Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ia todong anjo taunga ri bulang lima taung makaappa’ ri pamarentahanna Karaeng Zedekia, Hananya ana’na Azur, se’re na’bi battu ri kota Gibeon, a’bicarai ri nakke ri Balla’Na Batara. Ri dallekanna imang-imanga siagang ra’yaka napaui ri nakke angkanaya
2 Batara Kaminang Koasaya, Allata’alana Israel, akkana kammai anne, "Kagassinganna karaeng Babel le’ba’mi Kupa’jari peso’.
3 Lalang wattu ruan taunga anne labattua laKupoterangi barang-barang battua ri BallakKu, ia le’baka niengka’ mange ri Babel ri Karaeng Nebukadnezar.
4 LaKuerang tongi ammotere’ Yoyakhin ana’ bura’nena Yoyakim karaeng Yehuda, siagang sikontu ra’ya’ Yehuda ia le’baka niengka’ mange ri Babel. Tojeng, laKupa’jari pesoki kagassinganna Babel. INakke, Batara, anne akkana."
5 Jari ri dallekanna imang-imanga siagang sikontu ra’ya’ ammentenga ri anjo Balla’Na Batara, kukanamo mae ri Hananya,
6 "Bajiki! Dasi-dasi na’rupaja antu botonu, siagang Naerang tojengi Batara ammotere’ battu ri Babel barang-baranna Balla’Na Batara siagang sikontu tau nipelaka mange anjoreng.
7 Mingka ikau Hananya, siagang ikau ngaseng, he ra’yaka, pilangngeri anne:
8 Na’bi-na’bi rioloanganta le’ba’mi naboto angkanaya pa’bundukang, bala lompo, siagang garring labattu antujui jaia bansa siagang kakaraengang kassaka.
9 Mingka na’bi a’botoa ri kaamangngang, iapa nakkulle niakui salaku na’bi tojeng-tojeng nisuro ri Batara, punna a’rupa tojenja anjo sikontu apa nabotoa."
10 Nampa napasinta’ Hananya anjo lembarang niaka ri salanggangku na natepo’.
11 Ri dallekanna sikontu ra’ya’ niaka hadere’ anjoreng, nakanamo, "Nakana Batara, kammaminne carana laNatepo’ lembarang napatabaya Nebukadnezar mae ri salangganna sikontu bansaya; laNagaukangi Batara anjo kammaya lalang ruan taung anne labattua." Le’baki anjo a’lampami Hananya.
12 Tena nasallo ri le’ba’na anjo kajarianga, nasuroa’ Batara
13 a’lampa mange ri Hananya untu’ akkana kamma anne, "Nakana Batara, akkulle memangko antepoki lembarang kayua, mingka laNasambei lembarang bassi.
14 Batara Kaminang Koasaya, Allata’alana Israel Napaui angkana laNapatabai lembarang bassia ri salangganna sikontu anne bansaya, siagang lanapa’jari atai kalenna ke’nanga mae ri Nebukadnezar, karaeng Babel. Napau tongi Batara angkanaya manna olo’-olo’ sekkeka laNapassareang tongi antama’ ri kakoasanna Nebukadnezar."
15 Yangasenna anjo kupabattui mae ri Hananya, nampa kukana pole, "Pilangngeri he Hananya! Tena naNasuroko Batara; nupa’jari tappa’mi anne bansaya ri bicara balle-ballea.
16 Lanri kammana anjo KalenNa Batara ampaui angkanaya lanipa’lanynyakko battu ri tompo’na buttaya. Ia memang anne taunga nulamate, lanri nusurona anne bansaya angngewai Batara."
17 Nampa anjo memang taunga ri bulang makatuju, namate Hananya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA