Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri wattunna Nebukadnezar karaeng Babel napecaki Yoyakhin ana’na Yoyakim, naangkaki Zedekia ana’na Yosia a’jari karaeng Yehuda.
2 Mingka baji’ Zedekia kammayatompa sikamma pagawena siagang sikontu ra’ya’na tena naturuki pasanNa Batara tete ri nakke.
3 Karaeng Zedekia nakiringi Yukhal ana’na Selemya, siagang Imang Zefanya ana’na Maaseya untu’ battu ampalaki ri nakke sollanna kuappala’ doang mae ri Karaeng Allata’ala untu’ kasalamakkanna bansaya.
4 Anjo wattua tenapa nanipantamakka’ ri tarungkua siagang bebasa’ ija’ a’gio’ ri tangnga-tangngana ra’yaka.
5 Tantarana Babel anjo wattua nakurungi Yerusalem, mingka ri wattunna nalangngere’ ke’nanga angkanaya a’jappami tantara Mesir battu ri Mesir untu’ a’bundu’, ammunduru’mi ke’nanga.
6 Batara, iamintu Allata’alana Israel, Nasuroa’
7 akkana kamma anne mae ri tunasuroa Zedekia: "Pauangi Zedekia kamma anne, ‘Niaki tantara Mesir a’jappa mae anrinni untu’ ambantuko, mingka la’gilingi nampa ammotere’.
8 Nampa lammotere’ tu Babel na nabuccu’ anne kotaya, nampa nabeta siagang natunu.
9 INakke, Batara, ampakaingakko, sollanna tena nanutipu kalennu lanri nupikkiri’na angkanaya a’lampami tu Babel siagang tenamo nalammotere’. Nasaba’ ma’nassa lammotereki ke’nanga.
10 Ebara’ angkana nubetai sikontu tantarana Babel sa’genna ia ammantanga iamami sannaka loko’na lalang ri kema-kemana ke’nanga, mingka lambangungi ke’nanga nampa natunu anne kotaya sa’genna la’busu’.’"
11 Tantarana Babel ammunduruki battu ri Yerusalem lanri a’gio’na tantara Mesir mange ri anjo kotaya.
12 Jari inakke kubokoimi Yerusalem nampa a’lampa mange ri daerana Benyamin untu’ antarimai bageang warisikku battu butta pisaka kaluargaku.
13 Mingka ri wattungku battu mange ri Pakke’bu’ Lompo Benyamin, komandang tantara tugasaka anjoreng natahanga’ nampa nakana, "Erokko lari a’limbang mange ri tu Babel!" (Anjo komandang tantaraya niarengi Yeria, ana’na Selemya, cucunna Hananya).
14 Appialima’ angkana, "Tena! Tena nakuero’ lari mange a’limbang ri musua." Mingka taerokai Yeria ampilangngeria’. Najakkala’ma’ nampa naeranga’ mange andallekang ri sikamma pagawe pamarentaya.
15 Sanna’ larrona ke’nanga ri nakke, siagang naparentakammi ke’nanga sollangku niba’ji nampa nikurung ri balla’na Yonatan, juru tulisi’na pamarentaya. Anjo ballaka nipa’jarimi balla’ tarungku.
16 Nipantamakka’ ri se’reang kollang irawa butta, nakusallo nitahang anjoreng.
17 Nampa Karaeng Zedekia nasuroi taua angngeranga’ mange andallekang ri ia ri balla’ karaenga. Anjoreng akkuta’nang cokko-cokkomi ri nakke angkana apaka nia’ pasang battu ri Batara. Appialima’ angkana, "Nia’." Nampa kupauang pole angkana, "Lanipassareangki’ mae ri karaeng Babel."
18 Le’baki anjo akkuta’namma’ angkana, "Apa kaja’dallangku mae ri katte karaeng yareka mae ri pagaweta, yareka mae ri ra’yaka, sa’genna kipantama’ ri balla’ tarungkua karaeng?
19 Kemae anjo sikamma na’bita le’baka angkana tena nalabattu karaeng Babel ambundukiki’ karaeng siagang anne pa’rasanganga?
20 Kamma-kamma anne, karaeng nipakala’birikku, kipilangngeri laloi anne pappalakku. Tea’ laloki kiringia’ ammotere’ mange ri balla’ tarungku niaka ri balla’na Yonatan, gassingka matea’ sallang anjoreng."
21 Jari naparentakammi Karaeng Zedekia sollangku nitarungku ri bageang paranglakkenna balla’ karaenga. Jari ammantamma’ anjoreng; allo-alloku nisare roti battu ri tampa’ papparekang rotia, sa’genna la’busu’ ngaseng parsadiaang rotia ri anjo kotaya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA