Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai roh ma hata ni Jahowa paduahalihon hubani si Jeremia, sanggah tartutup ope ia bani ianan ni siparjaga:
2 Sonon do hata ni Jahowa na mangadongkon tanoh on, na manjadihon ampa na pajonamkon ai, Jahowa do goran-Ni,
3 “Dilo ma Ahu, jadi balosan-Ku do ho, anjaha pabotohkonon-Ku do bam pasal habanggalon ampa rusia na so binotohmu ope.
4 Ai sonon do hata ni Jahowa, Naibata ni Israel, pasal rumah-rumah na i huta on ampa rumah-rumah ni raja-raja ni Juda, na dob pinarseda bahen partahanan dompak munsuh,
5 laho manlawan halak Kasdim, ai ma rumah-rumah na gok bani bangkei ni jolma, na dob Hubunuh ibagas ringis-Ku ampa ibagas gilang-Ku, ai domma Hupadaoh bohing-Ku hun huta on halani haganup hajahaton ni sidea.
6 Tonggor ma, parohon-Ku do hajorgiton ampa hamalumon bani huta on; pamalumon-Ku do sidea anjaha patalaronku do bani sidea hadoharon ampa hadameion na manongtong.
7 Pasuangon-Ku do Juda ampa Israel, anjaha pajongjongon-Ku do sidea songon na bani mulani.
8 Urason-Ku do sidea humbani haganup hajahaton ni sidea, na binahen ni sidea ai dompak Ahu, anjaha sasapon-Ku do haganup panlanggaron ni sidea ampa panlawanon ni sidea na dompak Ahu.
9 Anjaha huta on gabe goran malas ni uhur ma on Bangku ampa puji-pujian ampa hamuliaon i lobei ni sagala bangsa-bangsa na i tanoh on, na mambogei sagala na madear na Hubahen bani; tarsonggot anjaha gobir ma sidea halani haganup na madear pakon hadoharon na Hubahen bani huta on.
10 Sonon do hata ni Jahowa, ʻBani ianan on, na hinatahonnima ai: Domma maseda in, seng dong be jolma ampa pinahan ijin, sonai ibagas huta-huta ni Juda ampa bani dalan-dalan na i Jerusalem, na dob halong ai, anjaha seng marisi jolma be atap pinahan,
11 maningon tarbogei do ijai sora olob-olob pakon sora malas ni uhur, sora ni siparunjuk pakon sora ni tunangan, sora ni halak sipandoding, sanggah mamboan galangan puji-pujian sidea hu rumah ni Jahowa: Puji ma Jahowa Zebaot, ai pardear layak do Jahowa, ronsi sadokah ni dokahni do idop ni uhur-Ni.ʼ Ai pasuangon-Ku do tanoh in songon na bani mulani, nini Jahowa.
12 Sonon do hata ni Jahowa Zebaot, ʻBani ianan on, na dob halong on, na so marisi jolma atap pinahan pe, sonai homa ibagas haganup huta-hutani, maningon dong do use sampalan ni parmahan bahen parmahanan ni pinahan ni sidea.ʼ
13 Bani huta na i pardologan, bani huta-huta na i bornoh-bornoh ampa bani huta-huta i Dangsina, bani tanoh Benjamin, bani tanoh inggot ni Jerusalem ampa bani huta-huta ni Juda, maningon montas do ijai hulanan ni biribiri hun toruh ni tangan ni halak sipangkira, nini Jahowa.”
14 Tonggor ma, na roh ma panorangni, nini Jahowa, pasaudon-Ku ma ijai bagah-bagah na dob Hubahen bani ginompar ni Israel ampa bani ginompar ni Juda.
15 Bani ari ai ampa bani panorang ai bahenon-Ku do martumbor sada Tumbor na pintor bani si Daud; dalankononni do hasintongan ampa hapintoron i tanoh on.
16 Bani panorang ai maluah ma Juda anjaha marsonang-sonang Jerusalem marianan. Anjaha on do goranni hatahonon ni halak, “Jahowa parpintoranta.”
17 Ai sonon do hata ni Jahowa, “Seng be rotap humbani si Daud sada halak na hundul bani paratas ni ginompar Israel.
18 Anjaha humbani malim-malim na humbani marga Lepi pe, seng rotap be humbani sidea halak na mamboan galangan situtungon hu lobei-Hu, na manutung galangan sipanganon ampa na pasirsirhon galangan sisayaton tongtong.
19 Dob ai roh ma use hata ni Jahowa bani si Jeremia,
20 Sonon do hata ni Jahowa, ʻSongon na so boi langkononnima padan-Ku na bani torang ari ampa padan-Ku na bani borngin, gabe seng roh arian ampa borngin bani panorang na dob tinontuhon bani,
21 sonai ma seng tarparontihon padan-Hu na bani si Daud juakjuak-Kai; gabe seng dong bani sada anak na marrajai bani paratasni, sonai homa padan-Ku bani malim-malim na humbani marga Levi, na marugas Bangku.
22 Songon bala ni langit na so tarbilang ai ampa horsik ni laut na so tarsuhati ai, sonai do pabueion-Ku ginompar ni si Daud juakjuak-Kai, ampa halak Levi na marugas Bangku.”
23 Dob ai roh ma use hata ni Jahowa bani si Jeremia,
24 “Ai lang ibotoh ho do na hinatahon ni bangsa on, ʻIambukkon Jahowa do na dua suku, na pinilih-Ni in?ʼ Mapas do uhur ni sidea mangidah bangsang-Ku, sedo bangsa be ai ihira uhur ni sidea.
25 Sonon do hata ni Jahowa, ʻSongon Ahu na manompa arian pakon borngin, anjaha Ahu na manotapkon aturan bani langit pakon tanoh on,
26 sonai do seng anjai ambukkonon-Ku ginompar ni si Jakob ampa ginompar ni si Jakob ampa ginompar ni si Daud juakjuak-Kai, gabe seng be Hubuat humbani ginomparni panggomgom bani ginompar ni si Abraham, si Isak pakon si Jakob.ʼ Tongon, pasuangon-Ku do sidea, anjaha maidop do uhur-Hu mangidah sidea.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA