Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E taon se kapeng empa’ saellana Yoyakim pottrana Yosiya jumenneng rato Yehuda, PANGERAN adhabu ka sengko’,
2 "Kassa’ ngala’ ketab gulungan settong, pas toles e jadhiya sabarang se ekoca’agi Sengko’ ka ba’na parkara Isra’il ban Yehuda, ban parkara sa-bangsa laenna kabbi. Toles sakabbinna Tang oca’ molae Sengko’ dha’-adha’na acaca ka ba’na e jaman pamarenta’anna Rato Yosiya sampe’ are teya.
3 Pola oreng Yehuda me’ pas ambu se alako jahat mon ngedhing parkara sakabbinna balai se bi’ Sengko’ eteba’agiya ka reng-oreng jareya. Mon kantha jareya dusa ban kajahadanna reng-oreng jareya bi’ Sengko’ esapora’a."
4 Daddi sengko’ pas ngolok Barukh ana’na Neriya; bi’ sengko’ Barukh jareya edhikte sabarang se edhabuwagi PANGERAN ka sengko’. Jareya kabbi bi’ Barukh etoles e dhalem ketab gulungan gella’.
5 Saellana jareya sengko’ laju aberri’ parenta kantha reya ka Barukh, "Sengko’ ta’ eedine maso’ ka Padalemman Socce pole.
6 Daddi, mon dhapa’ arena oreng apowasa, ba’na kodu entar dha’ essa’. E jadhiya baca’agi pakaja sabarang se edhikteyagi sengko’ ka ba’na gella’, me’ olle oreng padha ngedhing sabarang se edhabuwagi PANGERAN ka sengko’. Ba’na kodu maca jareya e kennengngan se bisa’a sowarana ba’na ekaedhing bi’ saneyap oreng se badha e Padalemman Socce, tamaso’ reng-oreng Yehuda se dhateng dhari tha-kotthana.
7 Olle daddi polana ngedhing baca’an jareya reng-oreng jareya pas adu’a ka PANGERAN ban atobat dhari kon-lalakonna se jahat. PANGERAN ce’ dukana ban amaksod ngokoma reng-oreng jareya."
8 Daddi Barukh maca’agi dhabuna PANGERAN e Padalemman Socce, akantha se eparenta’agi bi’ sengko’.
9 E bulan se kapeng sanga’ taon se kapeng lema’ pamarenta’anna Yoyakim rato Yehuda, ra’yat apowasa sopaja ekabellasana bi’ PANGERAN. Pandhudhu’ Yerusalim ban reng-oreng se dhateng dhari tha-kottha Yehuda, kabbi padha apowasa.
10 Barukh pas maca dhari ketab gulungan gella’ pa-apa se ekoca’agi bi’ sengko’, ban reng-oreng padha ngedhingngagi kabbi. Se maca jareya neng e dhalem Padalemman Socce e kantorra Gemariya, ana’na Safan se daddi sekettarissa nagara. Kennengnganna kantor jareya e taneyanna se badha e bagiyan attas, e seddi’na jalan mon maso’a ka Labang Saketheng Anyar e Padalemman Socce.
11 Mikhaya ana’na Gemariya, kompoyya Safan ngedhing Barukh maca’agi dhabuna PANGERAN dhari ketab gulungan jareya.
12 Mikhaya jareya pas entar ka karaton, ka kantorra sekettarissa nagara. E jadhiya sakabbinna pangraja parappa’na arapat. Delaya ana’na Semaya, Elnatan ana’na Akhbor, Gemariya ana’na Safan, Zedekiya ana’na Hananya, Elisama se daddi sekettaris, ban ja-pangraja laenna padha badha e jadhiya.
13 Mikhaya abala ka reng-oreng jareya sabarang se ebaca’agi Barukh e Padalemman Socce.
14 Para pangraja jareya pas ngotos Yehudi (iya reya ana’na Netanya, kompoyya Selemiya, peyo’na Kusyi) ka Barukh, Barukh eparenta’agi sopaja ngadhep ka ja-pangraja jareya sambi ngeba ketab gulungan se la ebaca’agi gella’. Daddi Barukh entar ka kennengngan jareya sambi ngeba ketab gulungan gella’.
15 "Ngereng eatore lenggi," ca’na ja-pangraja jareya, "tore baca’agi ketab gulungan ganeka e adha’na kaula sakanca paneka." Barukh atoro’ ka parenta jareya.
16 Saellana mare se ebaca, reng-oreng jareya padha saleng pandeng kalaban kene’ ate sarta pas ngoca’ ka Barukh, "Kaula sakanca kodu arepottagi parkara paneka ka rato."
17 Saellana jareya reng-oreng jareya atanya, "Tore kaula parenge oneng, kadi ponapa sampeyan se noles ganeka sadaja? Ponapa sampeyan edhikte Yeremiya?"
18 "Enggi lerres, sadajana oca’ se etoles kaula e ketab paneka edhikteyagi sareng Yeremiya ka abdina, sareng abdina pas etoles ngangguy mangsen e ketab gulungan paneka," saodda Barukh.
19 "Sampeyan ban Yeremiya kodu ngetek. Ja’ sampe’ pangetegganna ekataowe oreng," ca’na reng-oreng jareya.
20 Ja-pangraja jareya nyaba’ ketab gulungan gella’ e kamarra Elisama, sekettaris gella’, saellana jareya pas padha nyabis ka rato sarta areppot parkara jareya kabbi.
21 Rato pas makon Yehudi ngala’ ketab gulungan gella’. Saellana ngala’ ketab jareya dhari kamarra Elisama, Yehudi maca’agi essena ka rato ban ka sakabbinna pangraja se parappa’na manjeng e sakalenglengnga rato jareya.
22 E bakto jareya bulan sanga’, ban rato parappa’na alenggi e adha’na pangendhuwan e karaton mosem cellebba.
23 Yehudi buru maca olle tello’ otaba pa’ kolom, bagiyan jareya bi’ rato pas eketthok bi’ ladding sarta eontallagi ka dhalem apoy. Se kantha jareya ros-terrosan sampe’ bagiyanna ketab gulungan jareya eobbar kabbi tadha’ karena.
24 Maske Elnatan, Delaya, ban Gemariya nyo’on kalaban sanget sopaja rato ta’ ngobbara ketab gulungan jareya, tape rato ta’ meyarsa’agi. Rato ban ja-pangraja se meyarsa essena ketab jareya ta’ daddi tako’ ban ta’ katon atobat e dhalem atena.
25 (36:24)
26 La’-mala’ rato makon pottrana, iya reya Yerahme’el, abareng ban Seraya ana’na Azriyel ban Selemiya ana’na Abde’el, mega’ sengko’ ban Barukh tang sekettaris. Tape PANGERAN ngerrep sengko’ ban Barukh.
27 Saellana Rato Yoyakim ngobbar ketab gulungan se edhikteyagi sengko’ ka Barukh jareya, sengko’ bi’ PANGERAN epakon
28 ngala’ ketab gulungan laenna sarta noles sakabbinna se la etoles e ketab gulungan se kapeng settong gella’.
29 PANGERAN makon sengko’ ngoca’ kantha reya ka rato, "Ba’na la ngobbar ketab gulungan rowa, ban ba’na atanya ka Yeremiya arapa Yeremiya jareya me’ ngoca’ ja’ rato Babil bakal dhatengnga kaangguy ngancora nagara reya ban mateyana reng-orengnga sarta ban-kebanna.
30 Daddi, Sengko’, PANGERAN, sateya ngoca’a ka ba’na, he Rato Yoyakim, ja’ dhari toronanna ba’na tadha’ settonga se bakal marenta’a karaja’anna Daud. Mayyidda ba’na bakal eontallagiya ka lowar, kapanasan e bakto seyang, kaebbunan e baja malem.
31 Ba’na dibi’, toronanna ba’na ban para pangrajana ba’na bi’ Sengko’ eokoma polana sa-dusana ba’na. Ba’na kabbi bi’ Sengko’ epadhatengngana balai se bi’ Sengko’ la ekasajja eteba’agiya ka ba’na, sabab Sengko’ la asajja neba’agiya balai jareya ka ba’na kabbi polana ba’na, ban bariya keya pandhudhu’ Yerusalim sarta oreng Yehuda padha ta’ parduli ka parengeddan dhari Sengko’."
32 Daddi sengko’ pas ngala’ ketab gulungan se anyar, laju ebagi ka Barukh tang sekettaris. Barukh pas noles sabarang se edhikteyagi bi’ sengko’, iya reya essena ketab gulungan se kapeng settong, etambai sen-pessen laenna se dha’-padha’a ban jareya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA