Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Nebukadnesar raja Babilon mahanca Sedekia anak si Josia raja Juda, nggancihken Raja Joyakin anak si Joyakim.

² Tapi subuk Sedekia, pegawai-pegawaina bage pe bangsa e, sada pe la nggit ngikutken kata si nggo ibereken TUHAN man bangku.

³ Isuruh Sedekia si Jehukal anak Selemia ras Imam Sepanya anak si Maaseya mindo gelah ertoto aku man TUHAN Dibata kami guna kami.

⁴ Tupung e aku langa ipenjaraken tapi bebas denga i tengah-tengah bangsa e.

⁵ Tentera Babilon nggo ngkepung Jerusalem, tapi tupung ietehna maka tentera Mesir nggo ngelepari perbalengen Mesir, emaka mundur ia.

⁶ TUHAN Dibata nu Israel nuruh aku

⁷ melasken kata enda man Sedekia, "Tentera Mesir sangana i bas perdalanen lako nampati kam, tapi mulihken denga ia ku Mesir.

⁸ Emaka reh ka tentera Babilon, iperangna kota enda, irebutna jenari icilukna.

⁹ Aku TUHAN mpersingeti kam maka ula ibualindu bandu alu ngataken maka tentera Babilon lanai bo reh.

¹⁰ Aminna pe kerina tentera Babilon italukenndu dingen si luka-luka nari ngenca tading i bas kemahna, tapi keke denga nge ia jenari icilukna kota enda seh rata ras taneh."

¹¹ Tentera Babilon mundur i Jerusalem nari sabap tentera Mesir nggo erdeherna.

¹² Emaka kutadingken Jerusalem guna lawes ku daerah Benyamin muat erta tading-tadingen keluargangku.

¹³ Tapi kenca aku seh i Pintu Gerbang Benyamin, i je kapten tentera si erjaga eme Jeria anak si Selemia kempu si Hanania. Itahanna aku jenari nina, "Lompat atendu man kalak Babilon!"

¹⁴ Ningku ngaloisa, "Labo! Labo aku lompat." Tapi la aku ibegiken si Jeria. Itangkapna aku jenari ibabana ngadap si erkuasa.

¹⁵ Merawa kal kalak e man bangku. Emaka isuruhna kalak ngeligasi aku, ikurungna aku i bas rumah Jonatan, sekretaris kerajan. Rumahna e nggo ijadiken penjara.

¹⁶ Itamakenna aku i bas kamar tahanen teruh taneh janah ndekah kal aku i je.

¹⁷ Dungna isuruh Raja Sedekia kalak ngelegi aku dingen i jah i bas istana e alu ise pe la lit si metehsa isungkunna aku nina, "Lit kang kata i bas Dibata nari?" Ningku enjabapsa, "Lit" "Nandangi iendesken me kam ku bas kuasa raja Babilon!"

¹⁸ Kenca bage nungkun aku ningku, "Kai kin kejahatenku man bandu ras man pegawai-pegawaindu ras man bangsa enda maka aku ipenjarakenndu?

¹⁹ Kai kin jadina nandangi nabi-nabindu si ngatakenca man bandu maka raja Babilon la reh nerang kam ras negeri enda?

²⁰ Emaka genduari, o Raja, kupindo man bandu gelah ibegikenndu aku janah nehken pemindonku man bandu. Ulanai min aku iulihkenndu ku penjara rumah si Jonatan. Adi iulihkenndu, ugapa pe mate aku i jah."

²¹ Emaka isuruh Raja Sedekia aku ipenjaraken i kesain pengawal istana. I jah me aku tading. Tep-tep wari ibereken man bangku sada roti i bas tukang roti nari, seh ngayak keri roti i kota e.

Yeremia

Video Yeremia 37

Ikuti Kami:

KONTAK | PARTISIPASI | DONASI