Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kenca bage kerina puanglima tentera e, eme Johanan, anak Kareah, bage pe Asaria anak Hosaya radu ras kerina bangsa e, subuk si erpangkat entah lang, reh ndahi aku
2 jenari nina, "Lakoken min pemindon kami man bandu. Totokenlah kami man TUHAN Dibatandu. Totoken kami enda kerina si nggeluh denga. Mbarenda nterem kal kami tapi genduari sitik nari ngenca tading bagi si idahndu.
3 Totoken maka icidahken TUHAN Dibatandu min man kami dalan si man dalanen bage pe kai si arus ibahan kami."
4 Ningku ngaloisa, "Merandal adi bage. Aku notokenca man TUHAN Dibatanta sue ras pemindondu, janah kai si IkatakenNa kuturiken man bandu. Kai pe la lit si kubuniken man bandu."
5 Kenca bage nina man bangku, "TUHANlah jadi saksi si tuhu-tuhu man kami, maka ipatuhi kami kerina perentah TUHAN Dibatandu si NiberekenNa man kami arah kam.
6 Mehuli entah lang, tetap kami patuh man TUHAN Dibatanta. Man BaNa kap kam isuruh kami ertoto. Kune ikutken kami Ia, si mehuli kap kerina jadi man kami."
7 Kenca sepuluh wari, reh me kata TUHAN man bangku,
8 emaka kudilo Johanan, kerina puanglima tentera si lit rassa dingen kerina kalak si deban.
9 Ningku kempak ia, "Nggo isuruhndu aku nehken pemindonndu man TUHAN Dibata nu Israel. Emaka bagenda nina,
10 'Adi tetap atendu tading i negeri enda, Kupanteki dage kam la Kuruntuhken. Kusuan dage kam la Kuruah. Cilaka si nggo Kubaba man bandu erbahan ceda ukurKu.
11 Ula nai kam mbiar man raja Babilon. Aku ras kam, dingen Aku si mulahi kam i bas kuasana nari.
12 Erkiteken Aku perkuah, kubahan maka mekuah atena ngenehen kam jenari ipediatna kam mulih ku kutandu. Aku TUHAN kap si nggo melasken ranan enda.'"
13 Tapi kam, kalak si tading denga i Juda, la banci la patuh man TUHAN Dibatandu, dingen tetaplah ukurndu tading i negeri enda. Ula ikatakenndu maka nindu: 'Lang, lawes nge kami ku Mesir. I jah ndauh kami i bas perang nari, la ibegi kami sora terompet peperangen janah la kami kelihen.' Adi ibelaskenndu si e, TUHAN si Mada Kuasa, Dibata nu Israel bagenda me nina man bandu, 'Adi tetap atendu nadingken negeri enda, janah tading i Mesir,
14 (Yer 42:13)
15 (Yer 42:13)
16 perang si ibiarindu la banci lang itundukna me kam; kelihen si isilahkenndu ngikut-ngikut kam, janah i Mesir mate me kam.
17 Kerina bangsa si nggo tetap atena nadingken negeri e lako tading i Mesir, mate me, subuk i bas perang, kelihen tah penakit. La lit sekalak si tading. Sekalak pe la banci pulah i bas cilaka si ateKu Kubaba man bana.'
18 Bagenda me nina TUHAN si Mada Kuasa, Dibata nu Israel, 'Bagi nembah ras rawangKu si gara nggo kuse ku babo kalak Jerusalem, bage me pe rawangKu si gara kuse ku babondu kune kam lawes ku Mesir. Mejin akap kalak ngidah kam, ihina kalak kam. Gelarndu ipake jadi sumpah. Asa ndigan pe lanai nari idahndu negeri enda.'
19 Kuumputi ngerana ningku, "Nggo ikataken TUHAN man bandu si tading denga i Juda gelah ula lawes ku Mesir. Emaka kupersingeti kam,
20 maka nggo mbelin kal lepakndu. Isuruhndu aku ertoto man TUHAN Dibatanta guna man bandu. Janah erjanji kam maka ipatuhindu kerina si IperentahkenNa.
21 Genduari nggo kuturiken man bandu, tapi la ikutkenndu kai si ikataken TUHAN Dibatanta arah aku.
22 Emaka ingetlah. Kam la banci la mate i bas perang, kelihen ras penakit, i bas negeri ku ja atendu lawes lako tading i je."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA