Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sengko’ noles sorat ka mam-imam, bi-nabbi, pin-pamimpinna bangsa se gi’ odhi’ ban ka sakabbinna oreng laen se eangko’ dhari Yerusalim ka Babil bi’ Nebukadnezar.

² Sorat jareya bi’ sengko’ etoles saellana Rato Yoyakhin, ebuna, ba-ponggaba karaton, ja-pangrajana pamarenta’an Yehuda ban Yerusalim, para pangrajin ban para panglako se ahli eangko’ ka pambuwangan.

³ Sorat jareya bi’ sengko’ epatoro’ ka Elasa ana’na Safan, ban Gemariya ana’na Hilkiya se eotos Zedekiya rato Yehuda ka Nebukadnezar rato Babil. Monyena sorat jareya kantha reya:

⁴ "PANGERAN Se Mahakobasa, Allahna Isra’il, adhabu kantha reya ka sakabbinna oreng se bi’ Salerana ebuwang dhari Yerusalim ka Babil:

⁵ ‘Ba’na agabay bengko ban neptep e jadhiya. Agarap tana ban ane’madi hasella.

⁶ Abine me’ olle ba’na andhi’ ana’, ban dina na’-ana’na ba’na me’ olle abine keya sopaja andhi’a ana’ keya. Ba’na kodu sajan atamba bannya’, ta’ olle sajan sakone’.

⁷ Alako kaangguy kaamanan ban kama’moranna tha-kottha kennengnganna ba’na ebuwang bi’ Sengko’. Adu’a ka Sengko’ kaangguy kaparlowanna tha-kottha jareya, sabab mon tha-kottha jareya ma’mor, ba’na tanto ma’mor keya.

⁸ Sengko’, PANGERAN Se Mahakobasa, Allahna Isra’il, maenga’a ba’na sopaja ba’na ja’ sampe’ eco-koco bi-nabbi se apolong ban ba’na otabana bi’ sapa’a bai se ngoca’ ja’ aba’na bisa aramallagi jaman se bakal dhateng. Ja’ parduli ka pe-mempena reng-oreng jareya.

⁹ Reng-oreng jareya ngangguy Tang nyama kaangguy nyareta’agiya ka ba’na sabarang se ta’ teppa’. Sengko’ ta’ nyoro reng-oreng jareya. Sengko’, PANGERAN Se Mahakobasa, la ngoca’.’

¹⁰ PANGERAN adhabu, ‘Mon la lebat bakto pettong polo taon monggu ka Babil, bi’ Sengko’ ba’na epekkerana pole; Sengko’ neptebbana Tang janji se ngoca’ mabaliya ba’na pole ke kennengngan reya.

¹¹ Sengko’ dibi’ tao ka sakabbinna Tang sajja se etantowagi Sengko’ ka ba’na. Tang sajja jareya kabbi banne macalaka’a ba’na, tape ma-nyamana odhi’na ba’na, ban aberri’a odhi’ se possa’ ban pangarep e bakto se bakal dhateng.

¹² Daddi ba’na bakal menta’a tolong ka Sengko’. Ba’na bakal entara ka Sengko’ kaangguy adu’a. Ban Sengko’ nyaodana du’ana ba’na.

¹³ Ba’na bakal nyareya Sengko’ ban nemmowa Sengko’, sabab ba’na nyare kalaban gu-onggu.

¹⁴ Onggu, ba’na bakal nemmowa Sengko’. Bi’ Sengko’ ba’na epakompola dhari nga’-tengnga’anna saneyap bangsa ban dhari saneyap nagara kennengnganna ba’na epabalessadan ban ebuwang bi’ Sengko’. Bi’ Sengko’ ba’na egiba’a abali ka nagara asalla reya ban kabadha’anna ba’na epabaliya akantha asalla. Sengko’, PANGERAN, la ngoca’.’

¹⁵ Ca’na ba’na PANGERAN marenge ba’na bi-nabbi e Babil.

¹⁶ Mara edhingngagi apa dhabuna PANGERAN parkara rato se marenta sateya reya, iya reya rato toronanna Daud, ban parkara pandhudhu’ kottha reya, iya reya la-balana ba’na se ta’ eangko’ ka pambuwangan abareng ban ba’na.

¹⁷ PANGERAN Se Mahakobasa adhabu, ‘Sengko’ madhatengnga paperrangan, kalaparan ban wabah panyaket ka reng-oreng jareya. Reng-oreng jareya bi’ Sengko’ epakantha’a buwana ara se bucco’ sampe’ ta’ ekenneng kakan.

¹⁸ Bi’ Sengko’ reng-oreng jareya eserserra ban paperrangan, kalaparan, ban wabah panyaket sampe’ sakabbinna bangsa e attas bume reya bakal arassa’a marenges nangale’e kabadha’anna. E dhimma’a bai reng-oreng jareya epabalessadan bi’ Sengko’, sampe’ oreng se nangale’e apa se kadaddiyan ka reng-oreng jareya bakal arassa’a marenges ban tako’. Reng-oreng jareya bakal eya’-seya’a, nyamana ekagabay babaston.

¹⁹ Jareya kabbi kadaddiyan ka reng-oreng jareya polana ta’ atoro’ ka Tang oca’ se bi’ Sengko’ ros-terrosan epessennagi kalaban parantara’anna para nabbi, Tang abdi. Reng-oreng jareya ta’ endha’ ngestowagi Tang pessen jareya.

²⁰ Dineng ba’na kabbi se bi’ Sengko’ ebuwang ka Babil, edhingngagi apa se ekoca’agi Sengko’, PANGERAN.’

²¹ PANGERAN Se Mahakobasa, Allahna Isra’il, la adhabu parkara Ahab pottrana Kolaya, ban parkara Zedekiya pottrana Ma’aseya se ngangguy asmana Pangeran kaangguy manapa’ ka ba’na sabarang se ta’ bendher. Pangeran adhabu ja’ reng-oreng jareya epassra’agiya ka kakobasa’anna Nebukadnezar rato Babil, se mateyana Ahab ban Zedekiya jareya e adha’na matana ba’na.

²² Daddi mon reng-oreng se la eangko’ dhari Yerusalim ka Babil abastowa oreng, tanto ngoca’ kantha reya, ‘Moga bi’ ALLAH ba’na epakantha’a Zedekiya ban Ahab, se eobbar dhi’-odhi’ bi’ rato Babil.’

²³ Kantha jareya daddina reng-oreng jareya polana sa-dusana se raja e Isra’il: azina, ban ngangguy asmana PANGERAN kaangguy nyareta’agi sabarang se ta’ bendher. Jareya ta’ cocok ban kasokanna PANGERAN. Salerana ngagali apa se la elakone reng-oreng jareya, ban Salerana dibi’ se daddi sakse se noduwagiya salana reng-oreng jareya. PANGERAN la adhabu."

²⁴ PANGERAN Se Mahakobasa, Allahna Isra’il, apareng pessen lebat sengko’ ka Semaya, oreng Nehelam, sabab Semaya ngerem sorat bit nyamana dibi’ ka sakabbinna pandhudhu’ Yerusalim, ka Imam Zefanya ana’na Ma’aseya ban ka mam-imam laenna. E dhalem sorat jareya Semaya noles kantha reya ka Zefanya:

²⁵ (29:24)

²⁶ "Ba’na bi’ PANGERAN epadaddi imam epagante Yoyada, sateya ba’na se neggu’ pangkat se paleng tenggi e Padalemman Socce. Kawajibanna ba’na marenta’agi sopaja saneyap oreng gila, se ngako nabbi, le’erra ekalenthong bi’ rantay besse.

²⁷ Tape arapa ba’na me’ neng-enneng bai ka Yeremiya oreng Anatot rowa se ngako nabbi e antarana bangsana ba’na?

²⁸ Oreng jareya kodu etombeng colo’na, sabab ngoca’ ka reng-oreng bangsana ba’na e Babil ja’ reng-oreng jareya gi’ abida badha e jadhiya. Daddi, ca’na Yeremiya jareya, reng-oreng bangsana ba’na se badha e Babil jareya kodu maddek bengko e jadhiya, atane ban ane’madi hasella."

²⁹ Sorat jareya ebaca’agi e adha’na sengko’ bi’ Imam Zefanya.

³⁰ Daddi PANGERAN makon sengko’

³¹ manapa’ berta parkara Semaya ka sakabbinna oreng Isra’il se ebuwang e Babil. Bertana kantha reya, "Semaya la-malae ba’na akantha aba’na se nabbi. Mangkana Sengko’, PANGERAN, enja’ ta’ nyoro. Sarrena bi’ Semaya ba’na epaparcaja ka caca se lecek,

³² ban sarrena ba’na esoro alaban ka Sengko’, Sengko’ ngokoma Semaya jareya satoronanna. Tadha’ settonga e antarana Semaya ban toronanna se odhi’a akompol ban bangsa reya, daddi tadha’ se nangaleyana sabarang se becce’ se bi’ Sengko’ ejalannagiya kaangguy Tang ommat kabbi. Sengko’, PANGERAN, la ngoca’."

Yeremia

Video Yeremia 29

Ikuti Kami:

KONTAK | PARTISIPASI | DONASI