni Jahowa, ale simasima ni Juda.ʼ Sonon do hata ni Jahowa Zebaot, Naibata ni Israel, ʻAnggo sai isurahon hanima do laho hu Masir laho marianan ijai,
16 jadi podang na hinabiarannima ai ma manjumpahkon hanima ijai, i tanoh Masir; anjaha lohei na hinabiarannima ai ma mardakdak hanima hu Masir; maningon matei do hanima ijai.ʼ
17 Haganup dalahi na marsura-sura laho hu Masir laho marianan ijai, maningon matei do bahenon ni podang, lohei ampa sampar; seng dong na tading atap na horas humbani hamagouan siparohon-Ku bani sidea.
18 Ai sonon do hata ni Jahowa Zebaot, Naibata ni Israel, ʻSongon ringis ampa gilang-Ku na dob Huuseihon bani pangisi ni Jerusalem, sonai do useihononkon ringis-Hu bannima anggo laho hanima hu Masir. Gabe siburaan, songgot-songgot, siapason ampa sipahirion do hanima. Seng idahonnima be ianan on.ʼ
19 Ipatugah Jahowa do bani nasiam, ale simasima ni Juda, ʻUlang hanima laho hu Masir. Torang ma botoh nasiam, na dob Hupalumba nasiam sadari on,
20 paboa hamateihononkon nasiam do, anggo kahou nasiam.ʼ Ai nasiam do marsuruh ahu bani Jahowa, Naibata nasiam, nini nasiam, ʻMartonggo ma ho bani Jahowa, Naibatanami, anjaha atap aha na hinatahon ni Jahowa Naibata-nami, patugah ma bennami, sai horjahononnami do ai.ʼ
21 Anjaha domma hupabotohkon bani nasiam sadari on, hape seng itangihon nasiam sora ni Jahowa, Naibata nasiam pasal atap aha pe na sinuruh-Ni patugahonku bani nasiam.
22 On pe, ulang lang ibotoh nasiam, maningon matei do nasiam marhitei podang, lohei pakon sampar bani ianan, na sinurahon nasiam laho marianan ijai.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA