Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nina TUHAN, "Seh me paksana maka Aku me jadi Dibata man kerina suku-suku Israel janah ia me jadi bangsangKu.
2 I bas padang gurun nggo Kucidahken diringKu man kerina kalak si pulah i bas pedang nari. Tupung kalak Israel merincuh ngadi,
3 Kucidahken diringKu man bana i bas ingan si ndauh nari. O kalak Israel, keleng kap ateKu kam gelgel nari, emaka tetap nge Kucidahken man bandu perkuah ateKu.
4 Kupanteki ka me kam sekali nari. Ibuatndu ka me gendangndu jenari landek-landek alu meriah.
5 Isuanindu ka mulihi peken anggurndu i uruk-uruk Samaria? Kerina kalak si nuanca ipanna me ulih buah anggurna.
6 Tuhu seh me paksana kalak si erjaga erlebuh i datas deleng Eperaim nari nina, 'Ota kita nangkeng ku Sion, ndahi TUHAN Dibatanta.'"
7 Nina TUHAN, "Rende ersuraklah erkiteken Israel, Ia si mbisana i bas kerina bangsa-bangsa. Endekenlah ende-enden pujinndu, nindu, 'TUHAN nggo mulahi BangsaNa IkeliniNa kerina si tading.'
8 Kubaba ia i Utara nari, Kupepulung ia i tampuk doni nari. Kalak pentang ras cempang-cempang ikut ras ia, diberu si mehuli kulana bage pe si nandangi mupus. Mulihken ia jadi bangsa si mbelin.
9 Tupung Kubaba bangsangKu mulih, ngandung ia iherna ertoto Kubabai ia ku lau maler arah dalan si mejile maka la ia tertuktuk. Aku desken sekalak bapa man Israel, dingen Eperaim anakKu sintua."
10 Nina ka TUHAN tole, "O bangsa-bangsa dengkehkenlah, beritakenlah katangKu ku tepi lawit si ndauh. Kukerapken bangsangKu, tapi Kupepulung ka mulihken. Kukawali ia desken permakan engkawali rarasenna.
11 Nggo Kutebusi bangsa Israel, i bas bangsa si gegehen asangken ia, nggo Kukelini ia.
12 Reh me ia kerina dingen rende ersurak i Deleng Sion. Senang iakapna ngenanami pemerengKu, Kubereken man bana gandum, anggur ras minak saitun, rarasen biri-biri ras lembu. Ia desken peken si la kurang lau kai pe atena lit.
13 Singuda-nguda landek-landek dingen malem kal atena. Dilaki, anak perana ras parang mbelin senang iakapna kerina. Kuapuli ia jenari Kusalihken kecedan atena jadi keriahen, kepiceten jadi kesenangen.
14 Imam-imam Kubesuri alu si ntabeh bangsangKu ndatken kerina keperlunna. Aku TUHAN kap si melasken ranan enda."
15 Nina TUHAN, "Terbegi sora i Rama nari, sora tangis si meriso. Itangisi Rahel anakna, nggo bene kal kerina, emaka iapuli pe atena lang.
16 Ulanai kam ngandung, apusi iluhndu. Kerina si ibahanndu man anak-anakndu labo sia-sia; mulih me ia kerina i negeri musuh nari.
17 Lit kap pengarapen man Israel, anak-anakndu mulih me, Aku, TUHAN kap si nggo melasken ranan enda.
18 Kubegi kalak Israel ngandung nina: 'O TUHAN, bali kap kami ras rubia-rubia si la iasuhi, tapi IajarkenNdu kami gelah patuh. Baba min kami mulih; kami nggo sikap mulih ku Kam, perban Kam, TUHAN Dibata kami.
19 Itadingken kami Kam, tapi nggo kami merincuh mulih. Kenca IukumNdu kami tungkuk kami rate ceda. Mela dingen juru iakap kami, erkiteken dosa si ibahan kami tupung kami nguda denga.'
20 O Israel, anak kesayangenKu, buah barangKu si keleng ateKu. Tep-tep Kusingetken gelarndu, Kuinget kam i bas keleng ate; i bas kam lalap ukurKu, mekuah kal ateKu.
21 Pajekkenlah tanda-tanda i bas pasarndu, payo-payo perdiateken dalanndu si bentasindu ndube. O kalak Israel mulihlah, mulihlah ku kota-kota si nggo itadingkenndu.
22 Asa kai nari dekahna la tetap ukurndu, o bangsa si la setia? Nggo kutepa piga-piga perkara si mbaru dingen la pagi biasa, bagi sekalak diberu ngkawali dilaki."
23 Nina TUHAN si Mada Kuasa, Dibata nu Israel, "Kenca Kubaba pagi bangsa e mulih ku negerina, ikatakenna ka me pagi i bas negeri Juda ras i bas kota-kotana nina, 'Dibatalah si masu-masu deleng Jerusalem si badia, ingan si badia InganNa tading.'
24 Juda ras kota-kotana iingani me pagi mulihi. Lit me pagi i je perjuma, bage pe permakan ras biri-birina.
25 Kalak si nggo latih Kupegegehi, kalak si nggo kote perban melihe Kubesuri alu nakan.
26 Emaka nina bangsa e, 'Lawes aku medem, janah kenca medak senang dagingku.'
27 Aku TUHAN kap si ngatakenca maka seh me paksana maka bagi benih Kuamburken manusia ras asuh-asuhen ku negeri Israel ras Juda.
28 Bali ras tupung Aku ngeruah, ngeruntuhken, ngerontasken, ngeradasken dingen ngkernepken bangsa e, bage ka me Kusuan ia mulih dingen Kupanteki ka.
29 Adi paksa si e nggo seh, lanai bagenda nina bangsa e: Orang tua man buah anggur matah, ngilu ipen anak-anak.
30 Tapi, ise si man buah anggur matah, ipenna jine nge ngilu. Janah kerina kalak mate erkiteken dosana jine."
31 Nina TUHAN, "Seh me paksana Aku erbahan perpadanen si mbaru ras kalak Israel ras Juda.
32 Perjanjin si mbaru e la bali ras perjanjin si ndekah si Kubahan ras nini-ninina tupung Kucikep tanna dingen Kubaba ndarat i Mesir nari. Aminna pe Aku bali ras perbulangenna, tapi la icikepna perjanjin e.
33 Perjanjin si mbaru si ateKu Kubahan ras bangsa Israel bagenda me: Kutamaken undang-undangKu ku bas ukurna dingen Kusuratken e i bas pusuhna. Aku jadi Dibatana ia jadi bangsangKu.
34 La lit perlu kalak ngajari temanna sebangsa guna nandai TUHAN, sabap kerina kalak nandai Aku, menaken i bas si kitikna nari terus kempak si mbelinna. Kualemi kerina dosa-dosana dingen kerina salahna lanai Kuinget. Aku TUHAN kap si nggo melasken ranan enda."
35 TUHAN mereken matawari guna nerangi suari si mereken bulan ras bintang-bintang nerangi berngi. IgawerNa lau lawit maka ergeruhguh. Gelarna eme: TUHAN si Mada Kuasa.
36 Erjanji Ia maka kidekah aturen enda tetap rasa lalap, bage me Israel tetap jadi sada bangsa i lebe-lebengKu.
37 Bali ras langit la tersibari, palas doni enda pe la terdalani, bage me Ia la nulak bangsa Israel erkiteken dosa-dosana. TUHAN kap si nggo melasken ranan enda.
38 Nina TUHAN, "Seh me paksana kerina Jerusalem ipanteki mulihi jadi kotangKu. Menaken i menara Hananel nari terus kempak pintun gerbang Suki-suki.
39 Baleng e terus i jenari ku kenjahe kempak uruk Garep, jenari mbeluk ku Goa.
40 Kerina baluren si nggo jadi pendawanen ras ingan pembuangen sampah bage pe kerina juma-juma i babo lau anak Kidron terus kempak Pintu Gerbang Kuda arah matawari pultak, e jadi ingan si badia man bangKu. Kota e ndigan pe lanai iruntuhken entah iradasken."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA