Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 PANGERAN adhabu, "Bakal napa’a baktona Sengko’ daddiya Allahna sakabbinna suku Isra’il, ban reng-oreng Isra’il, ban reng-oreng Isra’il daddiya Tang ommat.
2 E tengnga ra-ara Sengko’ noduwagi bellassa Tang ate ka Tang ommat se lopot dhari pate jareya. E bakto ommat Isra’il nyare kataremtemman,
3 dhari jauna Sengko’ ngaton ka reng-oreng jareya. He ommat Isra’il, molae lamba’ Sengko’ ros-terrosan taresna ka ba’na, ban saterrossa Sengko’ paggun noduwagiya ja’ Sengko’ teptep taresna ka ba’na.
4 Bangsana ba’na bi’ Sengko’ epajaja’a pole. Sakaleyan aggi’ ba’na bakal ngala’a terbang sarta bakal atariya kalaban gumbira.
5 Ba’na bakal mokka’a kebbunna anggur e pagunongan Samaria, ban se namen jareya bakal molonga buwana keya.
6 Onggu, bakal napa’a baktona pangawalla kottha bakal padha’a aera’ e pagunongan Efraim, ‘Mara ja’ ongga’a ka Siyon, ka PANGERAN Allahna sengko’ ban ba’na.’"
7 PANGERAN adhabu, "Mara anyanye paperak kaangguy Isra’il Tang ommat, bangsa se paleng raja e antarana sakabbinna bangsa. Mara anyanye lagu pojiyan, pas berta’agi, ‘PANGERAN la masalamet re-karena ommadda.’
8 Reng-oreng jareya bi’ Sengko’ egiba abali dhari dhaja; bi’ Sengko’ epakompol dhari co’-konco’na bume. Oreng buta ban oreng empon bakal noro’a keya, bariya keya reng-oreng bine’ se gi’ buru rembi’ ban se ngandhung raja. Reng-oreng jareya bakal abaliya ka nagara reya menangka bangsa se raja.
9 Reng-oreng jareya ajalan kalaban agarabas aeng mata, bi’ Sengko’ ebarengnge sarta elepor atena. Reng-oreng jareya bi’ Sengko’ egiba lebat e kennengngan se bannya’ aengnga, lebat e lorong se rata tadha’ ba’-celbingnga, daddi ta’ kera badha se tatandhung sokona. Monggu ka Isra’il, Sengko’ reya padha ban eppa’na; Efraim Tang ana’ se sareyang."
10 PANGERAN adhabu, "Edhingngagi, he sa-bangsa! Lengkae tase’ raja ban panapa’ Tang pessen reya: Tang ommat se bi’ Sengko’ la epabalessadan, bi’ Sengko’ epakompola pole ban epeyara’a, padha ban tokang ngowan se ajaga dumbana.
11 Bi’ Sengko’ ommat Isra’il la epa salamet ban epabebas dhari bangsa se kowat.
12 Ka Gumo’ Siyon reng-oreng jareya bakal dhatengnga mowana katon binar sambi anyanye kalaban ate perak, lantaran Tang ri’-berri’ ka reng-oreng jareya, se aropa gandum, mennya’, anggur, sape ban dumba. Reng-oreng jareya bakal padha’a ban bun-kebbunan se cokop aengnga, ban ta’ kakorangan pa-apa.
13 E bakto jareya ban-paraban bakal atariya kalaban ate se perak. Oreng towa ban oreng ngodha padha senneng pekkeranna, sabab Sengko’ alepora atena. Kasossa’anna bi’ Sengko’ eoba epadaddi kasennengngan, karekonganna eoba epadaddi kagumbira’an.
14 Mam-imam bi’ Sengko’ epatobuga ban kakanan se wa-ngalowa; ban pa-apa se ekabuto Tang ommat bi’ Sengko’ eberri’ana. Sengko’, PANGERAN, se ngoca’."
15 PANGERAN adhabu, "Neng e Rama badha sowarana oreng nanges, ban sowarana oreng aserrowan. Rahel nangese na’-ana’na, ta’ endha’ elepor atena sabab na’-ana’na jareya la padha tadha’.
16 Mara ambu ba’na se nanges ban pakerreng aeng matana. Ta’ kera parcoma ba’na nyandhang lesso kaangguy na’-ana’na. Ba’na bakal olleya ganjaran, na’-ana’na moleya dhari nagarana mosona.
17 Gi’ badha pangarebban kaangguy ba’na pagi’: na’-ana’na ba’na moleya ka kampongnga.
18 Sengko’ ngedhing ommat Isra’il ngoca’ ce’ ngennessa, ‘Adhu GUSTE, abdidalem sadaja padha sareng keban se gi’ ta’ epanotot, namong sareng Junandalem eajari sopaja ta’at, ban samangken abdidalem sadaja ampon asadhiya se abaliya ka Junandalem. Daddi bakta’agi abali abdidalem sadaja, GUSTE Allah, Pangeran kaula.
19 Junandalem epongkore sareng abdidalem sadaja, namong abdidalem sadaja padha atobat. Saamponna abdidalem sadaja sareng Junandalem eparenge okoman, cethak abdidalem sadaja nondhu’ polana sossa. Abdidalem sadaja arassa malo sareng nespa, sabab ampon agabay dusa gi’ ngodhana.’
20 Isra’il, ba’na Tang ana’ kakase, ana’ se paleng kataresnan, buwana Tang ate. Sabban Sengko’ ngara ba’na, Sengko’ terros enga’ ka ba’na ban ce’ kerrongnga. Ba’na bi’ Sengko’ ekaneserrana.
21 Tandhai jalanna ba’na, pasange dha-tandha, sare jalan se elebadi ba’na lamba’. He, Isra’il, mara mole ka bengkona! Abali ka tha-kottha asalla.
22 Sampe’ bila ba’na se mangmanga terros, he bangsa se ta’ esto ka Sengko’? Sengko’ la nyepta’agi barang se anyar e dunnya, barang se ane, se anena padha ban babine’ se ngaobi oreng lake’."
23 PANGERAN Se Mahakobasa, Allahna Isra’il adhabu, "Mon Tang ommat bi’ Sengko’ egiba abali pole ka nagarana dibi’, e nagara Yehuda ban e sa-disana bakal ekaedhinga pole reng-oreng ngoca’, ‘Moga PANGERAN aberkadana gumo’ se socce e Yerusalim kennengnganna kalenggiyan se malolo kaagem Salerana.’
24 Oreng bakal ennengnga e Yehuda ban e sa-disana. E jadhiya bakal badha’a oreng tane ban oreng se meyara dumba ban sape.
25 Oreng se pendhet bi’ Sengko’ epacengngara, ban se lesso polana kalaparan epakennyanga.
26 E bakto jareya oreng bakal ngoca’a, ‘Samarena tedhung ngeddha, sengko’ arassa cengngar pole.’
27 Sengko’, PANGERAN, ngoca’ ja’ bakal napa’a baktona nagara Isra’il ban Yehuda bi’ Sengko’ epossa’ana ban manossa sarta keban.
28 Padha ban Sengko’ se lamba’ ajaga Isra’il ban Yehuda sopaja saellana jareya bi’ Sengko’ edabu’a, epagujura ban epaancora, bariya keya Sengko’ ajaga Isra’il ban Yehuda sopaja jareya bi’ Sengko’ epakokowa tor epaddegga pole.
29 E bakto jareya ta’ kera badha pole oreng se ngoca’, ‘Oreng towa ngakan buwa se celo’ rassana, tape ana’na se nyelo gigina,’
30 tape sapa se ngakan buwa se celo’ tanto nyelo dibi’ gigina. Oreng kabbi padha mateya polana dusana dibi’."
31 PANGERAN adhabu, "Bakal napa’a baktona Sengko’ mabadha’a parjanjiyan se anyar bi’ ommat Isra’il ban Yehuda.
32 Tape parjanjiyan jareya ta’ padha ban Tang parjanjiyan bi’ bangatowana ommat jareya e bakto Sengko’ abarengnge reng-oreng jareya kalowar dhari Messer. Maske Sengko’ reya padha ban lake monggu ka reng-oreng jareya, tape reng-oreng jareya mongkere parjanjiyan se ebadha’agi Sengko’ bi’ reng-oreng jareya.
33 Reya’ parjanjiyan se anyar se epabadha’a Sengko’ bi’ ommat Isra’il: Tang kom-hokom bi’ Sengko’ esaba’a e dhalem pekkeranna, ban etolesa e dhalem atena Tang ommat jareya. Sengko’ bakal daddiya Allahna ommat Isra’il, ban ommat Isra’il bakal daddiya Tang ommat.
34 Ta’ parlo pole badha e antarana se kodu ngajari sasamana sopaja taowa ka PANGERAN. Sabab reng-oreng jareya kabbi, raja kene’, bakal taowa ka Sengko’. Kasala’an-kasala’anna reng-oreng jareya bi’ Sengko’ ekaloppa’ana, sa-dusana esapora’a. Sengko’, PANGERAN, la ngoca’."
35 Are esadhiya’agi PANGERAN kaangguy nera’e seyang; bulan ban tang-bintang kaangguy nera’e malem. Tase’ bi’ Pangeran egaluy sopaja badha’a omba’na. PANGERAN Se Mahakobasa, jareya asmana.
36 PANGERAN ajanji, "Saabidda hokom alam ta’ aoba Isra’il menangka bangsa bakal teptebba badha.
37 Saompamana e settong bakto langnge’ ekenneng okor, ban dhasarra bume ekenneng talektegi, e bakto jareya Isra’il bi’ Sengko’ etolaga polana sakabbinna lalakonna se juba’. Sengko’, PANGERAN, la ngoca’."
38 PANGERAN adhabu, "Bakal napa’a baktona saantero Yerusalim epaddek pole daddi Tang kottha, dhari Manara Hanane’el sampe’ ka Labang Saketheng Paddu e bagiyan bara’.
39 Dhari jadhiya garis batessa nojju ka Gumo’ Gareb, pas abiluk ka Goa.
40 Saantero cora jareya, se ekagabay koburan ban pambuwanganna rombu, ban sakabbinna teggal e penggirra Songay Kidron sampe’ ka Labang Saketheng Jaran ka temor, bakal epamalolowa kaangguy Sengko’. Kottha Yerusalim ta’ kera epagujur otaba epaancor pole."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA