Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Jadi masa ma bani tahun ai, bani parmulaan ni harajaon ni si Sedekia, raja ni Juda, paompat-tahunkon, bani bulan lima, roh ma si Hananya, anak ni si Azur, nabi na hun Gibeon, marsahap hu bangku i rumah ni Jahowa, i lobei ni malim-malim pakon ganup bangsa ai, nini ma,
2 “Sonon do hata ni Jahowa Zebaot, Naibata ni Israel, ʻDomma Huponggolhon pasangan na humbani Raja Babel.
3 Ibagas na dua tahun on boanon-Ku do mulak hubani ianan on haganup parugas ni rumah ni Jahowa, ai ma na binuat ni si Nebukadnesar, Raja Babel, humbani ianan on anjaha iboan hu Babel.
4 Si Jekonya pe, anak ni si Joyakim, raja ni Juda, ampa haganup na tarbuang hun Juda, na tarboan hu Babel, boanon-Ku do mulak hubani ianan on,” nini Jahowa; “Ai ponggolhonon-Ku do pasangan na humbani Raja Babel.”
5 Jadi nini Nabi Jeremia ma dompak Nabi Hananya i lobei ni malim-malim ampa haganup bangsa ai, na jongjong i rumah ni Jahowa;
6 nini Nabi Jeremia ma, “Amen! Ibahen Jahowa ma tongon sonai, sai ipasaud Jahowa ma tongon hata na dob ijahahon ho, sai iboban ma mulak hun Babel hubani ianan on sagala parugas ni rumah ni Jahowa ampa haganup na tarbuang ai.
7 Tapi tangihon ma hata on, na huhatahon bam ampa hu bani haganup bangsa on,
8 ʻNabi-nabi na parlobei humbangku ampa humbam, humbani sapari nari ilumbahon do porang, lohei ampa sampar dompak buei nagori ampa dompak harajaon na banggal-banggal.ʼ
9 Pasal nabi, na manjahai pasal hadameion, ʻAnggo tongon ma saud hata ni nabi ai, jadi botohon ma, Jahowa ma tongon na marsuruhsi.ʼ”
10 Dob ai ibuat Nabi Hananya ma pasangan ai humbani tangkuhuk ni Nabi Jeremia, anjaha iponggolhon ma ai.
11 Ihatahon si Hananya ma i lobei ni ganup bangsa ai, “Sonon do hata ni Jahowa, ʻSonai ma ponggolhonon-Ku pasangan na humbani si Nebukadnesar, raja ni Babel, humbani tangkuhuk ni sagala bangsa ibagas dua tahun on.ʼ” Tapi inunut Nabi Jeremia ma dalanni.
12 Dob iponggolhon Nabi Hananya pasangan ai humbani tangkuhuk ni Nabi Jeremia, roh ma use hata ni Jahowa bani Nabi Jeremia,
13 “Laho ma ho, hatahon ma bani si Hananya, sonon do hata ni Jahowa, ʻDomma iponggolhon ho pasangan hayu ai, tapi paulion-Ku do pasangan bosi bahen gantih ni ai.ʼ
14 Ai sonon do hata ni Jahowa Zebaot, Naibata ni Israel: Pasangan bosi do tampeihonon-Ku bani tangkuhuk ni ganup bangsa-bangsa on, ase tunduk sidea bani si Nebukadnesar, raja ni Babel, anjaha maningon balosan ni sidea do ia; age binatang na i talun domma Huondoskon hu bani.”
15 Jadi nini Nabi Jeremia ma dompak Nabi Hananya, “Tangihon ma, ale Hananya! Sedo Jahowa marsuruh ho, ibahen ho do bangsa on martenger ni uhur bani ladung.
16 Halani ai sonon do hata ni Jahowa, ʻTonggor ma, usiron-Ku do ho hun sisik ni tanoh on.ʼ Ibagas tahun on pe matei ma ho, halani iambilankon ho panlawanon dompak Jahowa.”
17 Jadi matei ma tongon Nabi Hananya ibagas na satahun ai, bani bulan pitu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA