Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri taung makaappa’ Yoyakim ana’na Yosia a’jari karaeng ri Yehuda, nakana Batara ri nakke,
2 "Angngalleko se’re kitta’ nigulung, siagang tulisiki lalang sikontu apa le’baka Kupau ri kau ri passala’na Israel siagang Yehuda, kammayatompa ri passala’na sikontu bansaya. Tulisiki sikontu kana-kanangKu appakkaramula ri uru-uru a’bicaraKu ri kau ri wattu pamarentahanna Karaeng Yosia sa’genna anne alloa.
3 Gassingka lammariji tu Yehuda a’gau’ ja’dala’ punna nalangngere’ ke’nanga passala’na sikontu bala laKupabattua mae ri ke’nanga. Jari akkullei laKupammopporang dosana siagang kaja’dallanna ke’nanga."
4 Lanri kammana anjo kukio’mi Barukh ana’na Neria nampa kusuro antulisi’ ngasengi sikontu apa Napaua Batara mae ri nakke. Jari natulisi’ ngasemmi Barukh lalang ri anjo kitta’ nigulunga.
5 Nampa kusare anne parentaya angkana, "Tenamo kunipa’biang antama’ ri Balla’Na Batara.
6 Lanri kammana anjo, punna narapi’ sallang allonna appuasa taua, musti a’lampako mange anjoreng, nampa nubaca nulompoi sa’rannu sikontu anjo kusuro tulisika mae ri kau, sollanna nalangngere’ ngaseng ke’nanga apa Napaua Batara mae ri nakke. Gaukangi anjo kammaya ri tampa’ akkullea nalangngere’ ngasengko tau niaka lalang ri Balla’Na Batara, kammayatompa tu Yehuda battua ri kota-kotana ke’nanga.
7 Gassingka lanri kammana anjo nalappala’ doang ke’nanga mae ri Batara, siagang toba’ battu ri panggaukang-panggaukang ja’dala’na ke’nanga. Teai sipato’ larroNa Batara mae ri ke’nanga siagang Naancangi ke’nanga."
8 Jari nabacami Barukh anjo kana-kananNa Batara lalang ri Balla’Na Batara, sangkamma nipassuroanga mae ri ia.
9 Ri bulang salapang taung makalima pamarentahanna Yoyakim karaeng Yehuda, appuasai ra’yaka untu’ ampalaki pangngamaseanNa Batara. Pandudu’na Yerusalem siagang sikamma tau battua ri kota-kota Yehuda, appuasa ngasengi.
10 Nampa nabaca Barukh battu ri kitta’ nigulunga sikontu apa-apa le’baka kupau, nampa appilangngeri ngaseng taua. Anjo kittaka nibacai lalang ri Balla’Na Batara ri kantoro’na Gemarya, ana’na Safan, jurutulisi’na pamarentaya. Anjo kantoroka niaki ri bageang rateang parang lakkenga, rampi’na oloang antamaya ri Pakke’bu’ Lompo Beruna Balla’Na Batara.
11 Mikhaya ana’na Gemarya siagang cucunna Safan nalangngereki Barukh ambacai kana-kananNa Batara battu ri anjo kitta’ nigulunga.
12 Nampa a’lampamo mange ri balla’ karaenga, ri kantoro’na juru tulisi’na pamarentaya. Sitabangi rapa’ anjoreng sikontu pagawe pamarentaya. Delaya ana’na Semaya, Elnatan ana’na Akhbor, Gemarya ana’na Safan, Zedekia ana’na Hananya, Elisama sitau jurutulisi’, siagang sikamma pagawe maraenga niaki anjoreng.
13 Napaui mae ri ke’nanga sikontu anjo apa nabacaya Barukh ri Balla’Na Batara.
14 Nampa anjo sikamma pagawea nasuromi Yehudi (iamintu ana’na Netanya, cucunna Selemya, siagang cucu kulantu’na Kusyi) a’lampa mange ri Barukh siagang naparentakang sollanna nierang battu mae ri ke’nanga anjo kitta’ nigulung le’baka nibaca. Jari battumi Barukh angngerangi anjo kittaka.
15 Nakanamo ke’nanga ri Barukh, "Maeki’ ammempo. Kibacang tossai ikambe anjo kitta’ nigulunga." Naturukiammi Barukh ero’na ke’nanga.
16 Le’baki nabaca Barukh, sicini’-cinikimi ke’nanga para ia, lussa’mi pa’mai’na ke’nanga, nampa nakana ri Barukh, "Musti nalaporoki ikambe anne passalaka mae ri karaenga."
17 Nampa akkuta’nang ke’nanga angkana, "Coba sai pauang ikambe antekamma batenu antulisi’ ngasengi anne. Apaka Yeremia ampauangko?"
18 Appialimi Barukh angkana, "Kammatojengi. Sikontu kana-kana tattulisika anrinni Yeremia ngaseng ampauanga’, nampa kutulisi’ siagang dawa’ anrinni ri kitta’ nigulunga."
19 Nakanamo ke’nanga, "Ikau siagang Yeremia musti acokkoko. Tea’ laloko naniakki tau angngassengi tampa’ paccokkoannu anjo."
20 Anjo sikamma pagawea naboliki anjo kitta’ nigulunga ri kamara’na Elisama, anjo juru tulisika, nampa a’lampa mange ri karaenga allaporo’ ngasengi anjo passalaka.
21 Nampa nasuro karaenga Yehudi mange angngallei anjo kitta’ nigulunga. Le’baki naalle battu ri kamara’na Elisama, nabacakammi Yehudi anjo kittaka mae ri karaenga kammayatompa mae ri sikamma pagawe niaka ammenteng ri tammulilina.
22 Anjo wattua bulang salapang, siagang sitabangi karaenga ammempo ri dallekanna pa’binrunganga ri balla’ karaenga ri wattu dinginga.
23 Kamma le’ba’na Yehudi ambacai tallu yareka appa’ barisi’ naung, napolommi anjo bageanga siagang lading ca’di nampa napasambila antama’ ri pepeka. Kammami anjo tulusu’ nagaukang sa’genna la’busu’ natunu ngaseng sikontu anjo kitta’ nigulunga.
24 Manna pole sanna’ napala’na Elnatan, Delaya, siagang Gemarya sollanna tena natunui karaenga anjo kitta’ nigulunga, mingka taerokai karaenga ampilangngeri ke’nanga. Baji’ nakaraenga kammayatompa sikamma pagawe allangngerekai bonena anjo kittaka tena na’jari malla’ yareka assesse’ lalang nicini’.
25 (36:24)
26 Ba’lalo karaenga naparentakangi ri ana’ bura’nena iamintu Yerahmeel siagang Seraya ana’na Azriel siagang Selemya ana’na Abdeel, sollanna najakkalakka’ siagang Barukh juru tulisikku. Mingka nicokkoi ikambe ri Batara.
27 Le’baki Karaeng Yoyakim natunu anjo kitta’ nigulung kusuro tulisika ri Barukh, Nasuroma’ Batara
28 angngalle kitta’ nigulung maraeng, nampa kusuro tulisi’ sikontu apa le’baka tattulisi’ ilalang ri anjo kitta’ nigulung makase’rea.
29 Nasuroa’ Batara ampauangi karaenga kamma anne, "Le’baki nutunu anjo kitta’ nigulunga, siagang akkuta’nangko ri Yeremia angkana angngapa natulisiki angkanaya labattui karaeng Babel angngancuruki anne pa’rasanganga kammayatompa ambunoi pandudu’na siagang olo’-olo’na.
30 Lanri kammana anjo, iNakke, Batara, akkana ri kau, he Karaeng Yoyakim, angkanaya tena manna sitau battu ri jari-jarinu lammarenta salaku karaeng jari-jarina Daud. Maya’nu lanipasambilai assulu’, nitaba ri bambang allo ri wattu singara’na alloa, siagang nituju ri saliu’ dinging ri wattunna bangngi.
31 Ikau, jari-jarinu, siagang sikamma pagawenu laKuhukkungko lanri dosa-dosa nugaukanga ngaseng. LappabattuA’ mae ri kau ngaseng sikontu bala le’baka Kupau, lanri baji’ naikau kammayatompa pandudu’na Yerusalem siagang Yehuda tena nanuparhatikangi anjo sikontu apa Kuancangngangko."
32 Langngallea’ kitta’ nigulung beru, nampa kupassareang mae ri Barukh juru tulisikku. Nampa lanatulisiki sikontu apa kupaua mae ri ia, iamintu bonena anjo kitta’ nigulung makase’rea, siagang nitambai siapa are pole pasang sangkammaya anjo.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA