Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 On do hata ni surat ni si Jeremia, nabi ai, na tinongosni hun Jerusalem bani pangintuai-pangintuai ni na tarbuang ai, ampa bani malim-malim, nabi-nabi ampa haganup bangsa ai, na binoan ni si Nebukadnesar hu habuangan, hun Jerusalem hu Babel.
2 Ai ma dob tarbuang hun Jerusalem Raja Jekonya, inang ni raja ai, juakjuakni, na sangap-sangap ni Juda ampa Jerusalem, tuhang hayu ampa tuhang bosi.
3 Itongos do surat ai marhitei si Eleasa, anak ni si Sapan ampa marhitei si Gemarya, anak ni si Hilkia, na sinuruh ni si Sedekia, raja ni Juda, hu Babel, hubani si Nebukadnesar, raja ni Babel, hatani,
4 “Sonon do hata ni Jahowa Zebaot, Naibata ni Israel, hu bani haganup na tarbuang, na tarboan hun Jerusalem hu Babel,
5 ʻPajongjong hanima ma rumah, lanjar iankon ma; pungkah hanima ma juma, anjaha pangan ma gogohni!ʼ
6 Mambuat boru ma, ase maranak marboru hanima; paompo hanima anaknima, anjaha borunima palaho hanima, ase tubuhan anak tubuhan boru sidea; manggompari ma hanima ijin ulang ma manginsurut.
7 Porluhon hanima ma hadoharon ni huta pambuangan-Ku bannima, anjaha apiti hanima ma sidea i lobei ni Jahowa, ai ibagas hadoharon ni sidea ai dihut do hanima mardohar.ʼ
8 Ai sonon do hata ni Jahowa Zebaot, Naibata ni Israel, ʻUlang ma ra hanima paoto-otoon ni nabinima atap partondung na adong i tongah-tongahnima, anjaha ulang ma patangi-tangi hanima nipi na niipi ni sidea;
9 ai sipaoto-oto do panjahaion ni sidea bannima marhitei goran-Ku; sedo Ahu marsuruh sidea,ʼ” nini Jahowa.
10 Ai sonon do hata ni Jahowa, “Anggo domma gok sipitupuluh tahun ai, na dob Huhatahon bani Babel, parayakon-Ku do hanima, anjaha pasaudon-Ku do bagah-bagah-Ku na bannima ai, anjaha boanon-Ku do hanima mulak bani ianan on.
11 Ai Hubotoh do torang sura-surang-Ku pasal hanima,” nini Jahowa, “Ai ma sura-sura hadearon, sedo hamagouan, laho parsirsirhon bannima parsaud ni na niarapkonnima.
12 Jadi padilo-dilonnima ma Ahu; roh ma hanima hu Bangku martonggo, gabe tangihonon-Ku do hanima.
13 Pindahannima do Ahu, anjaha jumpah hanima do Ahu; anggo ipindahi hanima Ahu humbani gok ni uhurnima,
14 jadi jumpah hanima do Ahu,” nini Jahowa. “Pasuangon-Ku do hanima, anjaha patumpuon-Ku do hanima humbani haganup bangsa-bangsa ampa humbani ganup ianan pambuangan-Ku bannima,” nini Jahowa, “Anjaha boanon-Ku do hanima mulak hubani ianan habingkatannima hu habuangan.
15 Ihatahon nasiam, ʻDomma ipabangkit Jahowa bennami nabi i Babel.ʼ
16 Sonon do hata ni Jahowa pasal raja, na marhotak bani hotak ni si Daud, ampa pasal haganup halak na marianan i huta on, ai ma sanina nasiam, na so dihut tarboan rap pakon nasiam hu habuangan.
17 Sonon do hata ni Jahowa Zebaot, Tonggor ma, Hutongos do dompak sidea podang, lohei pakon sampar, anjaha bahenon-Ku do sidea songon buah ara na masik, na so tarpangan be halani masikni.
18 Pardakdakon-Ku do sidea marhitei podang, lohei ampa sampar, anjaha bahenon-Ku do sidea gabe songgot-songgot bani haganup harajaon na i tanoh on, gabe siburaan, hagobiron, sipahirion ampa sirisaon i tongah-tongah ni bangsa-bangsa pambuangan-Ku bani sidea,
19 halani na so itangihon sidea hatang-Ku,” nini Jahowa, “Na Hutonahkon bannima marulak-ulak marhitei nabi-nabi ai, tapi seng ra hanima manangihon,” nini Jahowa.
20 “Halani ai, tangihon hanima ma hata ni Jahowa, hanima haganup na tarbuang in, na dob Hubuangkon hun Jerusalem hu Babel!
21 Sonon do hata ni Jahowa Zebaot, Naibata ni Israel, pasal si Ahab, anak ni si Kolaya, ampa pasal si Sedekia, anak ni si Maaseya, na manjahahon ladung bannima marhitei goran-Ku, ʻTonggor ma, ondoskonon-Ku do sidea hubagas tangan ni si Nebukadnesar, raja ni Babel, anjaha bunuhonni do sidea i lobeinima.ʼ
22 Anjaha goran ni sidea ai pakeion ni halak na tarbuang hun Juda, na i Babel ai ma, laho mamurai, nini sidea ma, ʻSai ibahen Jahowa ma, usih songon na bani si Sedekia ampa na bani si Ahab, na tinutung ni Raja Babel ibagas Apuy!ʼ
23 halani ibahen sidea hasamboron i tongah-tongah ni Israel, anjaha marbangkisi sidea pakon jolma ni hasomanni, anjaha iluarhon sidea hata ladung marhitei goran-Ku, na so Hutonahkon bani sidea. Ahu do hansa sipabotoh-botoh ampa sisaksihon ai,” nini Jahowa.
24 Anjaha bani si Semaya na hun Nehelam, hatahon ma,
25 ʻSonon do hata ni Jahowa Zebaot, Naibata ni Israel, ʻItongos ho do surat marhitei goranmu bani ganup halak na i Jerusalem, ampa hubani Malim Sepanya, anak ni Malim Maaseya, ampa hu bani ganup malim, isini:
26 Domma ipabangkit Jahowa ho gabe malim gantih ni Malim Joyada, laho manramotkon rumah ni Jahowa, ampa mardiateihon halak na podoan na sai manjahai, laho mannahkon sidea hubagas bayangan ampa gari borgok.
27 Ai pe, mase ma lang mangonai hata ho hubani si Jeremia par Anatot ai, na manjahai bannima?ʼ
28 Ai manongos surat do ia hu Babel, mangkatahon, ʻDokah ope nasiam tarbuang, Paturei nasiam ma rumah, anjaha iankon nasiam ma ai; tombei nasiam ma pohon anjaha pangan nasiam ma gogohni.ʼ
29 Jadi ibasa Malim Sepanya ma surat ai i lobei ni Nabi Jeremia.
30 Dob ai roh ma hata ni Jahowa bani si Jeremia sonon,
31 “Suruh ma suruhan marayak sagala na tarbuang in laho patugahkon: Sonon do hata ni Jahowa pasal si Semaya na hun Nehelam, Manjahai do si Semaya bannima, hape sedo Ahu marsuruhsi, anjaha ibahen hanima martenger ni uhur bani ladung,
32 halani ai, sonon do hata ni Jahowa, Tonggor ma, marlulu do Ahu bani si Semaya, na hun Nehelam ampa bani ginomparni: Seng anjai dong humbani ginomparni, na marianan i tongah-tongah ni bangsa on, na mangidah na madear, na sihol bahenon-Ku bani bangsang-Ku,” nini Jahowa, “Halani na niambilankon ai panlawanon dompak Jahowa.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA