Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tupung aku ipenjaraken denga i bas kesain pengawal istana e, reh ka kata TUHAN man bangku,
2 TUHAN si nggo njadiken dingen nepa doni enda janah encibalkenca i bas inganna. Ia kap si ngerana man bangku. Ia, si gelarna eme kap TUHAN ngataken,
3 "Lebuhlah Aku emaka Kualoi kam. Kuturiken ateKu man bandu perkara-perkara si mbelin si la terantusindu.
4 Aku kap TUHAN Dibata nu Israel ngataken maka kerina rumah i Jerusalem dingen istana kerajan Juda iruntuhken me. Sia-sia saja kam lawes erperang ngelawan benteng-benteng si nggo ipajekken kalak Babilon. Si e erbahanca kota enda dem alu bangke-bangke kalak si Kugudam alu pernembeh dingen rawangKu si gara. Nggo Kutundalken kota enda erkiteken kejahaten-kejahaten si nggo ilakoken kalak si i je.
5 (Yer 33:4)
6 Tapi Aku si nambari kota ras rayatna dingen Kubereken mulihi man bana kejuah-juahen. Kucidahken man bana dame la teralang ras ketenengen.
7 Kubahan maka makmur me Juda ras Israel. Jenari Kupanteki mulihi bali ras si nai.
8 Kubersihken ia i bas dosa-dosana nari si nggo ilakokenna kempak Aku. Kualemi me dosa-dosa dingen pemberontakenna.
9 Jerusalem jadi ulu keriahen, kehamaten, kemegahen man bangKu. Kerina bangsa i bas pertibi enda mbiar janah nggirgir tupung ibegina si mehuli si Kubahan man kalak Jerusalem janah ngidah kemakmuren si Kubereken man kota e."
10 Nina TUHAN, "Ikataken bangsa emaka ingan enda nggo lanai bali ras gurun pasir janah lit i je nggeluh manusia ntah rubia-rubia. Payo kap katana e; kota-kota Juda ras dalan-dalan i Jerusalem nggo lume. La lit manusia ntah rubia-rubia nggeluh i je. Tapi i bas ingan enda ibegindu ka
11 sora surak-surak si meriah, dingen sora keriahen kerja erdemu bayu. Ibegindu sora rende tupung ia maba persembahen pengataken bujur ku bas Rumah PertotonKu nina, 'Kataken bujur man TUHAN si Mada Kuasa sabap mehuli kal Ia dingen tetap asa lalap keleng AteNa.' Aku si erbahanca maka mehumur negeri enda bali ras si nai. Aku TUHAN kap si melasken ranan enda."
12 Nina TUHAN si Mada Kuasa, "I bas negeri si bali ras gurun pasir enda i ja la lit manusia ras rubia-rubia nggeluh, jadi ka me ia mbal-mbal si meratah man ingan permakan mpermakani biri-birina.
13 I bas kota-kota i datas uruk-uruk, ture deleng, i Selatan Juda, i bas daerah Benyamin, i bas kota-kota i sekelewet Jerusalem, dingen i bas kota-kota Juda, ibeligai permakan me mulihi biri-birina. Aku TUHAN kap si nggo melasken ranan enda."
14 Nina TUHAN, "Seh me paksana Aku nehken janjingKu man kalak Israel ras Juda.
15 Tupung e pagi Kuangkat sekalak raja si bujur i bas kesusuren Daud nari. Raja e bujur dingen adil perbahanenna i belang-belang negeri enda.
16 Kalak Juda ras Jerusalem ipulahi me jenari enggeluh me ia i bas dame. Kota e pagi igelari kalak: 'TUHAN kap si Engkelini kita'.
17 Aku TUHAN kap si erjanji maka tetap pagi kesusuren Daud jadi raja Israel,
18 dingen suku Lewi jadi imam si ngelai Aku dingen mereken persembahen tutungen, persembahen pangan, dingen persembahen gelehen man bangKu."
19 Nina TUHAN man bangku,
20 "Nggo Kubahan perjanjin ras suari bage pe berngi maka tetap ia reh i bas paksana. Janah ndigan pe perjanjin e la banci ceda.
21 Bage ka nge Kubahan perjanjin ras suruh-suruhenKu Daud. Tetap nge lit kesusurenna jadi raja. Nggo Kubahan perjanjin ras imam i bas suku Lewi nari maka ia tetap si ngelai Aku, janah asa ndigan pe perjanjin e la banci ceda.
22 Ertambah-tambah me lalap beligan kesusuren suruh-suruhenKu Daud ras beligan imam-imam i bas suku Lewi nari. Seh maka lanai terbeligai, bali ras bintang-bintang i langit dingen kersik i tepi lawit pe la terbeligai."
23 Nina TUHAN man bangku,
24 "La kin iperdiatekenndu kai si ikataken kalak e? Ikatakenna maka nggo Kutulak Israel ras Juda dua keluarga si nggo Kupilih. Alu bage megombang ia man bangsangKu janah lanai ikirana bagi sada bangsa.
25 Tapi Aku kap TUHAN si nggo erjanji ras berngi ras suari, janah nggo Kubahan undang-undang si ngatur doni ras langit.
26 Bagi pastina Kulakoken si e, bage me penjagangKu perjanjinKu ras kesusuren Jakup dingen suruh-suruhenKu Daud. Kupilih sekalak i bas kesusuren Daud nari si jadi raja i bas kesusuren Abraham, Isak ras Jakup. Mekuah ateKu ngenehen bangsangKu emaka Kubahan maka senang ka akapna mulihi."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA