Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ PANGERAN, Allahna Isra’il,

² adhabu ka sengko’, "Toles e dhalem ketab kabbi se la ekoca’agi Sengko’ ka ba’na.

³ Sabab bakal napa’a baktona Tang ommat Isra’il ban Yehuda bi’ Sengko’ epabaliya ka asalla pole. Bi’ Sengko’ epabaliya ka nagara se bi’ sengko’ la ebagi ka bangatowana. Nagara jareya bakal ekaandhi’a pole bi’ Tang ommat jareya. Sengko’, PANGERAN, la ngoca’."

⁴ PANGERAN adhabu ka ommat Isra’il ban Yehuda,

⁵ "Sengko’ la ngedhing cerrengnga oreng se ketter atena, cerrengnga oreng se katako’an se ta’ andhi’ kataremtemman.

⁶ Kodda’ pekker ban talektegi! Ba’na badha’a lalake’ se rembi’? Mon enja’, arapa Sengko’ me’ nangale’e mowana saneyap oreng lake’ padha pocet pote sarta padha neggu’ tabu’na, akantha babine’ se rembi’a?

⁷ Are se nako’e la napa’, are se tadha’ bandhinganna. Monggu ka Tang ommat are jareya are se maseksek dhadha, tape reng-oreng jareya bi’ Sengko’ epasalamedda."

⁸ PANGERAN Se Mahakobasa adhabu pole ka ommadda, "Mon are jareya la para’, pekolan e le’erra ba’na bi’ Sengko’ epapotonga, ban kalenthong rantayya ebukka’a. Ba’na ta’ ekadunora oreng manca pole.

⁹ Ba’na bakal ngabdiya ka Sengko’, GUSTE Allahna, ban ka toronanna Daud, se bi’ Sengko’ epadaddiya rato.

¹⁰ Tang ommat Isra’il, ta’ osa tako’! Ba’na Yakub, Tang abdi, ta’ osa gujuden! Ba’na ban toronanna bi’ Sengko’ epasalamedda dhari nagara se jau, kennengnganna ba’na se etawan. Ba’na bakal moleya, ban ennengnga e nagarana, sarta aman odhi’na. Odhi’na ba’na bakal taremtemma pole; sarta tadha’ se parlo ekatako’e.

¹¹ Sengko’ dhatengnga, ban ba’na epasalamedda. Sa-bangsa, kennengnganna ba’na epasalebbudan bi’ Sengko’ kabbi bi’ Sengko’ epatompessa, tape ba’na ta’ epakantha’a jareya. Pajat ba’na ta’ epalopoda dhari okoman tape okomanna Sengko’ ka ba’na adil menorot katantowan. Sengko’, PANGERAN, la ngoca’."

¹² PANGERAN adhabu ka ommadda, "Panyakedda ba’na la sara, lokana ba’na tadha’ tambana.

¹³ Tadha’ oreng se endha’ arabada ba’na, tadha’ tambana bu-tombuna, ba’na tadha’ pangarebban se barasa dhari sake’na.

¹⁴ Kabbi kakasena la loppa ka ba’na; tadha’ se endha’ mekkere ba’na maske settonga. Sengko’ padha ban moso se nyerrang ban ngokom ba’na epakejjem parana, sabab ba’na bannya’ dusana, ban raja kasala’anna.

¹⁵ Ba’na ja’ aserro pole parkara ka-lokana, sabab ba’na tadha’ pangarebban se barasa dhari sake’na. Ba’na bi’ Sengko’ eokom kantha jareya polana ba’na bannya’ dusana ban raja kasala’anna.

¹⁶ Tape sateya sapa se ngontal ba’na bakal eontala, ban sakabbinna mosona ba’na bakal eangko’a ka pambuwangan. Se nyek-ngenyek ba’na bi’ Sengko’ enyek-enyegga, se arampok ba’na bi’ Sengko’ erampoga.

¹⁷ Maske mosona ba’na ngoca’, ‘Siyon la ebuwang, ban tadha’ se mekkere pole,’ tape bi’ Sengko’ ba’na epabarasa pole, ka-lokana ba’na bi’ Sengko’ etamba’ana."

¹⁸ PANGERAN adhabu pole, "Ba’na, Tang ommat, bi’ Sengko’ ekaneserrana, epabaliya ka tana asalla, kabadha’anna epabaliya akantha ba’-lamba’na. Yerusalim bi’ Sengko’ epaddegga pole, ban karatonna epateppa’a.

¹⁹ Pandhudhu’na bakal mojiya Sengko’ ngangguy nyanyeyan, ban rak-soragan kasennengngan. Sengko’ nolonga Tang ommat sopaja ehormadi oreng, ban ta’ eya-seya pole, sarta atamba ros-terrosan.

²⁰ Bangsana ba’na bi’ Sengko’ epajaja’a akantha gi’ jaman lamba’, kakowadanna epakokowa pole. Pa’-sapa’a se nyek-ngenyek bangsa reya bi’ Sengko’ eokoma keya.

²¹ Rato se marenta’a ba’na dhari bangsana ba’na dibi’ asalla. Rato jareya bakal bebasa nyemma’e Sengko’, mon bi’ Sengko’ eolok. Sabab sapa se bangala ngadhep ka Sengko’ sakarebba dibi’? Ba’na daddiya Tang ommat ban Sengko’ daddi Allahna ba’na. Sengko’, PANGERAN, la ngoca’."

²² (30:21)

²³ Dukana PANGERAN akantha kaleng busbus, akantha angen barat se ngamok ka reng-oreng se jahat, ban ta’ gellem ambu sabellunna kasokanna kalakon kabbi. E budhi are ommadda tanto ngarte parkara jareya.

²⁴ (30:23)

Yeremia

Video Yeremia 30

Ikuti Kami:

KONTAK | PARTISIPASI | DONASI