Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tena nasallo Zedekia ana’ bura’nena Yosia a’jari karaeng Yehuda, Nasuroa’ Batara
2 appare’ otere’ kukkulu’ siagang kayu lembarang, nampa napadongko’ ri salanggangku.
3 Nasuro tonga’ ampabattui pasanNa mae ri karaeng-karaeng Edom, Moab, Amon, Tirus siagang Sidon, tete ri sikamma tunasuroa ke’nanga ia niaka battu mange ri Yerusalem untu’ angkunjungi Karaeng Zedekia.
4 Musti kupauangi ke’nanga angkanaya Batara Kaminang Koasaya, Allata’alana Israel, Nakana,
5 "Lanri koasa malompoKu siagang lanri kagassingangKu nale’ba’ Kupa’jari linoa siagang rupataua kammayatompa sikontu olo’-oloka, nampa akkulle Kupassareang mae ri inai-nai mamo Kukaerokia.
6 INakkemi le’ba’ ampassareangi sikontu anne bansaya antama’ ri kakoasanna atangKu, Nebukadnezar, karaeng Babel. Ba’lalo manna olo’-oloka le’ba’ tommi Kupassareang mae ri ia untu’ nakoasai.
7 Sikontu bansaya la’jari atai mae ri ia, mae ri ana’-ana’ bura’nena, siagang mae ri cucunna sa’genna narapi’ wattunna pa’rasangang kalenna tu’guru’ todong. Anjo wattua bansa Babel la’jari atai mae ri bansa-bansa kassaka siagang karaeng-karaeng lompoa.
8 Bansa yareka kakaraengang tenaya naero’ tundu’ mae ri Nebukadnezar laKuhukkungi siagang pa’bundukang, kacipurang kammayatompa garring, sa’genna kale’bakkanna anjo bansaya tunduki mae ri ia.
9 Teako pilangngeri na’bi-na’bia yareka manna pole inai ampisangkaiko tundu’ mae ri karaeng Babel, manna pole nanakana kalenna le’baki annarima pitunju’ battu ri so’na, roh-roh alusu’, yareka lanri ammakei kagassingang pangngassengang.
10 Natipuko ke’nanga sa’gennu nierang a’lampa bella battu ri pa’rasangannu. LaKubongkako battu ri pa’rasangannu siagang lapanrakko.
11 Mingka bansa eroka tundu’ siagang a’jari ata mae ri karaeng Babel laKulappassangi ammantang ri butta passolongang cera’ kalenna, siagang a’lamung-lamung anjoreng. INakke, Batara anne akkana."
12 Inakke, Yeremia, kupabattu tongi anne pasang kammaya mae ri Zedekia karaeng Yehuda. Kukana, "Manyara mako mae ri karaeng Babel. Mannurukiko ri ia siagang ri bansana, sollanta salama’ karaeng.
13 Le’ba’mi Napau Batara angkanaya bansa tenaya natundu’ mae ri karaeng Babel lamatei lalang pa’bundukang, kacipurang, yareka garring. Angngapa kiero’ mate kamma karaeng siagang ra’yaka?
14 Teaki’ pilangngeri na’bi-na’bi ampisangkaiaki’ tundu’ mae ri karaeng Babel, nasaba’ natipuki’ ke’nanga karaeng.
15 Nakana kalenna ke’nanga a’bicarai lalang arenNa Batara, mingka a’balle-ballei ke’nanga. KalenNa Batara angkana tena naNasuroi ke’nanga. Lanri kammana lanipasisa’la’-sa’lakki siagang nipanrakiki’ karaeng siagang ngaseng anjo na’bi-na’bi a’balle-ballea mae ri katte."
16 Nampa kupauang imang-imanga siagang sikontu ra’yaka angkanaya akkana kammai anne Batara, "Teako pilangngeri na’bi-na’bi angkanaya tenamo nasallo nalanierang ammotere’ barang-barang niaka ri BallakKu battu ri Babel. A’balle-ballei ke’nanga.
17 Teako pilangngeri ke’nanga! Manyara mako ri karaeng Babel, sollannu salama’. Untu’ apa namusti ancuru’ anne kotaya?
18 Punna memang na’bi ke’nanga, siagang le’baki annarima pasang battu ri Nakke, tantu kamma-kamma anne napalaki ri Nakke, Batara Kaminang Koasaya, sollanna barang-barang niaka ija ri BallakKu siagang ri balla’ karaeng ri Yerusalem tena naniengkaki mange ri Babel.
19 Nasaba’ iNakke, Batara Kaminang Koasaya, Allata’alana Israel, le’ba’mi Kutappuki angkanaya sikontu anjo barang-baranga laniengkaki mange ri Babel, siagang tuli lania’na anjoreng sa’genna Kuparhatikang ammotere’. Anjo wattua nampami laKuerang ammotere’ mae anrinni ri tampaka. INakke, Batara anne akkana." Barang-barang niaka ija ri Balla’Na Batara iamintu: benteng-benteng, bongki tambaga, kareta-kareta, siagang siapa are barang maraenna Balla’Na Batara. Anjo barang-baranga tena natappinawang nierang mange ri Babel, ri wattunna Yoyakhin ana’ bura’nena Yoyakim karaeng Yehuda siagang pamimping-pamimpinna tu Yehuda siagang Yerusalem niengkaki mange ri Babel ri Karaeng Nebukadnezar.
20 (27:19)
21 (27:19)
22 (27:19)
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA